MINUNG cu ri pakhat tiang hneksak an si tik, Pathian nawl an ngaih caah thilri chawvalei in zei ṭhatnak hmanh a hmu lomi an lawh tikah Pathian cungah zumhfek tein an um kho peng hnga maw? Mah biahalnak le a phi cu Job timi min a ngeimi pa pakhat he aa pehtlai.

Israel mi Izipt ram a um lioah Abraham i a rualchan a simi Job cu atu ah Arabia tiah auhmi ram ah a rak um. Mah lio caan ah vancungmi pawl cu Pathian hmaiah an i pum, an lakah ralchanhtu Satan zong a um ve. Jehovah nih zumhfekmi a sal Job a zumh kha vancungmi hna hmaiah a langhter. Job bantukin zumhawktlak tein a ummi minung ahohmanh an um lo tiah Jehovah nih a ti. Asinain Pathian nih Job cu thluachuah a pek i a huhphenh caah a biakmi a si tiah Satan nih sual a puh. Mah lengah Job ngeihmi thilri chawva vialte kha na lakpiak ahcun aan vawlhpamh ko lai tiah a ti.

Cucaah Pathian nih Satan kha a hmasa ah Job ngeihmi thilri chawva le a fale kha sunghter awk, mah hnuah a pum fahter awkah nawl a awnh. Job nih mah thil sining vialte ah Satan aa tel ti kha a hngalh lo caah mah hneksaknak hna tonter awkah Pathian nih zeicah a awnh hnga ti kha a hngalthiam lo. Asinain Job nih Pathian kha a kaltak bal lo.

Hawikom deu pathum cu Job sinah an ra. Bia an i ruahnak hna kha Job Baibal cauk ah aa ṭial. Job kha a thli tein sualnak na tuahmi a um caah Pathian nih dan aan tatmi a si ti zumhter awkah an i zuam. Pathian nih a salle kha mithmai ṭha a pe hna lo i a zum zong a zum hna lo ti hmanhin an chim. A hmaan loin cutin an chimmi kha Job nih a cohlang lo. Ka thih tiang ka zumhfeknak cu ka hlaw lai lo tiah Job nih fiang tein a rak chim.

Asinain Job a palhnak pakhat cu amahle amah a ding tuk in aa hmuhmi kha a si. Mino Elihu nih bia an i alnak kha a thawk in a dongh tiang a ngaih dih hnuah Job le hawikom deu pathum i an palhnak kha a remhpiak hna. Jehovah Pathian cungnung bik uktu a sinak cu mi pakhat i a dinnak langhternak nakin a biapi deuh ti kha Job nih a hngalhthiam lo caah Elihu nih a rak mawhchiat. Elihu nih Job i hawikom deu pathum zong kha fakpi in a rak mawhchiat hna.

Mah hnuah Jehovah Pathian nih Job kha a chawnh i a ruahnak a palhmi kha a remhpiak. Jehovah nih khuaruahhar a simi, sermi thil hna ah lungthin a pekter i Pathian i a lianngannak he tahchunh ahcun minung zeihmanh kan si lonak kha a cawnpiak. Pathian cawnpiaknak kha Job nih toidor tein a rak cohlan. Jehovah cu “zaangfahnak le zawnruahnak in a khatmi a si” caah Job kha ngandamnak a pek ṭhan, a hlan a rak ngeihmi thilri chawva nakin lethnih in a pek ṭhan i fa zong pahra thluachuah a pek ṭhan. (Jeim 5:​11) Job nih a fakmi hneksaknak hna lakah Jehovah cung zumhfek tein a umnak thawngin minung ahohmanh hneksaknak lakah Pathian cungah zumhfek tein an um kho lai lo timi Satan zuamcawhnak kha a rak lehrulh khawh.

​—Job Baibal cauk ah hrambunhmi a si.