‘Vancung Pennak Kong Thawngṭha Hi Chim A Si Lai’

“Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai—cun cu hnu lawngah cun donghnak cu a si lai.”​—MATTHAI 24:14.

Zei Sullam Dah A Si?: Thawngṭha Cauk ṭialtu Luka nih hitin a ti: “Jesuh cu khuapi he, khuate he a tlawng duahmah hna i Pathian Pennak kong Thawngṭha kha a chimh hna.” (Luka 8:⁠1) Jesuh theng zong nih hitin a ti: “Pathian Pennak kong Thawngṭha kha khua dang zongah ka chim hrimhrim awk a si, cu chim ah cun pei Pathian nih a ka thlah cu.” (Luka 4:​43) Jesuh nih a zultu pawl kha khuapi le khuate ah thawngṭha chim dingin a thlah hna i hitin a hna: “Vawleicung khuazakip ah ka tehte nan si lai.”​—Lamkaltu 1:8; Luka 10:1.

A Hmasa Khrihfa Hna Nih Zeitindah An Rak Tuah?: A zultu pawl nih Jesuh nawl pekmi ningin a caan sawksam loin an rak tuah colh. “Nifate in biakinn chung le mi innkip ah Messiah a simi Jesuh kong Thawngṭha kha an cawnpiak hna i an chimh lengmang hna.” (Lamkaltu 5:​42) Phungchim rian cu phu pakhat lawng nih si loin Khrihfabu chungmi dihlak nih ṭuan dingmi a si. Tuanbialei mifim Neander nih hitin biachahnak a tuah: “Khrihfa biaknak a ralchanhmi, hmasa bik caṭialtu Celsus nih tuu hmul a metmi, phanah a ṭhimi, saphaw a cuarmi, ca a thiam lomi le mi sawhsawh pawl cu lungtho tein thawngṭha a chimmi an si tiah a rak nihsawh hna.” Jean Bernardi nih a cauk (The Early Centuries of the Church) ah hitin a ṭial: “[Khrihfa hna] cu leng ah an chuak i khoika hmun paohah, mikip kha phung an chimh hna. Lampi cungah siseh, khuachung ah siseh, mi tampi umnak le innkip ah siseh phung an chim. Mi nih an cohlan zong, cohlan lo zongah phung an chim. . . . Vawleicung pumpi ah an chim.”

Tuchan Ah Ahote Nih Dah Cutin An Tuah? Anglican tlangbawi David Watson nih hitin a ṭial: “Tuchan ah church pawl nih phungchimnak le cawnpiaknak kha biapi ah an chiah lonak a ruang pakhat cu Pathian rian ṭuan an huam lo caah a si.” José Luis Pérez Guadalupe nih Evangelist, Adventist le a dang biaknak hna i an tuahsernak kha a zoh i “annih cu innkhat hnu innkhat ah kal in phung an chim lo” tiah a cauk (Why Are the Catholics Leaving?) ah a rak ṭial. Asinain Jehovah Tehte Hna tu cu “innkhat hnu innkhat ah kal in ningcang tein phung an chim” tiah a ti.

Hngalh duh awk ngai a si i a tlarimi zong a simi Jonathan Turley a ruahnak kha cauk pakhat (Cato Supreme Court Review, 2001-​2002) ah hitin a langhter: “Pakhatkhat nih Jehovah Tehte Hna kong a chim tikah mi tampi nih an i manh lo caan ah an inn ah ra in phung a chimmi in an hmuh colh men hna lai. Jehovah Tehte Hna nih cutin innkhat hnu innkhat ah phung an chimmi cu an zumhnak kong chim an duh ca lawngah si loin an zumhnak a feh chin nakhnga ca zongah a si.”

[Rinli Kulh]

A Hmaanmi Khrihfa I An Hmelchunh Cu Zeidah A Si?

Hi aa tlaimi capar hna nih a langhtermi Baibal phunglam cungah hrambunh in tuchan ah ahote nih dah mah ningin an zulh tiah na ruah? Khrihfa ka si aa timi bu thong tampi a um ko nain Jesuh nih a zultu sin a chimmi mah bia hi i cinken: “‘Bawipa, Bawipa,’ tiah a ka timi paohin vancung Pennak chungah an lut dih lai tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai.” (Matthai 7:21) Mah Baibal caang ningin a hmaanmi Khrihfa hna i an hmelchunh cu Pathian duhnak tuah kha a si. A hmaanmi Khrihfa hna kha kan thleidan khawh hna i anmah he kan i komh ahcun Pathian Pennak tangah zungzal thluachuah kan hmu lai. Pathian Pennak kong le mah in hmuh dingmi thluachuah kong tam deuh in hngalh na duh ahcun mah mekazin aan pemi Jehovah Tehte Hna sinah hal dingin kan in forh.​—Luka 4:43.