PATHIAN vancungmi pakhat cu zeicah Satan Khuachia a hung si ti kha naa cinken ti maw?— Biakmi si duhnak, mahzawn lawng ruahnak lungput a ngeih caah Pathian kha a ralchanh. A dang vancungmi tah Satan lei ah an ṭang ve maw?— An ṭang. Baibal nih annih kha ‘Satan vancungmi’ asiloah khuachia tiah a auh hna.⁠—Biathlam 12:9.

Mah a ṭha lomi vancungmi asiloah khuachia pawl nih Pathian kha an zum maw?— Baibal nih Pathian a um ti kha ‘khuachia zong nih an zumh ve ko’ tiah a ti. (Jeim 2:​19) Asinain atu ah ṭihnak in an khat. Zeicahtiah an tuahmi ṭhatlonak ruangah Pathian nih dan a kan tat lai ti kha an hngalh caah a si. Zei bantuk ṭhatlonak hna dah an tuah?—

Baibal nih mah vancungmi hna nih vancung kha kaltak in vawlei ah minung pum in an nung tiah a ti. Mah cu vawleicung i aa dawh tukmi nu pawl he nupa sualnak tuah an duh caah a si. (Genesis 6:​1, 2; Judas 6) Nupa umṭinak kong he aa tlaiin zeidah na hngalh?—

Nupa umṭinak timi cu nu pakhat le pa pakhat aa thleidangmi lam in umṭi kha a chim duhmi a si. Mah hnuah a nu paw chungah naute cu a hung ṭhang. Asinain vancungmi caah nupa umṭinak cu a palhmi a si. Pathian nih aa ṭhiummi nuva lawng nih nupa sinak kha tuah hna seh ti a duh. Cuticun ngakchia pakhat cu hrin a si tikah vale he, nupile he ṭha tein an zohkhenh khawh lai.

Vancungmi hna nih minung pum i lak in vawleicung nu pawl he nupa sualnak an tuahnak thawngin an hrinmi ngakchia pawl cu mikei an hung si. An puarhrang tuk i mi kha harnak an pek hna. Cucaah Pathian nih mah mikei pawl le miṭhalo pawl hrawh dih awkah buanchukcho a tlunter. Asinain Pathian nih a hmaanmi thil a tuahmi mi tlawmte kha khamh awkah Noah kha lawng nganpi a sakter. A Liannganmi Saya nih Buanchukcho lioah a cangmi kong i cinken cu a biapi tiah a ti.⁠—Genesis 6:3, 4, 13, 14; Luka 17:26, 27.

Buanchukcho a tlun tikah a ṭhalomi vancungmi hna cungah zeidah a cang ti kha na hngal maw?— Anmah tein an i sermi minung pum kha kaltak in vancung ah an kir. Asinain annih cu Pathian vancungmi an si kho ti lo. Cuticun Satan vancungmi asiloah khuachia an hung si. An fale mikei pawl tah zeitindah an um?— Buanchukcho ah an rak thi dih. Mah lengah Pathian bia a ngai lomi midang zong an thi dih.

Buanchukcho hnuin Pathian nih khuachia pawl kha minung he i loin i sernak nawl a pe ti hna lo. Khuachia pawl cu kan hmu kho hna lo nain minung nih thilṭhalo an tuah nakhnga an i zuam peng. A hlan nakin harnak tam deuh an chuahter. Vancung in vawlei ah thlak an si caah cutin an tuahmi a si.

Khuachia pawl kan hmuh khawh hna lonak a ruang kha na hngal maw?— Mit in hmuh khawh lomi thlarau pum an si caah a si. Asinain annih cu a nungmi an si ti kha fiang tein kan chim khawh. Satan nih ‘vawleicung mi vialte kha a hlen dih hna’ i a khuachia pawl nih an bawmh tiah Baibal nih a ti.​—Biathlam 12:9, 12.

Satan le a khuachia pawl nih kannih tah an kan hleng kho maw?— Kan i ralrin lo ahcun an kan hlen khawh. Asinain ṭih a hau lo. A Liannganmi Saya nih Khuachia cu ‘ka cungah nawlngeihnak zeihmanh a ngei lo’ tiah a ti. Cucaah Pathian he naih tein kan um peng ahcun Satan le a khuachia pawl kut in Pathian nih a kan huhphenh lai.​—Johan 14:30.

