Rom 9:1-33
9 Khrih zultu ka si caah biatak ka chim; ka chiaṭha thleidannak lungthin cu thiang thlarau nih lam a hruai caah lih ka chim lo.
2 Ka ngaih a chia tuk i lungfak in ka um camcin ko.
3 Ka miphun hawi a simi ka unau hna canah keimah tu Khrih he aa hlatmi, chiatserhmi si ka hei duh dah!
4 Annih cu Pathian nih fa ah a sermi Israel mi an si. Pathian nih sunparnak le Nawlbia a pek hna i anmah he biakamnak a ser. Amah biaknak tinvo sung le a biakam hna zong an hmu.
5 Annih cu kan pupa hna tefa an si i Khrih cu an chungchuak a si. Zeizong vialte uktu Pathian cu zungzal in thangṭhat si ko seh! Amen.
6 Mah cu Pathian bia a tling lo tinak a si lo. Zeicahtiah Israel phun in a chuakmi paohpaoh “Israel mi” taktak an si lo.
7 Abraham tefa a simi paoh in a fale taktak an si lo. “Na tefa tiah auh dingmi cu Isak chung in a chuak lai” tiah cathiang ah aa ṭial.
8 Chim duhmi cu thisa in a fale a simi paoh Pathian fale taktak an si lo. Biakamnak in a fale a simi lawng tefa tiah rel an si.
9 Zeicahtiah Pathian biakam cu hitihin a si: “Hmai kum atu bantuk caan ah ka ra ṭhan lai i Sarah nih fapa a hrin lai.”
10 Cu lawng cu a si lo, Rebekah nih kan pupa Isak he an ngeihmi faphir a rak pawi lio zong ah a si.
11 Mah faphir hna an chuah hlan le a chia, a ṭha zeihmanh an tuah hlan in Pathian nih ahodah ka thim lai ti kha a chimchung cang. Zeicahtiah mah pa i a tuahsernak cung ah i hngat loin thim a duhmi kha a thim ko.
12 Cucaah Pathian nih “Upa deuh cu ngakchia deuh pa sal a si lai” tiah Rebekah sinah a rak chim.
13 Cathiang ah “Jakob kha ka dawt, Esau tu cu ka huat” tiah aa ṭial bantuk khan a si.
14 Cu a si ah Pathian cu a ding lo tinak a si maw? A si hrimhrim lo!
15 Pathian nih Moses sinah “Zaangfah ka duhmi cu ka zaangfah ko hna lai i zawnruah ka duhmi cu ka zawnruah ko hna lai” tiah a rak ti.
16 Cucaah Pathian thimnak cu mi pakhat duhnak asiloah aa zuamnak cung ah i hngat loin zaangfahnak a ngeimi Pathian cung ah aa hngat.
17 Cathiang ah Faraoh he aa tlaiin “Nangmah thawng in ka ṭhawnnak langhter awk le vawleicung pumpi i ka min thanter awk hrimhrim ah kaan zuahmi a si” tiah aa ṭial.
18 Cucaah Pathian nih zaangfah a duhmi paoh kha a zaangfah hna i an lung hahter a duhmi paoh kha an lung hahnak nawl a awnh hna.
19 Cu a si ah “Pathian nih zeicah mi kha an sualnak a kawl rih kun? Aho nih dah Pathian duhnak cu a ralchanh khawh lai?” tiah nan ka ti lai.
20 Asinain Pathian bia a lettu ding ah nangmah cu ahodah na si? Tlak um nih a sertu kha “Zeicah hi bantuk hin na ka ser” tiah a ti hnga maw?
21 Um sertu nih tlak kha a duh ning paoh in sernak nawl a ngei, a si ko lo maw? Tlak hlum hlumkhat in a sunglawi in hmanmi um zong, a sawhsawh in hmanmi um zong a ser khawh, a si ko lo maw?
22 Pathian nih a thinhunnak le a ṭhawnnak kha langhter a duh ko, asinain hrawh awkah aa tlakmi, thinhunnak a ing dingmi um kha lungsau tein a in hna ah tah zeitin?
23 Pathian nih sunparnak pek awkah a timh chungmi, zaangfahnak a hmu dingmi um cung ah a liannganmi a sunparnak langhter awkah cutin a inmi hna a si ah tah zeitin?
24 Zaangfahnak a hmu dingmi um cu Judah mi chung lawng in si loin miphun dang chung zong in thimmi kanmah hi kan si.
25 Hosea cauk zong ah Pathian nih “Ka miphun a si lomi kha ‘ka miphun’ tiah ka ti hna lai. Ka dawt lomi nu kha ‘ka dawtmi nu’ tiah ka ti lai.
26 ‘Nannih cu ka miphun nan si lo’ tiah ti an rak sinak hmun hrimhrim ah khan ‘A nungmi Pathian fapale’ tiah ti an si lai” tiah a ti.
27 Mah leng ah Isaiah zong nih Israel mi he aa tlaiin hitin a rak ti: “Israel mi cu rilikam thetse zat in tam ko hna hmanh seh law a taangmi lawng khamh an si lai.
28 Jehovah* nih vawleicung i a ummi hna kha bia a ceih hna lai. Mah kha khulrang in a tuah lai i a liim lai.”
29 Isaiah nih a chimchung bantuk in “Vancung ralkapbu uktu Jehovah* nih tefa rak kan zuahpiak hlah seh law Sodom bantuk kan si cang hnga i Gomorrah he kan i lo cang hnga.”
30 Cu a si ah zeitindah kan chim lai? Miphun dang hna cu miding si awkah an i zuam lo nain an zumhnak ruang ah Pathian mithmuh ah miding an hung si.
31 Asinain Israel mi cu nawlbia zulhnak thawng in miding si awkah an i zuam nain nawlbia kha tling tein an zul kho lo.
32 Zeicah? Zumhnak in si loin tuahsernak in miding si awkah an i zuam caah a si. “Tlukrilhtertu lung” kha an i pah i an tlu.
33 Cathiang ah “Zoh hmanh! Zion ah tlukrilhtertu lung le dawnkhantu lungtum ka chiah. Mah lung a zummi paoh cu an lung a dong lai lo” tiah aa ṭial bang khan a si.
