A PHAW CAPAR | BAIBAL—A HMUNH NING
Rawk Loin A Hmunmi Baibal
A ṬHATLONAK: Baibal ṭialtu hna le Baibal tlengtu hna nih a bik in phaikung le saphaw hna kha hmangin Baibal kha an rak ṭial. * (2 Timote 4:13) Baibal a hmunh khawh nakhnga mah thilri hna cu zeicah a ṭhat lo?
Phaikung hna cu fawi tein an tlek kho i a rong zong aa thleng kho, cun a fek zong a fek lo. “Phaikung pakhat cu a rop a si ahcun a hnah hri le a dip lawng a tang. Cun phaikung cazual hna kha an fim tikah a buar kho, a cin ruang ah a rawk kho, cun vawlei ah an phum ahcun zu, rungrul le a hleiin ṭuangṭuan nih a ei khawh” tiah Izipt hlanlio ca le phungphai a hlathlaitu Richard Parkinson le Stephen Quirke nih an ti. An hmuhmi phaikung cheukhat cu ni a linh tuknak hmun asiloah a cinnak hmun ah an chiah ahcun fawi tein a rawk kho ti kha an hmuh.
Saphaw cu phaikung nakin a fek deuh ko nain duhpaoh in an chiah, a linh tuknak le a cinnak hmun asiloah a ceu tuknak hmun ah an chiah ahcun a rawk kho. * Saphaw cu rungrul nih an duh tuk. Cucaah
Everyday Writing in the Graeco-Roman East cauk nih “hlanlio ca hna rawk loin hmuh cu a um tuk lo” tiah a ti. A tak ti ahcun Baibal hi hei rawk sual sehlaw a chungah ummi thawngpang zong an tlau dih lai.
BAIBAL A HMUNH NING: Judah nawlbia ningin siangpahrang kip nih a hmasa Baibal uknga a simi Nawlbia cauk hna kha anmah theng nih an “tlen” a hau. (Deuteronomi 17:18) Mah lengah Baibal tlengtu hna nih kut in ṭialmi Baibal tampi kha an rak tlen. Cucaah AD pakhatnak lioah Baibal kha Israel ram pumpi le a hlatnak Masidonia ah a ummi pumhnak inn hna hmanhah hmuh khawh a rak si. (Luka 4:16, 17; Lamkaltu 17:11) Hlanlio kut in ṭialmi ca cheukhat hna kha tuchan tiang zeitindah an hmunh?
Rili Thi Cazual tiah mi nih an theihmi hlanlio kut in ṭialmi ca hna cu a ronak hmun i lungkua chung le tlak um chung hna ah an fim caah kum za leng rawk loin a um kho
Biakam Thar Baibal lei mifim Philip W nih “Judah mi hna nih Baibal cazual pawl kha saupi a feh nakhnga tichiahnak um le tlak um hna ah an chiah tawn” tiah a ti. Khrihfa hna zong nih mah phunglam kha an zulh ve. Cucaah hlanlio kut in ṭialmi Baibal cheukhat hna kha tlak um, thil chiahnak bizu le lungkua hna ah hmuh a rak si. A caan ahcun a ronak hmun zongah hmuh a rak si.
A ṬHATHNEMHNAK: Kut in ṭialmi Baibal thong tampi cu tuchan tiang an um rih. Cheukhat cu kum 2,000 leng an si cang. Zei bantuk hlanlio ca hmanhah mah tlukin a tammi kut in ṭialmi cauk a um lo.
^ Phaikung cu ti chungah a khomi a kung pakhat in lakmi a si. Saphaw cu saram phaw in lakmi a si.
^ Tahchunhnak ah, U.S. Luatnak Thanhnak Ca cu saphaw cungah ṭial a si. Kum 250 a rauh hnu, atu ahcun mah saphaw ca cu rel awkah a har tuk cang.