ṬHEN 35

Zeitindah Pathian hawikom ka si khawh?

Ngaihchiat awk a simi thil sining pakhat a ton hnuah Jeremy nih Pathian hawi sinak man a ngeih zia kha a hun hngalhthiam. Hitin a ti: “Kum 12 ka si ah ka pa nih a kan kaltak. Zankhat cu ka pa kha inn ah kirter ṭhan ko tiah Jehovah sinah thla ka cam.”

A ngaih a chiat tuk lioah Jeremy nih Baibal kha a hun rel. Salm 10:14 [NW] a rel tikah thazaang a hun ngei ṭhan. Mah Baibal caang ah Jehovah nih ‘bawmhnak a herhmi le nulepa a ngei lomi hna a bawmh hna’ tiah a ti. Jeremy nih hitin a ti: “Jehovah nih kaan bawmh lai tiah a ka timi bantukin ka ruah. Jehovah cu ka Pa le ka caah a ṭha bikmi Pa a si.”

JEREMY bantuk thil sining na ton zong, ton lo zongah Jehovah nih a hawi siter aan duh. Baibal nih “Pathian cu naih u law aan naih ve hna lai” tiah a ti. (Jeim 4:8) Mah kong hi ruathmanh: Mit in hmuh khawh lomi le tluktu a ngei lomi Jehovah Pathian nih nangmah he hawikom si ka duh tiah aan ti.

Asinain Pathian hawikom si na duh ahcun fakpi in naa zuam a hau. Tahchunhnak ah: Inn chungah thingkung na cin ahcun amah tein a ṭhang kho lai lo. Hmaan tein ti na toih a hau i ni le thli a hmuh khawh nakhnga zong na zohkhenh a hau. Pathian he hawikom sinak zongah cutin a si ve. Nan i hawikomhnak a feh chin nakhnga zeidah na tuah khawh?

Hlathlainak Cu A Biapi Tukmi A Si

Hawikom sinak ah pakhat le pakhat bia i ruahnak le bia i ngaihpiaknak aa tel. Pathian he hawikom sinak zongah cutin a si ve. Baibal relnak le hlathlainak cu Pathian bia kan ngaihmi he aa lo.​—Salm 1:​2, 3.

Hlathlainak tuah cu na huammi a si theng men lai lo. Mino tampi nih TV zoh, game i celh asiloah hawile he caan hmanṭi kha an duh deuh. Asinain Pathian he hawikom si na duh ahcun a lamhruainak ningin na zulh a hau. Baibal hlathlainak in Pathian chimmi bia kha na ngaih a hau.

Asinain na thinphang hlah. Baibal hlathlainak tuah cu thilrit a si lo. Hlathlainak tuah cu na huam phun a si lo hmanhah cutin tuahnak ah naa nuamh nakhnga na tuah khawh ko. A hmasa bik ah hlathlainak tuahnak caah a caan pek a hau. Lais timi mino nu pakhat nih “A caan suaimi cazin ka ngei. Zingka ka thawhle cangka Baibal dalkhat kha ka rel” tiah a ti. Kum 15 a simi Maria nih “ka ih hlanah Baibal kha ka rel” tiah a ti.

Hlathlainak program na thawk khawh nakhnga  cahmai 292 i rinli kulh ah zoh. Cun suimilam cheu hrawng Baibal hlathlai dingin cazin tuah.

․․․․․

Cazin tuahnak cu a hramthawknak lawng a si rih. Hlathlainak na hun tuah tikah Baibal rel cu a zungzal in cun a fawi lo ti kha na hngalh lai. Kum 11 a simi Jezreel nih “Baibal chung i a kong cheukhat cu lungthin pek awkah a har tuk i lung zong a tho lo” tiah a ti. Nang zong cu bantuk ruahnak na ngeih ve ahcun na lung dong hlah. Hlathlainak kha na hawi a simi Jehovah Pathian chimmi bia ngaihnak caanṭha in ruat. Cutin na tuah ahcun lungthawhnak na hun ngei lai i ṭhathnemhnak zong na hmu lai.

