JEHOVAH nih a caan ah a ngakchia i anmahle anmah aa kilveng kho lomi hna kha khuaruahhar lam in a huhphenh tawn hna. Khuatelei ah nan ke in nan kal tikah Jehovah huhphenh ning lamkhatkhat kha nan hmuh men lai. A hramthawk ahcun zeitindah ti kha nan hngalthiam men lai lo.

Nan pawng i vawlei ah vate a rak i futmi kha nan hmuh. Mah vate cu hma a pumi a lo. A pawng nan kal tikah a thla pakhat kha a hnuh in a hnuh i lamhlat deuhnak ah a kal. A hnu nan zulh tikah aa thawn colh. Cun ruahlopi in a zuang. A thla cu a zeihmanh a ti lo. Mah vate nih zeidah a tuah ti kha nan hngal maw?—

Mah vate a rak i futnak pawng i burbuk chungah a fale tete an um. Mah va nih a fanole kha nan hmuh lai i harnak nan pek sual hna lai ti a phang. Cucaah hma a pumi bantukin aa umter i lamhlat ah aan kalpimi hna a si. Vapi nih a fanole a huhphenh khawh hna bantukin kannih tah aho nih dah a kan huhphenh khawh ve ti kha nan hngal maw?⁠— Baibal nih Jehovah kha a fale a zohkhenhmi mupi he a tahchunh.​—Deuteronomi 32:11, 12.

Jehovah nih a dawt tukmi ngakchia cu a Fapa Jesuh kha a si. Jesuh cu vancung a um lioah a Pa bantukin a ṭhawng tukmi thlarau pum a si. Amahle amah kha aa huhphenh khawh. Asinain vawleicung ah ngakchia pakhat in hrin a si tikah amahle amah kha aa huppheng kho lo. Cucaah huhphenh a herh.

Jesuh kong he aa tlaiin vawleicung ah Pathian duhnak a tlin nakhnga mitling pakhat in a ṭhan a hau. Asinain cutin a si hlanah Satan nih Jesuh kha thah awkah aa zuam. A ngakchiat lio tein thah awkah aa zuam ning le Jehovah nih a huhphenh ning hna cu lung cawlcangh awk ngai a simi tuanbia an si. Mah kong kha hngalh nan duh maw?—

Jesuh hrin a si hnu tlawmpal ah Satan nih Nichuahlei van ah arfi bantukin a ceumi pakhat kha a chuahter. Arfi zohthiam pawl nih mah arfi hnu kha an zulh i meng za in aa hlatnak Jerusalem khua ah an phan. Cuka an phanh tikah Judah siangpahrang a si dingmi cu khoika ah dah a chuah tiah an hal hna. Mah kong he aa tlaiin Baibal kong a hngalthiammi kha an hal hna tikah ‘Bethlehem khua ah a chuak’ tiah an ti.​—Matthai 2:1-6.

Jerusalem khua i siangpahrang ṭhalo Herod nih Bethlehem khua pawngah siangpahrang a si dingmi ngakchia a chuak ti thawng a theih tikah arfi zohthiam pawl kha hitin a ti hna: “Va kal u law ngakchia kong kha ṭha tein va hlat u; cun nan hmuh tikah rak ka chim ṭhan u.” Herod nih Jesuh umnak kha zeicah hngalh a duh nan hngal maw?— Jesuh kha a nahchuah i thah a duh caah a si.

Pathian nih a Fapa kha zeitindah a huhphenh?— Arfi zohthiam pawl nih Jesuh kha an hmuh tikah laksawng an pek. A hnuah Pathian nih an mang ah Herod sin kir ṭhan lo dingin ralrin a pek hna. Cucaah Jerusalem ah kir ṭhan ti loin lam dang in an khualei ah an kir. Herod nih arfi zohthiam pawl cu an kir cang ti a theih tikah a thin a hung tuk. Jesuh kha thah a duh caah Bethlehem khua i kumhnih tang pa ngakchia vialte kha a thah dih hna. Asinain mah lio caan ah Jesuh cu Bethlehem khua ah a um ti lo.

Jesuh cu zeitindah a luat ti kha nan hngal maw?— Arfi zohthiam pawl an kir hnuah Jehovah nih Mary a va, Josef kha tho law Izipt ram ah zam u tiah ralrin a rak pek. Izipt ram ah Jesuh cu siangpahrang ṭhalo Herod kut in a rak luat. Kum tampi a rauh hnuah Josef nih Mary le Jesuh kha Izipt in a kirpi hna lio zongah Pathian nih Josef kha ralrin a rak pek ṭhan. Jesuh a him nakhnga Nazareth khua ah i ṭhial dingin a mang ah a rak chimh ṭhan.​—Matthai 2:7-23.

