Rom 8:1-39
-
Thiang thlarau thawng in nunnak le luatnak (1-11)
-
Fale in ser kan si kha thlarau nih tehte a khaan (12-17)
-
Pathian fale ngeihmi zalonnak kha sermi thil nih an hngah (18-25)
-
‘Thiang thlarau nih a kan nawlpiak’ (26, 27)
-
Pathian nih a hlankan in bia a rak khiah (28-30)
-
Pathian dawtnak thawng in kan tei khawh (31-39)
8 Cucaah Khrih Jesuh he lungthin khat tein a ummi hna cu sualphawtnak in an luat.
2 Khrih Jesuh he lungthin khat tein a ummi hna nunnak a pemi, thiang thlarau he aa tlaimi phung nih sualnak le thihnak phung in aan luatter hna caah a si.
3 Minung cu mitlinglo kan si caah Nawlbia kha tling tein kan zul kho lo i Nawlbia nih a kan khamh kho lo. Asinain Pathian nih sualnak hloh awkah a Fapa kha minung pakhat in* a rak thlahnak thawng in Nawlbia nih a tuah khawh lomi kha a tuah. Cuticun Pathian nih minung sualnak kha bia a ceih.
4 Pumsa duhnak ning in si loin thiang thlarau lamhruainak ning in kan nunnak thawng in Nawlbia ah aa telmi a dingmi phung kha kan zulh khawh nakhnga caah a si.
5 Pumsa duhnak ning in a nungmi cu pumsa thil kha an ruat peng. Thiang thlarau lamhruainak ning in a nungmi tu cu thlarau thil kha an ruat peng.
6 Pumsa thil kong ruahnak nih thihnak a chuahter, asinain thlarau thil kong ruahnak nih nunnak le daihnak a chuahter.
7 Pumsa thil kong a ruatmi hna cu Pathian ral ah an cang, zeicahtiah Pathian nawlbia kha an zul lo i a zulh zong an zul kho lo.
8 Cucaah pumsa duhnak a zulmi cu Pathian lung an tong kho lo.
9 Asinain Pathian thiang thlarau cu nan chung ah a um taktak ahcun pumsa duhnak ning in si loin thlarau lamhruainak ning in nan nung lai. Khrih lungput a ngei lomi paoh cu Khrih ta an si lo.
10 Khrih he lungthin khat tein nan um ahcun sualnak ruang ah pum cu thi ko hmanh seh law dinnak ruang ah thiang thlarau nih aan nunter hna.
11 Jesuh kha thihnak in a thawhtertu Pathian thlarau cu nan chung ah a um ahcun Khrih Jesuh thihnak in a thawhtertu Pathian nih nan chung ah a ummi a thiang thlarau hmang in a thi khomi nan pum kha a nunter lai.
12 Cucaah unau hna, pumsa duhnak kha zul in sualnak tuah lo awkah rian kan ngei.
13 Pumsa duhnak ning in nan nun ahcun nan thi hrimhrim lai. Asinain a ṭhalomi tuahsernak kha thiang thlarau bawmhnak in nan thah ahcun nan nung lai.
14 Pathian thiang thlarau lamhruainak a zulmi cu Pathian fale an si.
15 Nan hmuhmi thlarau cu ṭihnak a ngeihter ṭhantu sal sinak thlarau a si lo. Pathian fa ah a sertu ding thlarau a si. Mah thlarau nih Pathian kha “Abba,* ka Pa!” tiah a kan auhter.
16 Pathian fale kan si kha thiang thlarau theng te nih kan lungthin chung ah tehte a khaan.
17 Pathian fa kan si ahcun rocotu zong kan si. Pathian rocotu, Khrih rocohawi kan si. Khrih he sifah harnak kan inṭi ahcun sunparnak zong kan hmuṭi lai.
18 Atu kan inmi sifah harnak cu kan sinah phuan a si dingmi sunparnak he tahchunh ahcun zeihmanh a si lo tiah ka ruah.
19 Pathian fale phuan an si lai caan kha sermi thil* vialte nih i ngaih ngai in an hngah.
20 Zeicahtiah sermi thil hna cu santlailo pakpalawng an hung si, mah cu anmah duhnak ruang ah si loin cutin si awkah nawl a awnhtu Pathian duhnak ruang ah a si. Asinain ruahchannak tu cu a pek hna.
