ṬHEN 25

Mah tein di i riamternak ziaza kha zeitindah ka ngol khawh?

“Kumriat ka si in mah tein di i riamhter ka hmang cang. A hnuah mah ziaza he aa tlaiin Pathian hmuh ning kha ka hun hngalh. Mah a ṭhalomi thil ka tuah fatin ka ngaih a chia tuk. ‘Keimah bantuk minung hi Pathian nih zeitindah a ka dawt khawh lai?’ tiah ka ruat tawn.”​—Luiz.

NUNGAK, tlangval si ka ah nupa umṭi duhnak lungthin cu a hung ṭhawng tuk kho. Cucaah mah tein di i riamhter duhnak lungput na hun ngei kho. * Mi tampi nih mah ziaza cu a poi lo, “midang zong a hnorsuang lo” tiah an ti tawn. Asinain mah ziaza kan hrial awk a sinak a ruang ṭha a um. Lamkaltu Paul nih “nan chung i rian a ṭuanmi vawlei pum duhnak . . . hornak te hna . . . hi nan thah hrimhrim awk an si” tiah a ti. (Kolose 3:⁠5) Mah tein di i riamhternak nih nupa sual duhnak lungthin kha thah loin a ṭhawnter chin khawh. Mah kong zong hi ruat:

● Mah tein diriamter a hmangmi cu amah zawn lawng aa ruatmi a si. Cutin a tuah lioah a hmuhmi nuamhnak lawngah lungthin a pek.

● Amah he nupa sinak aa dangmi hna kha nupa umṭi duhnak lungput a ṭhawnter khotu thilri lawngin a hmuh hna.

● Mah tein diriamter a hmangmi hna cu anmah zawn lawng aa ruatmi an si caah nupi, va an ngeih tik hmanhah nupa sinak he aa tlaiin an di a riam kho lo.

Pumsa duhnak hrial khawh awkah mah tein di i riamhter nakin mahle mah i uk khawh awk tu ah i zuam. (1 Thesalon 4:​4, 5) Cutin tuah khawh awkah Baibal nih nupa si duhnak lungput a chuahter khomi thil sining hna kha hrial u tiah a kan forh. (Phungthlukbia 5:​8, 9) Asinain mah ziaza kha na ngol khawh lo ah tah zeitin? Naa zuamnak ah hlawhtlinnak na hmuh lo tikah ‘Kaa thleng kho ti lai lo. Pathian phunglam zong ka zul kho ti lai lo’ tiah na lung a dong lai maw? Pedro timi mino pa nih cutin a rak ruah. Hitin a ti: “Mah ziaza ṭhalo kha ka tuah ṭhan lengmang caah ka lung a rawk tuk. Zeitikhmanh ah ngaihthiam khawh ka si lai lo tiah ka ruah. Cucaah thla hmanh ka cam ngam ti lo.”

Nang zong cu bantuk ruahnak na ngeih ahcun ralṭhatnak ngei law na lung dong hlah. Mino he, upa he mi tampi nih mah ziaza kha an ngol khawh caah nang zong na ngol khawh ve ko lai.

Sualnak Ka Ngei Timi Ruahnak Hloh Khawh Ning

Mah ziaza a ngeimi hna nih sualnak ka ngei timi ruahnak an ngei tawn. Pathian duhnak he aa tlakmi “nan ngaihchiatnak” nih mah a ṭha lomi ziaza kha ngol khawh awkah thazaang aan ngeihter hna lai. (2 Korin 7:​11) Asinain nangmahle nangmah sual naa phawt peng ahcun na lung a dong lai i doh duhnak lungput na ngei ti lai lo.​—Phungthlukbia 24:10.

Cucaah a sining tein hmuhthiam i zuam. Mah tein di i riamhter cu a thurhnawmmi ziaza a si. Mah ziaza nih “pumsa duhnak le nuamhnak sal” aan siter khawh i a ṭhalomi duhnak kha a ṭhawnter khawh. (Titas 3:3) Asinain mah tein di i riamhternak cu a ṭha lo tukmi nupa sualnak tuah cu a si lo. (Judas 7) Cucaah mah bantuk ziaza na ngeih ahcun ngaihthiam khawh lomi sualnak ka tuah tiah ruat hlah. A biapi bikmi cu mah ziaza doh dingin le zeitikhmanh ah lungdongh lo dingin bia khiak.

Mah ziaza kha na tuah ṭhan ahcun na lung a dong ko lai. Cu bantuk caan ah Phungthlukbia 24:16 bia hi i cinken. Hitin a ti: “Zeicahtiah miṭha mi cu voi sarih tiang tlu hmanh sehlaw a tho ṭhan zau lai, sihmanhsehlaw miṭhalo cu vanchiatnak nih a hrawh hna.” Mah ziaza ṭhalo na tuah ṭhan ruangah misual na si tinak a si lo. Cucaah na lung dong hlah. Zeicah cutin ka tuah ṭhan ti kha ruat law tuah ṭhan ti lo awkah i zuam.

