“Na Min Cu Ka Langhter Cang”

“Hi vawlei chungin na kawhmi hna i na ka pekmi hna sinah hin na min cu ka langhter cang. . . . Nangmah [na min, NW] kong cu annih kha ka hngalhter hna i ka hngalhter ṭhan lengmang ko hna lai.”​—JOHAN 17:6, 26.

Zei Sullam Dah A Si?: Jesuh nih phungchimnak ah Pathian min a hmannak thawngin a rak hngalhter hna. Jesuh nih a tuah tawn bantukin Baibal a rel tikah Pathian pumpak min kha a hman lai ti cu a fiang ko. (Luka 4:​16-​21) A zultu pawl zong kha “Kan Pa, Na min thiang cu upat si ko seh” tiah thlacam dingin a rak cawnpiak hna.”​—Luka 11:2.

A Hmasa Khrihfa Hna Nih Zeitindah An Rak Tuah?: Lamkaltu Peter nih Jerusalem i upa pawl kha Pathian nih ‘anmah [Jentail mi] lakin amah min putu dingah mi aa thim hna’ tiah a ti. (Lamkaltu 15:14) Lamkaltu pawl le Khrihfa pawl nih “Bawipa min a aumi paoh cu khamhnak an hmu lai” tiah phung an chim. (Lamkaltu 2:​21; Rom 10:13) Mah lengah an ṭialmi Baibal cauk zongah Pathian min kha an rak hman. Khrih a chuah hnu, kum 300 hrawngah ṭial an rak liimmi Judah nawlbia vialte fonhmi (The Tosefta) timi ah Khrihfa Baibal a ralchanhtu hna nih Baibal mei in an khangh i an hrawhnak kong he aa tlaiin hitin a ti: “Evangelist bu nih chuahmi cauk pawl le [Judah mi Khrihfa hna tiah ruahmi] minim pawl i an cauk  cu mei in khanghpiak an rak si. Mah an khanghmi cauk hna ah Pathian Min aa telnak cherhchanhmi hna zong aa tel.” 

Tuchan Ah Ahote Nih Dah Cutin An Tuah? United States i Khrih Church Council nawl peknak in chuahmi holh lehmi Baibal (Revised Standard Version) i biahmaiṭhi ah hitin a ti: “A dang pathian hna an um caah a hmaanmi Pathian pakhat kha anmah he thleidan a hauh bantukin pumpak min hmannak nih Khrihfa chan hlan, Judah mi hna chan ah a dongh lawng si loin vawleicung pumpi i Khrihfa Church zumhnak he zong aa tlak hrimhrim lo.” Cucaah Pathian min canah “BAWIPA” tiah an airolh. Nai ah Vatican nih bishop pawl kha hitin lamhruainak a pek hna: “Hla cauk le thlacamnak cauk hna ah Pathian min a simi YHWH * timi Hebru biafang pali kha hman a hauh ti lo bantukin a aw chuah in rel zong a hau ti lo.”

Tuchan ah ahote nih dah Pathian pumpak min kha mi zapi hngalh in an hman? Kyrgyzstan ah a ummi, kumhra fai a simi Sergey timi pa nih Pathian min Jehovah tiin langhtermi baisikup pakhat kha a rak zoh. Mah hnuin Pathian min a theih ti lonak cu kumhra hrawng a rau cang. United States aa ṭhial hnuah Jehovah Tehte pahnih cu a inn ah an ra i Pathian min kha Baibal in an hmuhsak. Jehovah timi min a hmangmi phu pakhat he an i ton caah Sergey cu aa nuam tuk. Dictionary pakhat (Webster’s Third New International Dictionary) ah “Jehovah Pathian” cu “Jehovah Tehte Hna lawng nih an cohlan i an biakmi a liannganmi khuazing pathian” a si tiah sullam an fiantermi cu hngalh duh awk ngai a si.

[A Tanglei Fianternak]