21 Mah cu sermi thil hi thutnak sal sinak in an luat lai i Pathian fale ngeihmi, sunparnak in a khatmi zalonnak kha an hmu lai timi a si.
22 Zeicahtiah sermi thil vialte cu atu caan tiang hmunkhat te ah sifah harnak tuar in an hrum, an ai ti kha kan hngalh.
23 Theitlai hmasa a simi, thiang thlarau a hmumi kanmah theng zong tlanhnak man thawng in taksa pum in kan luat lai i fa kan si lai caan kha i ngaih ngai in kan hngah lioah kan lungthin chung in kan hrum, kan ai ve.
24 Pathian nih sualnak in a kan khamh tikah mah ruahchannak kha kan hmuh. Mi pakhat nih aa ruahchanmi thil kha a hmuh cang ahcun mah thil cu i ruahchan a hau ti lai maw?
25 Asinain kan hmuh rih lomi thil kha kan i ruahchan ahcun inkhawhnak he i ngaih ngai in kan hngah ko lai.
26 Cu bantuk in thiang thlarau nih kan derthawm caan ah a kan bawmh. Thlacam awk a si ti cu kan hngalh ko nain zeidah cam ding ti kan hngalh lo caan a um tawn. Bia in chim khawh lomi kan hrum-ainak kha thiang thlarau nih kanmah aiawh in a kan nawlpiak.
27 Minung lungthin a dothlattu Pathian nih mithiang mi caah thiang thlarau nih a nawlpiakmi hna kha a hngalh. Zeicahtiah thiang thlarau nih Pathian duh ning in a nawlpiak hna caah a si.
28 Pathian nih amah a dawmi hna le aa tinhnak ning in a thimmi hna an ṭhatnak caah zeizong vialte kha ningcang tein a tuah ti kan hngalh.
29 Pathian nih a thim hnga dingmi hna kha a hramthawk tein a hngalh hna i a Fapa bantuk an si nakhnga bia a rak khiah. Cuticun a Fapa cu unau tampi lakah fater a si kho lai.
30 Pathian nih a hlankan in a thimmi hna kha a auh hna; mah a auhmi hna kha miding tiah a ti hna. Miding tiah a timi hna kha a donghnak ah sunparnak zong a pek hna.
31 Mah kong he aa tlaiin zeitindah kan chim lai? Pathian cu kanmahlei ah a ṭan ahcun aho nih dah a kan ralchanh khawh lai?
32 A Fapa hmanh zuah loin kan dihlak caah a kan pek ahcun thil dang vialte kha a kan pe chinchin hnga lo maw?
33 Pathian nih a thimmi hna cu aho nih dah sual an puh khawh hna lai? Pathian hrimhrim nih pei miding tiah a ti cang hna cu.
34 Aho nih dah sual a kan phawt lai? Ahohmanh nih a kan phaw lai lo. Zeicahtiah thihnak in a tho ṭhan i Pathian orhlei kam ah a ṭhumi Khrih Jesuh nih kan caah a kan nawlpiak.
35 Zeinihdah Khrih dawtnak he cun a kan ṭhen khawh lai? Harnak, lungretheihnak, hremnak, rawlṭamnak, thilpuan ngeih lonak, thil ṭihnung tonnak, vainam in tlerhkhonhnak nih maw?
36 “Nangmah ruang ah nifate thah an kan timh; thah dingmi tuu bantuk ah an kan rel” tiah cathiang ah aa ṭial bantuk khan a si.
37 Asinain a kan dawtu thawng in mah thil vialte kha kan tei khawh dih.
38 Zeicahtiah thihnak siseh, nunnak siseh, vancungmi siseh, nawlngeihnak siseh, atu thil siseh, a ra laimi thil siseh, ṭhawnnak siseh,
39 a sang siseh, a niam siseh, sermi thil siseh, zeihmanh nih kan Bawipa Khrih Jesuh thawng in langhtermi Pathian dawtnak he cun a kan ṭhen kho lai lo ti kha ka zumh.
Footnotes
^ Asiloah “sualnak a ngeimi kanmah bantuk minung pum in.”
^ “Ka Pa” ti sullam a ngeimi Hebru asiloah Aramaic biafang.
^ A hleiin minung kha a chim duhmi a si.
