Baibal nih minung cu kan dihlak in misual kan si tiah a ti. Hmasa bik mipa, Adam sinin sualnak tuah duhnak lungput kha ro kan co. Cucaah a caan ah sualnak kan tuah tawn i a hnuah kan i ngaichih ṭhan tawn. Pathian Fapa, Jesuh Khrih nih kan sualnak ruangah a nunnak a rak pek. Jesuh thihnak thawngin ngaihthiamnak kan hmu kho. Mah cu Pathian sinin hmuhmi laksawng a si.​—Rom 3:​23, 24 rel.

Mi cheukhat nih sualnak ngan an tuah caah Pathian nih a kan ngaithiam kho hnga maw ti kha hngalh an duh. Lunglawmh awk ngai a simi cu Baibal nih hitin a ti: “A Fapa Jesuh thi nih khan kan sualnak vialte in a kan thenh.” (1 Johan 1:7) Lungtak tein kan i ngaihchih ahcun Jehovah nih kan sualnak cu zeitluk in a ngan hmanhah lungtho tein a kan ngaihthiam lai.​—Isaiah 1:​18 rel.

Jehovah Pathian nih kan ngaithiam seh ti kan duh ahcun a kong kha cawng in a lam, ruahnak a kan cheuhmi le a kan halmi pawl kha hngalhthiam awkah kan i zuam a hau. (Johan 17:3) An sualnak aa ngaichih i, i thlen awkah aa zuammi hna kha Jehovah nih siang ngaiin a ngaihthiam hna.​—Lamkaltu 3:​19 rel. 

Pathian mithmai ṭha hmuh cu a har tukmi a si lo. Jehovah nih kan derthawmnak kha a hngalhthiam. Zeicahtiah anih cu zaangfahnak le dawtnak a ngeimi Pathian a si. Pathian ngeihmi dawt-zaangfahnak ruangah a mithmai ṭha hmu dingin zeitindah ka tuah lai timi kong kha tam deuh in hngalh na duh, a si ko lo maw?​—Salm 103:13, 14 rel.