New South Wales peng, Warialda timi khua hmete ah a ṭhangmi ka si. Cuka khuami hna nih tuu le caw kha an zuat i fangvoi, facang le changvut hna kha an cin. Mah khua cu a thian lengah zaangennak zong a um theng lomi khua a si.

Unau pahra lakah upa bik ka si i kum 13 ka si in chungkhar zohkhenhnak caah rian ka ṭuan cang. Cataang a niammi ka si caah cinthlaknak le saṭil zuatnak ah ka ṭuan. Kum 15 ka si ah rang pawl an fim nakhnga a cawnpiaktu pakhat ka hung si.

Lo ah rianṭuan cu a ṭhatnak a um bantukin a ṭhatlonak zong a um. Asinain mah rian le pawngkam sining kha ka duh. Zan ah meiphu pawngah ka ṭhu i thlizil nih a ratpimi vawlei haw kha dawp pah in thlapa le arfi kha ka zoh tawn. Khuaruahhar a simi mah thil hna hi a sertu a um lai tiah ka rak ruahmi zong kha kaa cinken rih. Asinain volhpamh thawng hna ka theih i kuak zong kaakip ah hmuh khawh a si. Cuticun nitin kuak ka hun zu ve i volhpamh zong ka hung hmang.

Kum 18 ka si ah Sydney khua ah kaa ṭhial. Ralkap luh ka duh nain ka cataang a niam caah ka lut kho lo. Sydney ah rian pakhat ka hmu i kumkhat ka rak um. Mah lioah Jehovah Tehte Hna he kan i tong. Pumh an ka sawm caah kaa pum ve i an cawnpiaknak cu biatak a si ti kha ka hun hngalh colh.

Mah hnu tlawmpal ah khuate ah kir ṭhan dingin bia ka khiah. Queensland, Goondiwindi khua ah kaa ṭhial. Cuka ah rian ka hmu i nupi zong ka ṭhi. Cun zu zong ka hung ding.

Fapa pahnih kan ngeih hnuah ka nunnak cu zeilei ah dah a panh timi kong kha ṭha tein ka hun ruah. Sydney khua i Jehovah Tehte Hna pumhnak ah ka rak theihmi kong kha ka ruat ṭhan i pakhatkhat tuah dingin bia ka khiah.

Jehovah Tehte Hna i Australia zung ṭengnge address aa telmi Vennak Innsang cauk hlun pakhat kha ka hmuh. Nan ka bawm kho lai maw tiin ca ka kuat hna. Mah tikah dawtnak le zaangfahnak a ngeimi Jehovah Tehte pakhat cu ka sinah a rak phan. Tlawmpal ah amah he Baibal kan cawng.

Baibal ka hlathlai tikah ka nunning thlen a hau ti kha ka hun hngalh. A hleiin 2 Korin 7:1 bia nih ka lung a ka suk tuk. “Pum siseh, thlarau siseh, a thurhnawmhtertu paohpaoh kha i thenh” dingin tha a kan pek.

Kuak zuk le zu tampi din ti lo awkah bia ka khiah. Kum tampi chung ka rak tuahmi a si caah fawi tein ka ngol kho lo. Asinain Pathian duhmi lam ningin nun awkah bia ka khiah. Rom 12:2 ah aa telmi Baibal phunglam ka zulh tikah thlennak tuah awkah kaa fawih deuh. Hitin a ti: “Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in, in thleng hna seh.” Ka ziaza ṭhalo kha kaltak khawh awkah ka ruah ning remh le mah ka zia hna kha ṭih a nungmi in Pathian nih a hmuh bantukin hmuh a herh ti kha ka hun hngalh. Pathian bawmhnak thawngin kuak zuk le zu tampi din kha ka ngol khawh cang.

Ka caah ngol awkah a har bikmi cu mi volhpamh kha a si. Efesa 4:​29 i “bia nan i ruah tikah mi ca ṭhatlonak bia hmang hlah u” timi Baibal ruahnak cheuhnak kha ka hngalh. Asinain volhpamh ka hmanmi kha ka hlaw kho colh lo. Isaiah 40:26 bia kha ṭha tein ka ruah tikah thazaang ka hmu. Mah Baibal caang nih arfi in a khatmi van kong he aa tlaiin hitin a ti: “Van khi zoh tuah u! Nan hmuhmi arfi khi aho nih dah a ser hna? Ralkapbu bantukin a hruaitu hna nih khin a ser hna; zeizat an si kha a hngalh i an dihlak in an min in a auh hna! A ṭhawnnak cu a lianngan hringhran ko—pakhat hmanh an tlau bal lo.” Pathian nih ka cuanh tawnmi van le vawlei hi a ser khawh a si ahcun a lungton awkah ka ziaza thlen dingin kaa zuammi hi a ka bawmh khawh ti kha ka hngalh. Atu le atu thla ka cam i fakpi in kaa zuam caah mi volhpamh ka hmanmi kha duhsah in ka hun ngol khawh.

Rian ka ṭuannak saṭil zuatnak pawngah mi an um theng lo caah mi he bia kaa ruah tuk lem lo. Asinain Jehovah Tehte Hna pumhnak i cawnpiaknak thawngin midang he i chawnhbiak ning kha ka hun hngalh. Mah cawnpiaknak ruangah Pathian Pennak kong kha midang sinah ka hun chim khawh.​—Matthai 6:​9, 10; 24:14.

A luancia kum hna thawkin Khrihfa upa pakhat in rian ka ṭuan. Zumtukhat unau pawl ka si khawh chungin ka bawmhmi hna kha tinvo sung pakhat in ka hmuh. Ka caah a ṭha bikmi thluachuah cu dawtnak a ngei i zumhawktlak tein a ummi ka nupi le duh a nung tukmi ka fapale he lungrual tein Pathian kan biakṭimi hi a si.

Cataang a niammi ka si ko nain Jehovah nih a ka cawnpiak caah kaa lawm tuk. (Isaiah 54:13) Phungthlukbia 10:22 i “BAWIPA thluachuahnak cu rumtertu a si” timi bia kha ka cohlan. Ka chungkhar he Jehovah Pathian kong tam deuh in cawn awk le zungzal in biak awkah kan i ruahchan.