Jehovah nih a Fapa a huhphenh ning kha nan hmu maw?— Vapi nih burbuk chungah a thuhmi a fale bantukin maw asiloah a ngakchiat lioah Jesuh cu ahote he dah an i lawh tiah nan ruah? Nanmah bantuk a si ko lo maw?— Nannih zong harnak pek aan duhtu hna a um. Ahodah a si nan hngal maw?—

Baibal ah Satan cu kanmah seh duh ah a vak cuahmahmi chiandeih bantuk a si tiah a ti. Chiandeih nih saram hmetete kha seh awkah aa zuam bantukin Satan le a khuachia pawl zong ngakchia pawl kha tlaih awkah an i zuam. (1 Peter 5:8) Asinain Jehovah cu Satan nakin a ṭhawng deuh. Jehovah nih a fale kha a huhphenh khawh hna asiloah Satan nih harnak a pekmi hna kha a kham khawh.

Hi cauk i Ṭhen 10nak ah Satan le a khuachia pawl nih zei tuah awkah dah an kan lem ti kha nan i cinken ti maw?— A si, Pathian nih a palh tiah a timi nupa sualnak kha tuah awkah an kan lem. Ahote lawng nih dah nupa sinak kha an tuah awk a si?— A si, a cuza cangmi le aa ṭhium cangmi nu le pa lawng nih an tuah awk a si.

Asinain ngaihchiat awk ngai a simi cu upa cheukhat nih ngakchia he nupa sinak tuah kha an duh. Anmah pawl ruangah ngakchia nu le ngakchia pa hna nih upa sinin an cawnmi, a ṭhalomi thil kha an tuah ve. Mah ngakchia pawl nih an chiaṭha kha aa tlak lomi lam in an hman. Hlanlio Sodom khua zongah cutin a rak si. Baibal nih Sodom khuami pa vialte “a no he, a tar he” an dihlak in Lot sinah a rak lengmi pa hna he nupa sualnak tuah kha an duh tiah a ti.​—Genesis 19:4, 5.

Jesuh cu huhphenh a hauh bantukin nannih zong nanmah he nupa sinak tuah a duhmi upa le a dang ngakchia pawl kut in huhphenh nan hau. Cu bantuk mi hna cu nan hawile bantukin an i umter lai. Pakhatkhat an in pek hna lai i nanmah he tuah an duhmi thil kha aho sin hmanhah chim hlah u tiah an in ti hna lai. A tak ti ahcun annih cu anmah zawn lawng aa ruatmi le Satan le a khuachia pawl bantukin anmah nuamhnak lawng a kawlmi an si. Cu bantuk nuamhnak hmuh awkah ngakchia pawl he nupa sinak tuah dingin an i zuam. Mah cu a ṭha lo tukmi a si!

An i nuamh nakhnga zeidah an tuah khawh ti kha nan hngal maw?⁠— Nan chiaṭha kha an i tawnghthampiak hna lai. Asiloah an chiaṭha in nan chiaṭha kha an in hnorpiak hna lai. Asinain nan chiaṭha kha ahohmanh nan tawnghter hna awk a si lo. Nan ṭale, nan unule, nan nule le nan pale hmanh kha tawnghter hna hlah u. Mah thilri cu nanmah he lawng aa pehtlaimi a si.

Cu bantuk miṭhalo pawl kut in zeitindah naa kilven khawh?⁠— A hmasa bik ah nan chiaṭha kha ahohmanh tawnghter hna hlah u. Pakhatkhat nih tawngh dingin aa zuam ahcun hitin fakpi in nan au lai: “Tawng hlah! Kaan phuan lai!” Asinain mah pa nih nangmah ruangah a si tiah aan ti ahcun zum hlah. A chimmi cu a hmaan lo. Aho a si hmanhah phuang u. Mah pa nih mah kong hi na thuh lai, na chim lai lo aan ti zongah na phuan hrimhrim awk a si. Laksawng dawhte kaan pek lai asiloah pakhatkhat in kaan tuah lai tiah aan tlerh hmanhah amah kha hrial law a kong kha chim hna.

Nan ṭih a hau lo nain nan i ralrin a hau. Nan nu le nan pa nih ṭih a nungmi minung asiloah hmun hna ah kal lo dingin ralrin an in pek hna tikah nan ngaih lai. Cutin nan tuah ahcun harnak pek aan duhmi miṭhalo pawl cu caanṭha an hmu kho lai lo.