U.S.A., California peng, Los Angeles khua i miṭhalo pawl le ritnak sii a hmangmi pawl an umnak a min a thangmi sang ah ka ṭhang. Unau paruk lakah pahnihnak ka si.

Ka nu cu evangelical church a si i mah bu ah um ve dingin a kan cawnpiak. Asinain kumhra fai ka si tikah nunning pahnih in ka nung. Zarhpi Ni ahcun church i hla a remhnak phu ah hla ka sa ve i nidang ahcun party ka kai, ritnak sii hna ka hmang i nupa sualnak zong ka tuah.

Kei cu ka thin a tawi tuk caah ka hmuhmi thil paoh i lakin puarhrang ngaiin tukvelhnak ah ka hman. Church cawnpiaknak hna cu ka caah zeihmanh san an tlai lo. Hitin ka ti tawn: “Lehrulhnak cu Bawipa rian a si​—kei cu a hriamnam ka si.” 1960 hnu siangsangruun ka kai lioah Pawlai Nak (Black Panthers) timi ramkhellei phu kha ka hun uar tuk. Annih cu ram mi covo ca duhlonak langhternak ah an min a thang. Kei zong rammi covo ca a dirpimi siangngakchia phu ah kaa tel ve. Duhlonak kan langhter fatin sianginn kha chikkhat an khar tawn.

Kei cu a puarhrangmi ka si caah duhlonak langhternak men in kaa lungsi lo. Cucaah a puarhrang tukmi zaangennak hna ka hun tuah. Tahchunhnak ah, United States ah Africa sal pawl fakpi in an rak hrem hnanak kong thlakmi baisikup kha ka hawile he kan zoh. A ding loin an hrem hna caah kan thin a hung tuk i baisikup a zohmi mirang mino pawl kha kan velh hna. Mah lengah mirang umnak sang ah kan va kal i kan hmuhmi mirang paoh kha kan velh hna.

Kum 20 leng ka si ah kan unau pathum in ṭhatlonak tampi kan tuah. Cucaah nawlngeitu pawl he kan buai. Ka naupa pakhat cu a min a thangmi lamcung misual phu ah aa tel i kei zong ka lut ve. Cuticun ka nunning cu a ṭhalo chinchin.

Ka hawikom pakhat i a nu le a pa cu Jehovah Tehte an si. Pumh an ka sawm caah ka zulh hna. Ka phanhle cangka Jehovah Tehte Hna cu midang he an i lo lo ti kha ka hun hmuh colh. An dihlak in Baibal an ngei i pumh lioah an kau i an rel cio. Mino tete hmanh pulpit cung in phung an chim. Pathian min cu Jehovah a si ti kha ka hun hngalh i mah min an hmanmi ka hmuh caah ka uar tuk. (Salm 83:18, NW) Mah ah miphun tampi an um ko nain miphun thleidannak um loin lungrual tein an um.

A hramthawk ahcun Jehovah Tehte Hna he Biabal cawn kha ka duh lo. Asinain an sinah i pumh cu ka duh. Voikhat cu Jehovah Tehte Hna sin kaa pumh zan ah ka hawile cu hlasak puai ah an kal. Kumhra fai pa pakhat kha a saphaw angki leng an hal i a pek hna lo caah an velh i a thi. A thaizing ah mi an thahnak kong kha uangthlar ngaiin an chim. Biaceihnak zung nih bia an ceih hna lio hmanhah zaangennak nganpi kan tuah timi ruahnak an ngei lo. Asinain tam deuh cu nunchung thong an thlak hna. Mah zan ah an sin i ka rak kal ve lomi cu ka ton ṭha tuk. Cucaah ka nunning kha ka thlen i Baibal cawn dingin biakhiahnak ka tuah.

Miphun thleidannak a fah tuk lioah Jehovah Tehte Hna cu lungrual tein an um. Mah cu zeitluk khuaruahhar awk dah a si. Tahchunhnak ah, mirang Jehovah Tehte pakhat khual a tlawn tikah a fale kha minak chungkhar nih an zohkhenhpiak. Umnak a ngei lomi minak ngakchiapa pakhat kha mirang chungkhar pakhat nih an inn ah an umter. “Pakhat le pakhat nan zawn nan i ruah ahcun mi vialte nih hi hna hi amah a zultu kha an si tiah an in hngalh hna lai” timi Jesuh bia ningin Jehovah Tehte Hna nih an zulh ti kha ka zumh cang. (Johan 13:35) A hmaanmi unaurual kha ka hmuh cang hna.

Baibal ka hlathlai tikah ka ruahnak thlen a hau ti kha ka hun hngalh. Ka lungput ka thlen lawngah ka thin kaa sum kho lai ti le mah cu a ṭha bikmi nunning a si ti kha ka hngalh. (Rom 12:2) Cuticun ka nunning cu aa tleng i 1974, January ah Jehovah Tehte pakhat in tipil ka ing.

Tipil ka in hnu hmanhah ka thin kaa sum kho rih lo. Tahchunhnak ah, innkhat hnu innkhat phungchim ka len lioah mifir pakhat nih ka mawṭaw chung i radio kha a fir. Ka dawi i ka tlaih khawh lai te ah radio kha a hlawnh i a tli. Mah kong ka chimh hna tikah Khrihfa upa pakhat nih “Stephen, mifir pa kha hei tlai kho law zeitindah na tuah lai?” tiah a ka hal. Mah biahalnak nih khua fakpi in a ka ruahter i mi he rualrem tein um khawh awkah ka hun i zuam.

1974, October thawkin thlakhat ah suimilam 100 chung ṭuanmi, midang sin Biabal cawnpiaknak rian kha caantling in ka ṭuan. A hnuah United States, New York, Brooklyn ah a ummi Jehovah Tehte Hna vawleicung pumpi zungpi ah rian bawmhnak caanṭha ka hmu. 1978 ah a zawmi ka nu zohkhenh dingin Los Angeles khua ah ka kir ṭhan. Mah hnu kumhnih ah Aarhonda he kan i um. Kan pahnih in ka nu kha a thih tiang kan zohkhenh. A hnuah Vennak Innsang Baibal Gilead Tinṭan kan kai i missionary in Panama ah rian pek kan si.

Tipil ka in hnu hmanhah puarhrangpi in lehrulh duhnak lungput ka ngei tawn. Mah tikah ka thin a ka huntertu pawl hrial awk le lungdai tein um khawh awkah kaa zuam a hau ti kha ka hngalh. Ka nupi i telin mi tampi nih cutin kaa zuammi kha an hmuh tikah an khuaruah a har tuk. Anmah cu chim lo, keimahle keimah hmanh ka khuaruah a har. Cutin kaa thlen khawhmi cu keimah ṭhawnnak ruangah si loin Baibal ruang tu ah a si.​—Hebru 4:​12.

Baibal ruangah ka nunnak cu sullam a hun ngei i ka lungthin zong a dai. Atu ahcun midang velh canah Pathian kong tu ka cawnpiak cang hna. Siangsangruun ka kai lioah kan i vel balmi ka hawipa hmanh Baibal ka cawnpiak cang. Tipil a in hnuah inn kan hlangṭi hna i kan umṭi hna. Atu tiang hawikom ṭha kan si peng. Ka nupi he minung 80 leng kha Baibal kan cawnpiak hna i Jehovah Tehte si dingin kan bawmh hna.

Sullam ngei tein ka nun khawh lengah a hmaanmi unaurual lakah nuam tein ka um khawh caah Jehovah cungah kaa lawm tuk.