Thlacamnak Cu A Biapi Tukmi A Si

Thlacam timi cu Pathian he bia i ruah a si. Mah cu a ṭha tukmi laksawng a si. Jehovah Pathian sinah chun he, zan he zeitik caan paohah thla na cam kho. Pathian cu na thlacamnak ngaih awkah timhcia a si zungzal. Mah lawng si loin na chimmi bia zong kha ngaih a duh. Cucaah Baibal nih hitin tha a kan pek: “Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u.”​—Filipi 4:6.

Mah Baibal caang nih a chim bantukin Jehovah sinah zei kong paoh chim khawh a si. Buaibainak le lungretheihnak na ngeihmi kong zong na chimh khawh. Cun naa lawmhnak kong zong na chimh khawh. Aan bawmmi na hawile cungah naa lawm tuk a si ko lo maw? Na ngeihmi hawikom vialte nakin aan bawm kho biktu Jehovah sin zongah naa lawmhnak kong kha chim.​—Salm 106:1.

Jehovah cungah naa lawmhnak kong kha a tanglei ah ṭial.

․․․․․

A caan ah lungretheihnak le ṭihnak na ngei men ko lai. Salm 55:22 nih hitin a ti: “Na thilrit cu BAWIPA sinah ṭhumta law amah nih aan bawmh lai; miṭha cu zeitikhmanh ah a sunghter bal lai lo.”

Thlacamnak in phuan na duhmi na lungretheihnak kong kha a tanglei ah ṭial.

․․․․․

Pumpak hmuhtonnak

Jehovah he hawikom sinak ah zei rel loin na um lo awk a si lomi thil pakhat a um. Salm caṭialtu David nih hitin a ti: “BAWIPA hi zeitluk in dah a ṭhat ti kha nanmah tein va kawl cio hmanh u.” (Salm 34:8) David nih thil ṭihnung a ton hnuah Salm 34 hi a ṭialmi a si. Siangpahrang Saul kut in a zam lioah a ṭialmi si. An ral a simi Filistin mi hna sinah a rak i dor. Cun mihrut bantukin a rak i umter caah a nunnak cu a rak luat.​—1 Samuel 21:10-​15.

David nih ka thluak ka hman caah ka luatmi a si tiah a ruat lo. Jehovah ruangah ka luat tiah a ti. A cunglei ah langhtermi salm cauk ah hitin a ti: “BAWIPA sinah cun thla ka cam i a ka leh; ka ṭihmi thil vialte in a ka luatter.” (Salm 34:4) Amah theng nih a tonmi thil a si caah David nih midang kha “BAWIPA hi zeitluk in dah a ṭhat ti kha nanmah tein va kawl cio hmanh u” tiah a forh khawhmi hna a si. *

Na nunnak ah Jehovah nih a ka zohkhenh ko ti a langhtertu thil na tong bal maw? Na ton ahcun mah kong kha a tanglei ah ṭial. Tahchunhnak: Na philh khawh lomi hmuhtonnak. Nitin na nunnak ah na hmuhmi, a ruah awk na hngalh lomi thluachuah kong zong ruat.

․․․․․

Na nu le na pa nih Baibal kong an in cawnpiakmi a si kho men. Mah cu thluachuah a si. Asinain Pathian he nan i hawikomhnak a feh chin nakhnga naa zuam peng a hau. Cutin na tuah rih lo ahcun hi capar i aa telmi kong hna nih cutin thawk khawh awkah aan bawmh lai. Jehovah nih naa zuamnak cungah thluachuah aan pek lai. Baibal nih hitin a ti: “Hal u law an in pek hna lai, kawl u law nan hmuh lai, king u law innka cu an in hunpiak hna lai.”​—Matthai 7:7.

MAH KONG KHA TAM DEUH IN HNGALH NA DUH AHCUN UK 1NAK, ṬHEN 38 LE 39 AH REL

A HNU ṬHEN AH

Midang sinah Pathian kong chim cu a fawi lo. Na zumhnak zeitindah na kilven khawh timi kong kha hlathlai.

[A Tanglei Fianternak]

A BIAPIMI BAIBAL CAANG

“Mi chambau kan si ti aa hngalmi cu, lunglawmmi nan va si dah.”—Matthai 5:3.

