5. Vawlei Hrawhnak

‘[Pathian nih] vawlei a hrawktu hna kha a hrawh hna lai.’​—BIATHLAM 11:18.

● Mr. Pirri cu Nigeria, Kpor ah ṭhan zu laknak rian in a paw aa cawmmi a si. Niger Tiva ah zinan an thletmi tampi a um caah a pumcawmnak rian kha a hnorsuan. Hitin a ti: “Mah nih nga pawl kha a thah hna i kan takvun zong a hrawh, mah lengah tiva hna zong kha a thurter. Cucaah zeitindah pumcawmnak rian ka ṭuan lai ti kha ka hngal lo.”

Mah Nih Zeidah A Langhter? Mifim pawl nih kum fatin rili chungah ton 6.5 hrawng a ritmi hmunthur hna kha an hlonh peng tiah an ti. Mah hmunthur hna lakah zatuak in 50 cu plastic an si i mah plastic a rawh hlan kum tampi chung cu tiva cungah a vuan lai. Mi nih vawlei kha an thurter lengah amah tein a thar aa chuah ṭhanmi kokek thil hna zong an hrawh dih cikcek. Hlathlaitu pawl nih kumkhat chungah mi nih an hmanmi thil hna kha amah tein a thar aa chuah ṭhan khawh nakhnga kumkhat le thlanga chung a caan lak a hau tiah an ti. “Milu le an hmanmi thil hna cu mah ningin a karh peng ahcun 2035 a phanh ahcun Vawlei pahnih a um a hau lai” tiah Australian thawngzamhnak capar (Sydney Morning Herald) nih a ti.

Mi Tam Deuh Nih Zeitindah An Lehrulh? Minung cu thilti khawhnak kan ngei. Mah buaibainak hna kha kan thlen lai i vawlei kha kan khamh khawh ko lai.

Mi Tam Deuh Lehrulh Ning Cu Zumh Khawh A Si Maw? Pakhat cio in siseh, a phu in siseh rian aa zuammi hna nih kan pawngkam thil sining kha biapi ah an hun chiah. Asinain vawlei cu a thurhnawm chinchin peng rih ko.

Nangtah Zeitindah Na Ruah? Pathian nih rawhnaklei ah a phanmi vawlei hi a biakam ningin a khamh lai maw?

Ni hmanung bik caan kong he aa tlaiin atu ah kan i ruah cangmi chimchungbia panga lengah a ṭhatnaklei in a cangmi thil hna kong zong kha Baibal nih a chimchung. A paruknak chimchungbia kong kha zohhmanh hna u sih.

[Cahmai 8nak i a tawinak in langhternak]

“Aa dawh tukmi hmun pakhat ngeih dih in a ṭha lo tukmi hmunthur hlonhnak hmun ngeih bantukin ka ruah.”—UNITED STATES, RILI FONGHLEI AH A UMMI, ERIN TAMBER NIH 2010 AH MEXICO RILI FONGHLEI AH ZINAAN THLETNAK RUANGAH A CHUAHMI ṬHATLONAK KONG HE AA TLAIIN A CHIMMI.

[Cahmai 8nak i rinli kulh]

Pathian Cu Rian A Ngei Maw?

Tuchan ah kan tonmi ṭhatlonak kong he aa tlaiin Baibal ah a chimchung ruangah mah thil ṭhalo hna caah Pathian cu rian a ngei maw? Sifah harnak hi Pathian nih a chuahtermi a si maw? Mah biahalnak caah lungsi hnangamnak a pemi a phi kha Jehovah Tehte Hna nih an chuahmi Baibal Nih Zeidah A Kan Cawnpiak? timi cauk ṭhen 11 ah zoh khawh a si.

[Picture Credit Line on page 8]

U.S. Coast Guard photo