Pathian dawtnak le zaangfahnak kong kha a caan pe in ruat. A derthawmnak ruangah sualnak a tuahmi David nih hitin a ti: “Pale nih an fale an zaangfah hna bantuk khin BAWIPA nih amah a ṭihmi cu a zaangfah hna. Zei in dah ser kan si kha a hngalh i leidip men kan si kha a philh lo.” (Salm 103:13, 14) Jehovah nih kan tlinlonak kha a hngalhthiam i kanmah “ngaihthiam awkah timhcia tein a um.” (Salm 86:5, NW) Asinain kanmahlei zongin thlennak tuah awkah i zuam hna seh ti a kan duh. Cu a si ah mah ziaza kha ngol awkah zeidah na tuah khawh?

Nuamhsaihnak caah na tuahmi thil kha dothlat. Na zohmi baisikup, TV asiloah Web site hna nih nupa si duhnak lungput aan ngeihter maw? Baibal ṭialtu pakhat nih Pathian sinah fim ngaiin hitin thla a cam: “Santlailo thil kha biapi i ka rel [ka zoh, NW] sual nakhnga lo ka bawm.” *​—Salm 119:⁠37.

A dang kong tu ah lungthin pek i zuam. William timi Khrihfa mino pa nih hitin ruahnak cheuhnak bia a chim: “Nan ih hlanah Baibal le Baibal hrambunhmi cauk hna kha rel u. A biapi tukmi cu nan ih lai i hmanung bik nan ruahmi cu thlaraulei kong a si a hau.”​—Filipi 4:8.

Pakhatkhat sinah chim. Na ning a zah ruangah midang sinah chim kha naa harh ko lai. Asinain na chimh hnanak thawngin mah ziaza kha na ngol khawh. David timi Khrihfa mino pa nih hitin a ti. “Mah kong kha ka pa ka chimh. Ka pa nih a ka lehmi bia kha zeitikhmanh ah ka philh kho lo. Hmaipanh tein ‘na caah ka uangthlar tuk’ tiah a ka ti. Mah kong chim awkah zeitluk in dah kaa harh lai ti kha ka pa nih a hngalhthiam. Mah cu ka caah thazaang petu taktak a si. Cucaah lungdong loin i zuam peng awkah biakhiahnak ka tuah khawh.

“Ka pa nih Baibal a ka relpiak i ‘aa thleng kho lomi’ ka si lo ti kha hngalhthiam awkah a ka bawmh. Ka tuahsernak cu zeitluk in dah a ṭhat lo ti kha hngalh awkah a dang Baibal caang hna zong a ka relpiak. Cun ‘mah kong hi kan chim ti lai lo. Nangmahlei in na si khawh chungin i zuam. Na tuah ṭhan sual a si ahcun mah tikah kan i ruah ṭhan te lai. Na tuah ṭhan sual zongah na lung dong hlah’ tiah tha a ka pek. Ka pa nih ka derthawmnak kha a hngalh i a ka bawmh caah ka tha a um tuk.” *

A CHANGTU ṬHEN AH REL

Ahopaoh he nupa sualnak tuah kha zei rel loin kan um awk a si lo. Zeicah?

[A Tanglei Fianternak]

A BIAPIMI BAIBAL CAANG

“Tlanval lio pumsa duhnak kha zamtak i zuam hna law kan bawm ko tiah Bawipa sinah thla a cam lengmang mi hna he dinnak le zumhnak le dawtnak le daihnak kha kawl i zuam tuah u.”​—2 Timote 2:​22.

RUAHNAK CHEUHNAK

Nupa umṭi duhnak lungput a hun ṭhawn tuk hlanah Jehovah sinah thla cam. Lemsoinak tei khawh awkah Jehovah Pathian sinah “thil ti khawhnak ṭhawnnak” kha hal.​—2 Korin 4:7.

NA HNGAL MAW . . . ?

A derthawmmi nih cun nupa si duhnak lungput a hun ngeih tikah mah kha aa teiter. Asinain a lung a ṭhawngmi nih cun amah te lawngin a um lio hmanhah aa sum kho.

TUAH CHUNH!

A thiangmi thil ah lungthin ka pek khawh nakhnga ka tuah dingmi cu ․․․․․

Nupa umṭi duhnak lungthin kha i teiter canah ka tuah dingmi cu ․․․․․

Mah kong he aa tlaiin ka nu le ka pa sinah biahalnak tuah ka duhmi cu ․․․․․

ZEITINDAH NA RUAH?

● Jehovah cu “ngaihthiam awkah timhcia in a um” ti i cinken cu zeicah a biapit?​—Salm 86:5, NW.

● Nupa umṭi duhnak lungput ngeih dingin a kan sertu Pathian nih mah duhnak kha nan i sum awk a si tiah a ti caah Pathian nih na cungah zei zumhnak dah a ngeih?

[A tawinak in langhternak]

‘‘Mah ziaza kha ka ngol khawh caah Jehovah hmaiah a thiangmi chiaṭha thleidannak lungthin ka ngei. Mah cu zei thil he hmanh ka thleng kho lai lo.’’​—Sarah

[Hmanthlak]

Na tlik pah in naa tengh sual ahcun na tho lai i na tli ṭhan ko lai. Mah tein di i riamhternak a simi ziaza ṭhalo kha na tuah ṭhan ahcun lungdong loin ngol awkah i zuam peng