Biaknak lei cauk hna lakah Baibal cu aa thleidang bikmi cauk a si. Tuanbia ningin minung tampi zumhnak a remh khotu cu Baibal lawng a si. Asinain Baibal cu mi nih sual an kawl bikmi cauk le an rel bikmi cauk zong a si.

Tahchunhnak ah, Baibal lei mifim cheukhat nih tuchan Baibal hna cu a hrampi kut in ṭialmi Baibal ningin a si hnga maw timi kong he aa tlaiin lunghrinnak an ngei. Biaknak lei professor pakhat nih hitin a ti: “Baibal cu a hrampi kut in ṭialmi ningin an let maw, let lo ti cu fiang tein theih khawh a si lo. Kan ngeihmi Baibal hna cu a palh khomi le, kut in ṭialmi ca hna an si. Mah kut in ṭialmi ca a tam deuh cu a hrampi Baibal an ṭialnak in kum za leng a rauh hnu lawngah ṭialmi an si caah a hrampi cauk he cun aa dang tuk lai.”

Cheukhat nih cun biaknaklei hnulei sining ruangah Baibal a hmaan ning cungah lunghrinnak an ngei. Tahchunhnak ah, Khrihfa a si lomi a chungkhar pawl nih Faizal kha Baibal cu a thianghlim tukmi cauk a si ko nain a konglam hna cu aa thleng dih cang tiah an ti. Cucaah Faizal nih hitin a ti: “Mi pawl nih Baibal kong an ka chimh tikah ka zum ti lo. An ngeihmi Baibal cu a hrampi Baibal a si lo. Aa thleng dih cang.”

Baibal ah a ummi a konglam pawl aa thleng maw, thleng lo ti hngalh cu a biapi maw? Mah biahalnak hna hi ruathmanh: Hmailei kong he aa tlaiin Baibal biakam hna cu a hrampi Baibal ah aa tel maw, tel lo ti na hngalh lo ahcun hnemtu a simi mah biakam hna cu na zum kho lai maw? (Rom 15:4) Tuchan ah hmanmi Baibal hna cu mi nih an tlenmi le palhnak a um vemi cauk a si ahcun rian, chungkhar le biaknak ti bantuk a biapimi biakhiahnak hna tuah tikah Baibal lamhruainak kha na zul lai maw?

A hrampi Baibal hna cu an um ti lo nain kut in ṭialmi Baibal thong tampi i telin hlanlio kut in ṭialmi ca pawl he tahchunh khawh a si. Kut in ṭialmi mah cauk hna cu rawhnak, ralchanhnak le biafang hna thlen dingin i zuamnak hna lakah zeitindah a rak hmunh khawh peng? Hlanlio kut in ṭialmi cauk hna a hmunhmi nih tuchan ah hmanmi Baibal a hmaan ning kha zumh khawh awkah zeitindah aan bawmh? A phi hngalh khawh awkah a hnu capar ah ṭialmi hngalh duh awk ngai a simi tuanbia kong kha hlathlai.