6. Vawleicung Pumpi Phungchim Rianṭuannak
6. Vawleicung Pumpi Phungchim Rianṭuannak
“Vancung Pennak kong Thawngṭha hi khuazakip ah chim a si lai.”—MATTHAI 24:14.
● Vaiatea cu Pacific tikulh, Tuamotu ah a ummi a hlat tukmi Tikulh pakhat ah a ummi a si. Tuamotu Tikulh cu a velchum a dihlak fonh ah meng 310,000 (802,900 sq km) leng a si. Mah ah tikulh 80 hrawng a um i milu cu 16,000 hrawng lawng an si. Asinain Jehovah tehte Hna cu Vaiatea le a innpa pawl sinah an rak leng. Zeicah? Mi cu khoika hmun i an um hmanhah Jehovah Tehte Hna nih Pathian Pennak kong kha chimh an duh hna caah a si.
Mah Nih Zeidah A Langhter? Pathian Pennak kong thawngṭha cu vawleicung pumpi ah a phan cang. 2010 lawngah Jehovah Tehte Hna nih ram 236 ah phung an chim i sumilam nuai thong 1.6 leng an hman. Mah cu buaktlak in kan tuak ahcun Jehovah Tehte pakhat nih nikhat ah minit 30 hrawng phung a chim tinak a si. A luancia kumhrabu chungah Baibal fimchimhnak cauk a phunphun kha nuai thong 20 hrawng an chuah i an phawtzamh.
Mi Tam Deuh Nih Zeitindah An Lehrulh? Baibal kong chim a sinak cu kum thong in a rau cang.
Mi Tam Deuh Lehrulh Ning Cu Zumh Khawh A Si Maw? Mi tampi nih Baibal thawngpang kong he aa tlaiin a kong cheukhat cu an chim ko. Asinain mi tam deuh nih cun hmun tlawmte ah chikkhat te lawng an chim. Mah he i ralkah in Jehovah Tehte Hna nih cun mi thong tampi sinah thawngṭha a phanh khawh nakhnga ṭha tein dirhmi vawleicung pumpi phungchim rianṭuannak rian kha an liim. Minung tuanbia ah nawl a ngei bikmi hna le a puarhrangmi minung phu cheukhat nih fakpi an ralchanh ko hna nain Jehovah Tehte Hna nih phungchim rian kha lungtho tein an ṭuan peng. * (Marka 13:13) Mah lengah Jehovah Tehte Hna nih tangka an hmuh ruangah phungchim rian an ṭuanmi a si lo. Mah canah an caan kha lungtho tein an i pe i cauk pawl kha man loin an pek ṭhenh hna. An rian cu mah lungtho tein pekmi thawhlawm in ṭuanmi a si.
Nangtah Zeitindah Na Ruah? Pathian “pennak kong thawngṭha” cu vawleicung pumpi ah chim a si cang maw? Mah Baibal chimchungbia hna a tlinmi nih hmailei ah a ṭha deuhmi thil a cang lai tiah a chim duhmi a si maw?
[A Tanglei Fianternak]
^ Tam deuh in hngalh na duh ahcun Jehovah Tehte Hna nih an chuahmi “Harnak Lakah Zumhfek Tein An Um,” “A Sendummi Kilpathum” timi le “Jehovah Tehte Hna nih Nazi Hremnak kha Fek tein An Inkhawh” timi video kha zoh khawh a si.
[Cahmai 9nak i a tawinak in langhternak]
“Jehovah Pathian nih nawl a awnh chung paoh cu Pennak kong thawngṭha kha lungtho tein kan chim peng lai i mi kip sinah phung kan chim khawh nakhnga zei lam paoh kha kan hman ko lai.”—2010 JEHOVAH TEHTE HNA I YEARBOOK