Tuchan ah a thurhnawmmi hmanthlak cu fawi tein hmuh khawh a si. * Fakthanh, fashion, baisikup, music, mekazin, TV, video game, phone, electronic thilri le Web site hna ah hmuh khawh a si. Tuchan ah mi tampi nih a thurhnawmmi hmanthlak kha an hun cohlan. A thurhnawmmi hmanthlak cu a hlan nakin a tam deuh i hmun tampi ah mi nih an zoh khawh.​—“ A Thurhnawmmi Hmanthlak Le Ca He Aa Tlaimi Kong Hna” timi rinli kulh ah zoh.

A thurhnawmmi hmanthlak le ca hna cu a hlan nakin a ṭhalo chinchin. Professor Gail Dines nih hitin a ṭial: “Tuchan i a thurhnawmmi hmanthlak pawl cu an ṭhalo chinchin. A hlanah a luan tuk in rak hmuhmi thil kha atu ahcun a sawhsawh in hmuh a si cang.”

A thurhnawmmi hmanthlak le ca pawl a hun tam chinmi le mi nih an hmuh ning kha zeitindah na ruah? Mah cu ṭih a nung maw, a nung lo dah? Jesuh nih hitin a ti: “A ngan a dammi thingkung nih thei ṭha a tlai i kung chia nih thei ṭhalo a tlai tawn.” (Matthai 7:17) A thurhnawmmi hmanthlak le ca nih zei thei dah a tlai, phundang cun zeidah a chuahter? A phi hngalh awkah biahalnak cheukhat kha zohhmanh hna u sih.

MIFIM PAWL CHIMMI: Hlathlaitu cheukhat le siibawi pawl nih a thurhnawmmi hmanthlak zoh cu mi a lemmi bing bantuk a si i ngol awkah a har tuk tiah an ti.

Internet ah taarmi a thurhnawmmi hmanthlak zoh nih a lemmi Brian * nih hitin a ti: “Pakhatkhat nih tlaihkhihmi bantuk ka si. Zoh loin ka um kho lo. Ka zoh hnuah a ka therh i ka lu zong a fak. Zoh ti lo dingin kaa zuam nain kum saupi tiang mah zoh nih a ka lem rih.”

A thurhnawmmi hmanthlak zoh a hmangmi hna nih mah ziaza an ngeihmi kha an thuh. A thli tein thil tuah an hmang i hlen zong an hmang. Cucaah an li a lenmi, an ning a zahmi, an thin a phanmi, lungdongh zawtnak an ngeihmi le an thin a tawimi cu khuaruahhar awk a si lo. A caan ah mahle mah i thah hmanh an duh. Internet ah taarmi a thurhnawmmi hmanthlak le ca pawl kha a phone in nifate download a tuahmi Serge nih hitin a ti: “Keimah zawn lawng kaa ruat i ka zia a chia chinchin. Man a ngei lomi, sualnak a ngeimi, hawikom a ngei lomi le rap ah aa foihmi bantukin kaa ruat. Ka ning a zak tuk i ahohmanh bawmhnak ka hal ngam hna lo.”

A thurhnawmmi hmanthlak kha ruahlopi in hmuh sualnak hmanh nih ṭhatlonak a chuahter khawh. Mah kong he aa tlaiin hlathlainak a tuahtu, a min a thangmi Dr. Judith Reisman nih U.S. Senate committe hmaiah hitin a rak chim: “A thurhnawmmi hmanthlak na hmuh tikah hman thlakmi bantukin mah cu na thluak ah a caam kho. Fawi tein philh khawh lomi asiloah philh khawh ti lomi thil a hung si kho.” A thurhnawmmi hmanthlak Web site kha ruahlopi in a zoh sualmi, kum 19 a simi Susan nih hitin a ti: “Mah hmanthlak pawl cu ka lung chungah an caam i a caan ah an rak chuak tawn. Zeitikhmanh ah an tlau kho ti lai lo tiah ka ruah.”

A BIAPI BIKMI: A thurhnawmmi hmanthlak nih mi pakhat kha a lem khawh i a nunnak hmanh a hrawh khawh.​—2 Peter 2:​19.

MIFIM PAWL CHIMMI: “A thurhnawmmi hmanthlak le ca ruangah nu le va cu an i ṭhen i innchungkhar tampi a rawk.”​—Wendy le Larry Maltz ṭialmi cauk (The Porn Trap).

A thurhnawmmi hmanthlak le ca nih innchungkhar tampi kha a hrawh. A ruang cu mah nih 

• Nuva karlak ah a ummi zumhnak, tlaihchannak le dawtnak kha a hrawh.​—Phungthlukbia 2:​12-17.

• Mahzawn lawng ruahnak lungput a ngeihter i pakhat le pakhat a hlatter hna, cun innchunghawi cungah lungsi lonak zong a ngeihter.​—Efesa 5:​28, 29.

• Aa tlak lomi lam in nupa umṭi duhnak lungput a ngeihter hna i mah kong lawng kha a ruahter hna.​—2 Peter 2:​14.

• An innchunghawi cungah dawhcah loin nupa sinak tuah kha a duhter hna.​—Efesa 5:​3, 4.

• Lung chungin siseh, a taktak in siseh zuanzam awkah a forh hna.​—Matthai 5:​28.

