Rom 7:1-25
7 Unau hna, Nawlbia nih mi pakhat cu a nun chung lawng a uk ti kha nan hngal lo maw? (Nawlbia a hngalmi hna sinah ka chim caah a si.)
2 Tahchunhnak ah, va a ngeimi nu cu a va a nun chung paoh phung nih a va he a ṭem hna. Asinain a va a thih ahcun a va he a ṭemtu phung in a luat.
3 Cucaah a va a nun lioah va dang a ngeih ahcun a zuangzammi tiah auh a si lai. Asinain a va a thih ahcun a va he a ṭemtu phung in a luat cang caah va dang a ngeih zong ah a zuangzammi a si ti lai lo.
4 Cucaah unau hna, kannih cu Nawlbia tang ah kan rak um. Asinain Khrih raithawinak thawng in kan luat cang caah thihnak in a tho ṭhanmi Khrih ta kan si cang, mah cu Pathian sunparnak a langhtermi thei kan tlai khawh nakhnga caah a si.
5 Pumsa duhnak ning in kan nun lioah sual duhnak nih kan pum* cu sualnak a tuahter ti kha Nawlbia nih fiang tein a langhter. Mah sualnak nih thihnak kha a chuahter.
6 Atu cu a kan ṭemtu Nawlbia khan kan thih cang caah Nawlbia in kan luat cang. Cucaah ṭialmi nawlbia hlun ning in si loin thiang thlarau lamhruainak lam thar ning in Pathian sal kan si kho cang.
7 Cu a si ah zeitindah ka chim lai? Nawlbia cu a sual maw? Sual hrimhrim hlah! Nawlbia um hlah seh law sualnak hi zeidah a si ti kha ka hngal hnga lo. Tahchunhnak ah, Nawlbia nih “Mi thil na mit va thi hlah” tiah ti hlah seh law mitthitnak hi zeidah a si ti kha ka hngal hnga lo.
8 Asinain sualnak nih mah nawlbia kha hmang in ka chung ah mitthitnak a phunphun a chuahter. Zeicahtiah nawlbia lo cun sualnak cu a thi.
9 A tak ti ahcun nawlbia loin ka rak nung bal. Asinain nawlbia a phanh tikah sualnak cu a nung ṭhan i kei tu cu ka thi.
10 Nunnak ah a hruaitu ding mah nawlbia cu thihnak ah a hruaitu a si lehlam ti kha ka hun hngalh.
11 Sualnak nih mah nawlbia kha hmang in a ka lem i a ka thah.
12 Asinain Nawlbia thengte cu a thiang, mah nawlbia chimmi cu a thiang, a ding i a ṭha.
13 Cu a si ah a ṭhami thil nih ka thihnak kha a tlunter maw? A tlunter hrimhrim lo! Sualnak tu nih a tlunter. Sualnak nih a sining langhter awkah a ṭhami thil kha hmang in ka cung ah thihnak a tlunter. Cucaah mah nawlbia thawng in sualnak a sual zia cu a lang chinchin.
14 Nawlbia cu thlaraulei thil a si ti kha ka hngalh. Asinain kei cu sualnak sal ah zuarhmi thisa minung ka si.
15 Ka tuahmi thil kha ka hngalthiam lo. Ka duhmi thil kha tuah loin ka huatmi thil tu kha ka tuah.
16 Ka duh lomi thil ka tuah timi ruahnak ka ngeihmi nih Nawlbia cu a ṭha ti ka cohlan kha a langhter.
17 Asinain mah thil a tuahtu cu keimah ka si ti lo, ka chung ah a ummi sualnak a si.
18 Ka chung ah, ka taksa pum chung ah ṭhatnak zeihmanh a um lo ti kha ka hngalh. Zeicahtiah a ṭhami thil kha tuah ka duh ko nain ka tuah kho lo.
19 Ka duhmi thilṭha kha tuah loin ka duh lomi thil ṭhalo tu kha ka tuah.
20 Ka duh lomi thil kha ka tuah ahcun mah thil a tuahtu cu keimah ka si ti lo, ka chung ah a ummi sualnak tu a si.
21 Cucaah ka sining in ka hngalhmi phung pakhat cu a hmaanmi thil tuah ka duh tikah a ṭhalomi thil tuah duhnak lungthin cu ka chung ah a rak um cang ti kha a si.
22 Ka chung muru in cun Pathian nawlbia kha ka duh tuk ko.
23 Asinain ka pum* chung ah a dang phung pakhat a um vemi kha ka hmuh. Cu phung nih cun ka lungthin a ukmi phung kha a doh i ka pum* chung ah a ummi sualnak phung sal ah a ka ser.
24 Ka sining cu ngaihchia a va si dah! Thihnak ah a ka kalpitu pum in aho nih dah a ka khamh lai?
25 Kan Bawipa Jesuh Khrih thawng in a ka khamhtu Pathian kha ka lawmh! Ka lungthin cun Pathian nawlbia sal ka si ko nain ka taksa cun sualnak phung sal ka si.
