‘Ka Cawnpiaknak Kha Zul’ U

“Ka cawnpiaknak kha nan zulh ahcun a ka zultu taktak cu nan si, biatak cu nan hngalh lai i biatak nih cun aan luatter hna lai.”​—JOHAN 8:31, 32.

Zei Sullam Dah A Si?: Jesuh “cawnpiaknak” cu Jehovah sinin a rami a si. Cucaah Jesuh nih “ka chimmi cu a ka thlahtu ka Pa nih na chim lai tiah a ka fialmi kha an si” tiah a ti. (Johan 12:49) Vancung ah a ummi a Pa, Jehovah Pathian sin thla a cam tikah “biatak cu nangmah bia kha a si” tiah a ti. Jesuh nih a cawnpiaknak a hmaan ti langhter awkah Baibal kha atu le atu a rak cherhchan. (Johan 17:17; Matthai 4:4, 7, 10) Cucaah a hmaanmi Khrihfa hna nih Jesuh ‘cawnpiaknak kha an zulh.’ Mah cu Jesuh bantukin Baibal kha “biatak” in an cohlan i an zumhnak le an tuahsernak cu a bik in Baibal ah hram aa bunh.

A Hmasa Khrihfa Hna Nih Zeitindah An Rak Tuah?: Baibal cauk tam bik a ṭialtu lamkaltu Paul zong nih Jesuh bantukin Baibal kha a upat. ‘Cathiang hi a dihlak in Pathian thaw chuahhnawhmi a si caah a ṭhahnem’ tiah a ti. (2 Timote 3:​16) Khrihfa pawl cawnpiak awkah rian pek a simi pa hna nih “a hmaan i zumhawktlak a simi Pathian Bia kha fek tein an i tlaih” a hau. (Titas 1:7, 9, The Amplified Bible) A hmasa Khrihfa hna cu “Khrih chungin si loin van le vawlei uktu thlarau hna sinin le minung nih pakhat le pakhat an i cawnpiak chin lengmangmi chungin a chuakmi minung fimnak, santlaihnak zeihmanh a ngei lomi fimnak, hlennak menmen a simi” kha hlawt dingin forh an rak si.​—Kolose 2:8.

Tuchan Ah Ahote Nih Dah Cutin An Tuah?: Catholic biaknak cauk (Catechism of the Catholic Church) nih hitin a ti: “Catholic zumhnak cu Baibal le phungphai cungah hram aa bunhmi an si. Cucaah phunglam hna kha Baibal tlukin kan sunsak.” Canada, Toronto khua i Khrihfa cawnpiaktu nu pakhat chimmi bia kha cherhchan in Maclean mekazin nih capar pakhat ah hitin an langhter: “Baibal chungah a ummi Jesuh cawnpiaknak hna ruangah a ṭha tukmi kan ruahnak hna cu a rawk dih. A luancia kum thonghnih lio i chimmi Jesuh bia cu zeicah kan ngaih lai?”

Jehovah Tehte Hna kong he aa tlaiin cauk pakhat (New Catholic Encyclopedia) nih hitin a ti: “An zumhnak le an tuahsernak phunglam hna cu Baibal cung lawngah hrambunh dingin ri an khiah.” Tahchunhnak ah, Canada ram ah nu pakhat nih pa pakhat kha kei cu Jehovah Tehte ka si tiah a ti tikah mah pa nih Jehovah Tehte nu nih aa putmi Baibal kha a sawh i “naa putmi cauk zohnak in ahodah na si ti kha ka hngalh ko” tiah a ti.