Baibal cu a rak hmun. Cucaah tuchan zongah Baibal na ngeih khawh i na rel khawhmi a si. Cun ṭha tein lehmi Baibal na rel tikah a hrampi Baibal ningin lehmi a si ti kha na zumh khawh. * Asinain rawhnak, fakpi in ralchanhnak le Baibal biafang thlen i zuamnak hna lakah Baibal cu zeicah a rak hmunh khawh? Baibal ah zei aa thleidannak dah a um?

Baibal a cawngmi mi tampi nih lamkaltu Paul chimmi “cathiang hi a dihlak in Pathian thaw chuah hnawhmi a si” timi bia kha an cohlan.” (2 Timote 3:​16) Baibal cu Pathian thawhchuah hnawhmi a si i Pathian nih a kilven caah tuchan tiang a hmunhnak a si ti kha an zumh. A hmasa capar ah langhtermi Faizal nih mi nih an chimmi kha a hmaan maw, hmaan lo ti hngalh awkah Baibal kha amah theng nih hlathlainak tuah dingin biakhiahnak a rak tuah. Mah tikah a hngalhmi kong nih a khuaruah a harter. Khrihfa aa timi hna lakah a laar ngaimi cawnpiaknak tam deuh cu Baibal ah aa tel lo ti kha a hun hngalh. Mah lengah Baibal ah vawlei kong he aa tlaimi Pathian tinhnak a hmuh tikah a duh tuk.

Hitin a ti: “Atu ahcun Baibal cu Pathian sinin hmuhmi laksawng a si ti kha ka zumh cang. Pathian nih van le vawlei hmanh a serh khawh ahcun kan caah cauk pakhat pek awk le kilven awkah ṭhawnak a ngei lai a si ko lo maw? Cutin a si lo ahcun Pathian ṭhawnnak cu ri a ngeimi a si lai. Lianngan Bik Pathian ṭhawnnak cu ri a ngei tiah chim dingin keimah cu zeidah ka si?”​—Isaiah 40:8.