Khuachia pawl nih tuahter a kan duhmi ṭhatlonak kong hngalh cu a biapi tukmi a si. Cucaah mah hi ruathmanh. Khuachia pawl nih vawleicung an um lioah zei bantuk ṭhatlonak hna dah an tuah?— Buanchukcho a tlun hlanah nu pawl he nupa sualnak an tuah. Mah cu vancungmi nih an tuah awk a si lomi thil a si. Tuchan zongah mi nih nupa sualnak he aa tlaiin Pathian nawlbia an zulh lo tikah khuachia pawl cu an i nuam tuk. A si ahcun biahalnak tuah u sih, ahote lawng nih dah nupa sinak an tuah awk a si?— A hmaan, aa ṭhiummi nuva lawng nih an tuah awk a si.

Tuchan ah mino cheukhat nih nupa sualnak an tuah. Mah cu a palh. Baibal nih pa chiaṭha kong kha a chim. (Levitikas 15:​1-3) Nu thilri cu nu chiaṭha tiah auh a si. Jehovah nih cu bantuk thilri a serpiakmi hna cu aa ṭhiummi nuva hna an i nuamh nakhnga caah timi a hleikhunmi tinhnak he a si. Mi nih Jehovah thlauhmi thil an tuah tikah khuachia pawl cu an i nuam tuk. Tahchunhnak ah, nu pakhat le pa pakhat nih an chiaṭha kha an i tuaipiak ahcun khuachia pawl cu an i nuam. Khuachia pawl an i nuamhmi kha kan duh lo, a si ko lo maw?—

Khuachia pawl nih an duh i Jehovah nih a huatmi thil dang zong a um rih. Zeidah a si nan hngal maw?— Zaangennak a si. (Salm 11:5) Zaangennak timi cu midang kha puarhrangpi in pehtlaih le fahnak pek kha a chim duhmi a si. Khuachia pawl i an fale mikei pawl nih cutin an tuah ti kha philhhlah u.

Khuachia nih mi kha ṭihnak ngeih dingin an ṭhih hna. A caan ah mithi mi hna bantukin an i langhter. Mithi hna i an aw bantuk hmanhin an i cawiter khawh. Cuticun khuachia nih a thimi hna cu an nung rih i a nungmi hna he bia an i ruah kho tiah mi nih an zumh nakhnga an hlen hna. Mithla a um tiah mi nih an zumh nakhnga zong khuachia nih an tuah.

Cucaah Satan le a khuachia pawl nih an kan hlen nakhnga lo ralring tein kan um a hau. Baibal nih hitin ralrin a kan pek: ‘Satan hmanh nih pei ceunak vancungmi bantuk aa siter khawh cu. A salle zong nih cu bantukin an i siter ve.’ (2 Korin 11:14, 15) Asinain a taktak ti ahcun khuachia pawl cu a ṭha lo tukmi an si. Kannih zong anmah bantuk kan si nakhnga zeitindah an i zuam ti kha zohhmanh hna u sih.

Mi nih zaangennak, nupa sualnak kong le mithla kong kha khoika in dah tam bik an theih?— Mi cheukhat nih TV, baisikup, computer, video game, Internet le cauk pawl relnak in an theihmi a si, si ko lo maw? Mah thil hna nih Pathian he maw a naihter hna asiloah Khuachia he dah? Zeitindah na ruah?—

A ṭhalomi thil hna zoh le ngaih kha aho nih dah a duh tiah na ruah?— Satan le a khuachia pawl an si. Cucaah zeidah kan tuah a hau lai? Kan caah a ṭha dingmi thil le Jehovah biaknak ah a kan bawm dingmi thil hna kha kan zoh awk, kan ngaih awk le kan rel awk a si. Kan tuah khawhmi thilṭha cheukhat kong kha na ruat kho maw?—

Thilṭha kan tuah ahcun khuachia pawl kha ṭih awk a ruang a um lo. Jesuh cu khuachia pawl nakin a ṭhawng deuh, cucaah khuachia pawl nih an ṭih. Nikhat cu Jesuh kha khuachia pawl nih hitin an au hnawh: “Kanmah hrawh duh ah maw na rat?” (Marka 1:24) Satan le a khuachia pawl hrawh caan a phanh tikah kan i nuam tuk lai, a si ko lo maw?— Mah caan chungah Jesuh le vancung a Pa he naih tein kan um peng ahcun Jesuh nih a kan huhphenh lai ti kha kan zumh khawh.