RUAHNAK CHEUHNAK

Nifatin Baibal kha cahmai pali hrawng in rel. Cutin na tuah ahcun kumkhat chungah a uk ningin na rel khawh lai.

NA HNGAL MAW . . . ?

Mah cauk hi na rel i Baibal ruahnak cheuhnak na zulh tikah Jehovah cu na cungah siaherhnak a ngei i aan zohkhenh tinak a si.​—Johan 6:​44.

TUAH KHAWH NING

Pumpak Baibal hlathlainak in ṭhathnemhnak tam deuh hmuh awkah ․․․․․

Hmaan tein thlacam awkah ․․․․․

Ka nu le ka pa hal ka duhmi hna kong ․․․․․

ZEITINDAH NA RUAH?

● Baibal relnak ah naa nuamh deuh nakhnga zeidah na tuah khawh?

● Mitlinglo a simi minung thlacamnak kha Jehovah nih zeicah ngaih a duh?

● Na thlacam ning kha zeitindah na ṭhanchoter khawh?

[A tawinak in langhternak]

‘‘Ka ngakchiat lioah ka thlacamnak cu aa khat peng. Atu cu nitin ka tonmi a ṭhami le a ṭha lomi kong hna kha ka cam chih cang. Nikhat le nikhat cu aa lawh lo caah thla ka cammi kong zong aa lo ti lo.’’—Eve

[Hmanthlak]

 Baibal ah hlathlai

1. Rel na duhmi kong kha thim. Na hngalhthiam khawh nakhnga thlacam.

2. A konglam kha ṭha tein rel. Khulrang tuk in rel hlah. Na rel tikah na mitthlam ah cuanter. An cawlcangh ning kha ruat. An aw kha na hna thlam ah i theihter, a rim kha hnim law an rawl a thawtnam kha tep chunh. Cun a konglam hna kha a cang taktakmi bantukin siter.

3. Na relmi kong kha ruat ṭhan. A tanglei bantukin i hal:

● Mah a konglam hna hi zeicah Jehovah nih Baibal ah a langhter?

● Ahote dah zohchunh awk ṭha an si i ahote dah ralrin petu an si?

● Mah ka relmi kong in zeidah ka cawn khawh?

● Mah kong nih Jehovah le a thil tuahning he aa tlaiin zeidah a ka cawnpiak?

4. Jehovah sinah tawi tein thla cam. Baibal hlathlainak in zei kong hna dah na hngalh i na nunnak ah zeitindah na hman lai timi kong hna kha cam. Cun Jehovah pekmi Baibal cung i naa lawmhnak kong zong chim peng.

[Hmanthlak]

“Na bia cu ka ke caah mei-inn a si, ka lam ah ceunak a si.”​—Salm 119:105.

[Hmanthlak]

A biapi deuhmi thil kha biapi bik ah chia

Thlacam awkah i manh lo tiangin na um maw? Baibal hlathlai awkah a caan ngeih loin na um maw? Mah cu biapi ah na chiahmi thil cungah aa hngat tawn.

Mah lam ningin tuah chunh: Balṭin pakhat kha la, cun lung kha rawng law mah hnuah thetse kha rawng hmanh. Cutin na tuah ahcun lung he, thetse he aa tlum lai.

Atu balṭin kha thle law thetse kha rawng hmasa, mah hnuah lung kha rawng hmanh. Lung cu aa tlum ti lai lo. A ruang cu thetse kha na rawn hmasa caah a si.

Mah in zeidah na cawn khawh? Baibal nih hitin a ti: “A biapi deuhmi thil kha hngal.” (Filipi 1:​10, NW) Hrimhnak ti bantuk a biapi tuk lomi thil kha pakhatnak ah na chiah ahcun a biapimi thlaraulei thil caah a caan na ngei ti lai lo. Asinain Baibal ruahnak cheuhnak kha na zulh ahcun thlaraulei thil tuahnak le hrimhnak tuahnak caah a caan na ngei kho lai. Balṭin chungah zeidah na rawn hmasa timi cungah aa hngatmi a si.

[Hmanthlak]

Inn chungah cinmi thingkung bantukin Pathian he kan i hawikomhnak zong ṭha tein kilven a hau