Baibal nih innchunghawi a ngeimi hna kha pakhat le pakhat cungah ‘zumhawktlak loin um lo awkah’ a fial hna. (Malakhi 2:​16, NW) Zuanzam timi cu zumhawktlak loin um kha a si. Mah nih innchungkhar kha a hrawh i nuva kha a ṭhenter hna. Chungkhar an i ṭhen tikah fale kha a hnorsuan hna.

A thurhnawmmi hmanthlak nih ngakchia zong kha direct in a hnorsuan hna. A hmasa ah langhtermi Brian nih hitin a ti: “Kumhra ka si lio i lente kan i celh lioah ka pa nih aa chiahmi a thurhnawnmi mekazin kha ka hmuh. Mah caan thawkin mah hmanthlak hna kha a thli tein ka zoh lengmang. Cu bantuk hmanthlak zoh nih zeicah a ka lem ti kha ka hngal lo. Mah caan thawkin ka upat tiang a thurhnawmmi hmanthlak kha ka zoh peng.” A thurhnawmmi hmanthlak nih kumhra fai pawl kha kum no tein nupa umṭi duhnak lungthin a ngeihter hna tiah hlathlaitu hna nih an ti. Cun mi tampi he nupa sualnak an tuah, a puarhrangmi lam in nupa sualnak an tuah i lungthinlei zawtnak zong an ngei tiah an ti.

A BIAPI BIKMI: A thurhnawmmi hmanthlak zohnak nih dawtnak kha a cahter i a donghnak ah lungfahnak a chuahter.​—Phungthlukbia 6:​27.

BAIBAL CHIMMI: “Nu le pa sualnak te hna, dawhcah loin umtu khuasak te hna, hornak te hna, thinṭhatlo te hna le hakkauhnak te hna hi nan thah hrimhrim awk an si (hakkauhnak hi siasal biak ning phunkhat a si).”​—Kolose 3:5.

Jehovah * Pathian nih a thurhnawmmi hmanthlak zoh kha a huat. Mah cu nupa umṭinak kha a cohlan lo caah a si lo. Cutin umṭi khawh awkah Pathian nih a timhtuahmi a si. Aa tinhnak cu nuva karah nuamhnak le tlaihchannak a um nakhnga le fa an ngeih khawh nakhnga caah a si.​—Jeim 1:​17.

Cu a si ah Jehovah nih a thurhnawmmi hmanthlak zoh kha a duh hrimhrim lo tiah zeicah kan chim khawh? A ruang cheukhat kha zohhmanh hna u sih.

• A thurhnawmmi hmanthlak nih kan nunnak a hrawh khawh ti kha Pathian nih a hngalh.​—Efesa 4:​17-​19.

• Pathian nih a kan dawt caah harnak a kan pe khomi thil in huhphenh a kan duh.​—Isaiah 48:17, 18.

• Jehovah nih nu le va siseh, innchungkhar siseh i ṭhen hna hlah seh ti a duh.​—Matthai 19:​4-6.

• A thiangmi ziaza ngei hna seh ti a duh, cun midang nih tuahnak nawl an ngeihmi kha upat hna seh ti a duh.​—1 Thesalon 4:​3-6.

• Fa ngeih khawhnak sining kha sunsak in upatnak he hmang hna seh ti a duh.​—Hebru 13:4.

• A thurhnawmmi hmanthlak nih nupa umṭinak kha ningcang loin a kan hmuhter khawh i mahzawn lawng ruahnak le Satan bantuk ruahnak a kan ngeihter khawh ti kha a hngalh.​—Genesis 6:2; Judas 6, 7.

A BIAPI BIKMI: A thurhnawmmi hmanthlak zohnak nih Pathian he kan i pehtlaihnak kha a hrawh khawh.​—Rom 1:​24.

Asinain a thurhnawmmi hmanthlak zoh kha ngol a duhmi hna cungah Jehovah cu zaangfahnak a ngei. Baibal ah hitin a ti: “BAWIPA cu zaangfahnak le dawtnak in a khat, a thin a fual i a fekmi dawtnak in a khat. Zei in dah ser kan si kha a hngalh i leidip men kan si kha a philh lo.” (Salm 103:​8, 14) Aa toidormi hna nih an “herh lio caan te ah Pathian zaangfahnak le vel” kha an hmuh nakhnga ka sinah kir u tiah Pathian nih a sawm hna.​—Hebru 4:​16; “ A Thurhnawmmi Hmanthlak Zoh Lemnak In Luat Khawh Ning” timi rinli kulh ah zoh.

Mi tampi nih Pathian sinin bawmhnak an hmuh. Pathian bawmhnak cu a ṭhahnem maw? A ṭhalomi ziaza a hlaw khomi mi cheukhat kong he aa tlaiin Baibal nih hitin a ti: “Sualnak in thenh nan si cang; Pathian sinah pekchanh nan si cang; Bawipa Jesuh Khrih min le kan Pathian thlarau thawngin Pathian he remter nan si cang.” (1 Korin 6:​11) Lamkaltu Paul bantukin hitin an chim khawh ve cang: “[Pathian nih] ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.”​—Filipi 4:​13.

A thurhnawmmi hmanthlak zoh a ngol khomi Susan nih hitin a ti: “Mah ziaza hlawt awkah Jehovah Pathian lawng nih aan bawmh khawh. Pathian sinin bawmhnak le lamhruainak na hal ahcun a hmaiah a thiangmi dirhmun na hmu ṭhan kho lai. Pathian nih na halmi ningin aan bawmh lai ti cu a fiang ko.”