ṬHEN 37

Tipil ka in awk a si maw?

A hmaan, a hmaan lo kha thim:

Khrihfa si na duh ahcun tipil in a hau?

□ A hmaan

□ A hmaan lo

Tipil innak i a bik in aa tinhmi cu sualnak tuah lo dingin i kilvennak caah a si.

□ A hmaan

□ A hmaan lo

Tipil innak nih khamhnak aan hmuhter.

□ A hmaan

□ A hmaan lo

Tipil na in lo ahcun na tuahsernak he aa tlaiin Pathian nih bia aan ceih lai lo.

□ A hmaan

□ A hmaan lo

Ka hawile tipil an in caah kei zong ka in ve a hau.

□ A hmaan

□ A hmaan lo

PATHIAN phunglam ningin na nung, Pathian he a ṭhami pehtlaihnak na ngei i na zumhnak kong kha midang sin na chim ahcun tipil in awkah na ruah ko lai. Asinain tipil in awkah timhcia ka si cang ti kha zeitindah na hngalh khawh? A phi hngalh awkah a cunglei i langhtermi a hmaan, a hmaan lo kong kha i ruah hna u sih.

● Khrihfa si na duh ahcun tipil in a hau?

A hmaan. Jesuh nih a zultu pawl kha tipil in dingin lamhruainak a pek hna. (Matthai 28:19, 20) Amah theng zong tipil a rak ing. Cucaah Khrih zultu si awkah tipil in a hau. Asinain tipil in dingin sining tlinh khawh awkah nutling, patling na si a hau.

● Tipil innak i a bik in aa tinhmi cu sualnak tuah lo dingin i kilvennak caah a si.

A hmaan lo. Tipil in timi cu Jehovah sin naa pumpeknak kha zapi hmaiah na langhtermi a si. Pumpeknak timi cu a thli tein sualnak ka tuah lo timi biakamnak cabiahren a si lo. Jehovah phunglam ningin nun na duh caah Jehovah sinah na pum naa pekmi kha a si.

● Tipil innak nih khamhnak aan hmuhter.

A hmaan. Baibal nih nanmah aan khamhtu hna cu tipil innak kha a si tiah a ti. (1 Peter 3:​21) Asinain tipil innak cu leiser ral caah aamahkhaan in cawkmi phun a si lo. Tipil na inmi cu Jehovah na dawt ca le na lungthin dihlak in a rian ṭuan na duh caah a si.​—Marka 12:29, 30.

● Tipil na in lo ahcun na tuahsernak he aa tlaiin Pathian nih bia aan ceih lai lo.

A hmaan lo. Tipil in ruang le in lo ruangah si loin Jeim 4:​17 nih hitin a ti: “A ṭhami thil hi ka tuah awk a si tiah a hngal ko ṭung i a tuah lomi cu misual a si.” Cucaah a hmaanmi thil kha na hngalh i na nunnak kong he aa tlaiin ṭha tein khua na ruah khawh cang a si ahcun na nu le na pa asiloah hmuhtonnak a ngeimi Khrihfa pakhat he tipil innak kong kha i ruah u. Cuticun tipil in awkah zei hna dah tuah a hau ti kha na hngalh lai.

● Ka hawile tipil an in caah kei zong ka in ve a hau.

A hmaan lo. Tipil in ding timi biakhiahnak cu mah lungtho tein tuah dingmi a si. (Salm 110:3) Jehovah Tehte pakhat si awkah zeidah tuah a hau ti kha ṭha tein na hngalhthiam tik le mah ningin na tuah khawh tik lawngah na in awk a si.​—Phungchimtu 5:​4, 5.

Nunnak A Thlengmi Kehlan

Tipil innak cu thluachuah tampi a hmuhtermi thlennak pakhat a si. Mah lengah Jehovah sinah naa pumpek ningin nun awkah a biapi tukmi rian zong na ngei.

Tipil in awkah timhcia na si cang maw? Na si ahcun lunglawmh awk ngai a si. Na hmaiah a ṭha tukmi tinvo sung a um. Mah cu Jehovah caah lungthin dihlak in a rian ṭuan le naa pumpekmi ningin nun kha a si.​—Matthai 22:36, 37.

A HNU ṬHEN AH

Nunnak kha a ṭha bikmi lam in hman awkah zeitindah hmuitinh na chiah khawh ti kha hlathlai.

A BIAPIMI BAIBAL CAANG

“Pathian sinah a nung in pekchanhmi raithawinak bantukin i pe tuah u, a rian ah aa pumpemi le cohlan awk tlakmi si tuah u, cucu biaknak taktak Pathian nan pek awk biaknak cu a si.”​—Rom 12:1. 

RUAHNAK CHEUHNAK

Na nu le na pa bawmhnak in tipil in ding tiangin ṭhancho awkah aan bawm kho hngami pakhatkhat kha Khrihfabu chungah kawl hna.​—Lamkaltu 16:​1-3.

NA HNGAL MAW . . .?

Tipil innak cu khamhnak hmuhnak caah “hmelchunhnak” a si.​—Ezekiel 9:​4-6.

TUAH KHAWHMI!

Tipil in ding tiangin ṭhancho khawh awkah mah Baibal cawnpiaknak hna hi ka hngalhthiam a hau lai: ․․․․․

Ka nu le ka pa hal ka duhmi hna kong cu ․․․․․

ZEITINDAH NA RUAH?

