‘Pakhat Le Pakhat I Daw U’

“Nawlbia thar kaan pek hna: pakhat le pakhat i daw u. Keimah nih kaan dawt hna bantuk hin pakhat le pakhat nan i dawt awk a si. Pakhat le pakhat nan zawn nan i ruah ahcun mi vialte nih hi hna hi amah zultu kha an si tiah an in hngalh hna lai.”​—JOHAN 13:34, 35.

Zei Sullam Dah A Si?: Jesuh nih a zultu pawl kha amah nih a dawt hna bantukin pakhat le pakhat i daw u tiah a ti hna. Jesuh nih zeitindah a dawt hna? A chan lioah Judah mi nih miphun dang le nu pawl kha an nautat hna nain Jesuh nih cun mi vialte kha a dawt hna. (Johan 4:​7-​10) Jesuh nih cu bantuk dawtnak a ngeih caah midang bawmhnak caah a caan le a thazaang kha a rak hman. Mah lengah aa dinh caan hmanh kha midang bawmhnak caah a rak hman. (Marka 6:​30-​34) A donghnak ah Jesuh nih a ngan bikmi lam in dawtnak kha a rak langhter. Jesuh nih “tuukhal ṭha cu keimah hi ka si. Tuukhal ṭha cu a tuu hna caah a lu hloh kha a sian” tiah a ti.​—Johan 10:11.

A Hmasa Khrihfa Hna Nih Zeitindah An Rak Tuah?: Kumzabu pakhatnak i Khrihfa pawl cu unau bantukin an i dawt caah pakhat le pakhat kha “unaupa” asiloah “unaunu” tiah an i au. (Filemon 1, 2, NW) Miphun zakip chungin mi pawl cu Khrihfabu chungah luh dingin sawm an rak si. A ruang cu “Judah mi le Jentail mi tiin i thleidannak zeihmanh a um lo; Pathian cu kan dihlak Bawipa a si” ti kha an cohlan caah a si. (Rom 10:​11, 12) Kumzabu pakhatnak i Jerusalem ah a ummi zultu pawl nih “an thil le an ngeihmi kha an zuar hna i tangka an hmuhmi kha a dihlak in an herh ning cio paohin an i phaw.” Zeicah cutin an tuah? Tipil a ingkami zumtu pawl kha Jerusalem ah um rih in “lamkaltu hna cawnpiaknak” an ngaih khawh nakhnga caah a si. (Lamkaltu 2:​41-​45) Cutin tuah awkah zeinihdah a forh hna? Lamkaltu pawl an thih hnu, kum 200 hrawngah Baibal lei mifim Tertullian nih Khrihfa pawl kong he aa tlaiin mi nih an chimmi kha hitin a cherhchan: ‘Zeitluk in dah an i dawt ti ahcun pakhat le pakhat caah an nunnak pek hmanh an sian.’

Tuchan Ah Ahote Nih Dah Cutin An Tuah? Cauk pakhat (The History of the Decline and Fall of the Roman Empire [1837]) nih kumzabu tampi chung Khrihfa ka si tiah aa timi hna cu “pakhat le pakhat puarhrangpi in an i pehtlai. An puarhran ning cu [zumlotu pawl] nakhmanh in a zual deuh” tiah a ti. Nai i US ah tuahmi hlathlainak ningin biaknaklei ah aa zuammi, a hleiin Khrihfa ka si tiah aa timi mi tam deuh nih miphun thleidannak an ngeihmi kha hmuh khawh a si. Ram pakhat i Khrihfabu chungmi hna cu a dang ram pakhat i an Khrihfabu aa khatmi hna he pehtlaihnak an ngeih theng lo caah bawmhnak an herh tikah an i bawm kho lo asiloah bawmh duhnak lungput zong an ngei lo.

2004 ah Florida ah thlahnih chungah hurricane thlichia aa peh in voili tiang a hran hnuah Florida Lakhruak In Rianṭuannak Kawmiṭi hruaitu nih bawmhnak an pekmi hna thilri pawl ningcang tein hman a si le si lo hngalh awkah a rak check ṭhan. Jehovah Tehte Hna bantukin ningcang tein thil a tuahmi zei bu hmanh an um lo tiah a ti i Jehovah Tehte Hna nih an herhmi thilri kha a rak bawmh hna. 1997 a hramthawklei ah sii, rawl le thilpuan a phormi Jehovah Tehte Hna i Har Tongmi Hna Bawmtu Phu cu Democratic Republic of Congo ah a ummi Jehovah Tehte Hna le a dang bawmh a herhmi hna bawmh awkah an va kal. Europe ah a ummi Jehovah Tehte Hna nih US dollar nuaikhat man a simi bawmhnak thilri pawl an pek hna.