A ṬHATLONAK: Rawhnak le ralchanhnak lakah Baibal cu a rak hmun. Asinain Baibal a tlengtu le holh a lettu cheukhat nih Baibal thawngpang kha thlen dingin an rak i zuam. An zumhnak kha Baibal he aa tlak nakhnga thlennak tuah canah Baibal tu kha an zumhnak he aa tlak nakhnga an rak i zuam. Thil sining cheukhat kha zohmanh hna u sih:

• Biaknak hmun: BC kumzabu pali le pahnih karlak ah Samaria Pentateuch Baibal a ṭialtu hna nih Exodus 20:17 hnuah “Aargaareezem ah biakṭheng pakhat ser siseh” timi biafang kha an chap. Samaria mi pawl nih “Aargaareezem” asiloah Gerizim Tlang cungah biakinn an sakmi kha Baibal nih a cohlan lai tiah an rak i ruahchan.

• Thumkomh pathian zumhnak: Baibal an ṭial dih hnu kum 300 hrawngah Thumkomh pathian zumhnak a cohlangmi caṭialtu pakhat nih 1 Johan 5:7 ah “vancung ah Pa pakhat, Bia pakhat le Thiang Thlarau pakhat tiin tehte a khaangtu pathum an um i annih cu pumkhat an si tiah a chap.” A taktak ti ahcun a hrampi Baibal ah cutin a langhtermi a um lo. Baibal lei mifim Bruce Metzger nih hitin a ti: “Kum zabu paruknak a donghnak lei lawngah mah bia kha kut in ṭialmi Hlanlio Latin Baibal le [Latin] Vulgate” Baibal hna ah tam deuh an rak hmuh.

• Pathian Min: Judah phung aa tlaih tukmi hna ruangah Baibal lettu tampi nih Pathian min kha Baibal in an rak hloh. Pathian min aa telnak zawn ah “Pathian” asiloah “Bawipa” ti bantuk upatnak min hna in an airolh. A tak ti ahcun Baibal chungah mah upatnak min hna kha Sertu ca lawngah si loin minung, a hmaan lomi biaknak a zummi hna le khuachia ca hmanhah an rak hman.​—Johan 10:34, 35; 1 Korin 8:​5, 6; 2 Korin 4:4. *

BAIBAL A HMUNH NING: Pakhatnak, Baibal tlengtu cheukhat nih Baibal kha zei rel loin le dingfel loin an tlen. Asinain Baibal tlengtu tam deuh cu a thiam tukmi le ṭha tein dothlatnak a tuahmi an si. AD kumzabu paruk le pahra karah Masoretes nih Hebru Baibal kha a tlen i mah Baibal kha Masoretic cauk tiah mi nih an hun hngalh. An tlen tikah a palhnak a um nakhnga lo cafang hmanh kha an rak rel. A hrampi Baibal ah a palhnak a um tiah lunghrinnak an ngeih ahcun mah Baibal caang pawng i a lawnnak ah ca an ṭial. Masoretes pawl nih Baibal biafang kha an thleng lo. Professor Moshe Goshen-Gottstein nih “Baibal biafang hramhram in thlen cu an caah a ṭha lo bikmi sualnak a si” tiah a ti.

Pahnihnak, tuchan kut in ṭialmi Baibal tampi nih Baibal lei mifim pawl kha a palhnak zawn kha hmuh awkah a bawmh hna. Tahchunhnak ah, biaknaklei hruaitu hna nih Baibal biafang a hmaan taktakmi cu Latin Baibal lawngah hmuh khawh a si tiah kumzabu tampi chung an rak cawnpiak hna. Asinain a cunglei ah langhter a si bantukin 1 Johan 5:7 ah a hmaan lomi biafang pawl kha chap a rak si. Mah biafang kha mi nih an hman bikmi Mirang King James Version hmanhah a rak i tel. Asinain a dang kut in ṭialmi ca hna an hmuh tikah zeidah an hun hngalh? Bruce Metzger nih hitin a ti: “[1 Johan 5:7 ah] aa telmi biafang kha (Siria, Coptic, Armenian, Ethiopia, Arabic, Slavonic) ti bantuk kut in ṭialmi Baibal hna ah hmuh a rak si lo, Latin Baibal lawngah hmuh a si.” Cucaah remh ṭhanmi King James Version le a dang Baibal hna ah mah biafang kha an hloh ṭhan.

Baibal kong thawngpang cu aa thleng lo ti kha hlanlio kut in ṭialmi Baibal hna nih an cohlang maw? 1947 ah an rak hmuhmi Rili Thi Cazual hna cu Hebru Masoretic hlan kum thongkhat leng hrawngah ṭialmi a rak si. Mah Baibal cauk pahnih kha Baibal lei mifim pawl nih an tahchunh. Rili Thi Cazual phu ah aa tel vemi pakhat nih hitin a ti: “Judah Baibal tlengtu hna nih kum thongkhat chungah Baibal biafang hna kha zumhfek tein le ṭha tein an dothlai i an ṭialmi a si ti kha Baibal cazual pakhat hmanh nih ṭha tein a langhter khawh.”

Ireland ram Dublin khua i Chester Beatty Library ah AD pahnihnak lio i kut in ṭialmi ca hna i telin phaikung ah ṭialmi Khrihfa Greek Baibal dihlak ti awkin an rak chiah. Baibal an ṭial dih in kum 100 hnu lawngah mah hna kha an ṭialmi a si. The Anchor Bible Dictionary timi cauk ah hitin a ti: “Phaikung ah ṭialmi ca hna ruangah Baibal biafang he aa pehtlaimi a kong thar a dikthliar kha kan hngalh khawh bantukin caankhat te ah tuanbia dihlak ah Baibal hi ṭha tein rak ṭialmi cauk a si ti zong kan hngalh khawh.”

A ṬHATHNEMHNAK: Kut in ṭialmi Baibal a chan le a tam ning nih Baibal biafang hna kha palhnak umter si loin ṭhat deuh awkah a bawmh. Sir Frederic ­Kenyon nih Khrihfa Greek Baibal he aa tlaiin hitin a ti: “Baibal tlukin zei bantuk hlanlio cauk hmanh mah tlukin a tammi langhtertu thil a um lo. Atu ah kan ngeihmi Baibal biafang hna cu a tling dihmi a si ti kha duhdanh a ngei lomi Baibal lei mifim paoh nih cun an cohlan ko lai.” Hebru Baibal he aa tlaiin Baibal lei mifim William Henry Green nih hitin a ti: “Baibal bantukin hmaan tein ṭialmi a dang hlanlio cauk a um lo tiah fiang tein ka chim ngam.”