● Tipil innak cu zeicah a biapimi kehlan pakhat a si?

● Mino pakhat nih zeicah khulrang in tipil in a duh khawh men?

● Mino pakhat nih i pumpek awk le tipil in awkah zeicah aa cungcang khawh men?

[A tawinak in langhternak]

“Tipil ka ing cang timi hngalhnak nih a hmaanmi biakhiahnak tuah awk le a ṭhalomi thil hna tuah lo awkah a ka bawmh.’’​—Holly

[Hmanthlak]

Tipil innak kong he aa tlaiin atu le atu an halmi biahalnak hna

Tipil in timi cu zei sullam dah a si? Ti chungah i hnim in chuah ṭhanmi cu keimah duhnak ningin ka nung ti lai lo, Jehovah duhnak ningin ka nung cang lai tinak sullam a si.

Jehovah sinah i pumpek timi cu zei sullam dah a si? Keimah ta ka si ti lo i zeizong vialte nakin Pathian duhnak kha hmasa bik ah ka chiah lai tiah biakamnak tuah kha a si. (Matthai 16:24) Tipil na in hlan, caan khatkhat ah Jehovah sinah thlacamnak in nangmahle nangmah naa pumpek awk a si.

Tipil na in hlanah zeidah na tuah awk a si? Pathian phunglam ningin na nun awk a si i na zumhnak kong kha midang sinah na chim awk a si. Cun thlacamnak le Baibal relnak in Pathian he pehtlaihnak ṭha ngeih awkah naa zuam a hau. Midang nih hnek ruangah si loin Jehovah rian ṭuan awkah nangmah tein naa thim awk a si.

Kum zeizat ah dah tipil na in awk a si? Kum cu a biapimi a si lo. Asinain pumpeknak i a sullam kha ṭha tein a hngalthiammi nutling, patling na si awk a si.

Tipil in na duh ko nain na nu le na pa nih hngak rih tiah an in ti ah tah zeitin? Na nu le na pa nih atu nakin a puitling deuhmi siter an in duh caah a si kho men. Ruahnak an in cheuhmi kha sunsak law mah caan chungah Jehovah he nan i hawikomhnak kha fehter chin.​—1 Samuel 2:26.

[Rinli Kulh]

Tuahchunhnak

Tipil in dingin khua na ruat maw?

A tanglei i biahalnak hna le a konglam hna hi hmangin na ṭhancho ning kha i dothlat. A phi na ṭial hlanah cherhchanmi Baibal caang hna kha rel hmasa.

Jehovah na zumh kha zeiti lam hna in dah na langhter?​—Salm 71:5. ․․․․․

Khuaruah khawhnak hmangin a hmaan, hmaanlo na thleidan khawhnak kha na langhter maw?​—Hebru 5:​14. ․․․․․

Atu le atu thla na cam maw? ․․․․․

Cuset khaset tiin thla na cam maw, thla na cam tikah zeitluk in dah Jehovah na dawt ti kha na phuang maw?​—Salm 17:6. ․․․․․

Thlacamnak he aa tlaiin hmuitinh chiah na duhmi kha ṭial. ․․․․․

Baibal hlathlainak hmaan tein na tuah maw?​—Joshua 1:8. ․․․․․

Zei kong hna dah na hlathlai? ․․․․․

Hlathlainak he aa tlaiin hmuitinh chiah na duhmi kha ṭial. ․․․․․

Na phungchim rianṭuannak cu hmual a ngei maw? (Tahchunhnak ah: Midang kha a hrampi Baibal cawnpiakmi kong na chim kho hna lai maw? Hngalh duhnak a ngeimi hna sinah na leng ṭhan hna maw? Baibal cawnpiaknak tuah awkah naa zuam maw?)

□ A ngei □ A ngei lo

Na nu le na pa an i tel lo hmanhah phungchim rian ah naa tel maw?​—Lamkaltu 5:​42.

□ Kaa tel □ Kaa tel lo

Phungchim rianṭuannak he aa tlaiin hmuitinh chiah na duhmi kha ṭial.​—2 Timote 2:​15. ․․․․․

Khrihfabu pumhnak ah hmaan tein naa pum maw asiloah a caancaan lawng ah dah naa pumh?​—Hebru 10:25. ․․․․․

Pumhnak ah zeiti lam hna in dah naa tel? ․․․․․

Na nu le na pa an i pumh khawh lo hmanhah an in awnh ahcun naa pum maw?

□ Kaa pum □ Kaa pum lo

Pathian duhnak tuahnak ah naa nuam maw?​—Salm 40:8.

□ Kaa nuam □ Kaa nuam lo

Ṭhirual hneknak na tonmi, cuset khaset timi a ruang cheukhat kha na chim kho lai maw?​—Rom 12:2. ․․․․․

Jehovah na dawtnak fehter peng awkah zei tuah dingin dah bia na khiah?​—Judas 20, 21. ․․․․․

Jehovah kha na nu le na pa le na hawile nih an biak ti lo hmanhah na bia peng lai maw?​—Matthai 10:36, 37.

□ Ka biak lai □ Ka bia lai lo

[Hmanthlak]

Ṭhitumnak bantukin tipil innak cu kan nunning a thlengmi kehlan pakhat a si caah a sawhsawh men in ruah awk a si lo