Rom khua i sifak pawl rian hrang an ṭuannak hmun ah a ṭhangmi ka si. Ka nunning cu a har tuk. Ka nu kha ka hmu bal lo i ka pa he zong naihniam tein kan umṭi bal lo. A har tukmi hmunhma ah zeitindah kan nun lai ti kha ka cawn.

Kumhra hrawng ka si lioin ka fir cang. Kum 12 ka si ah inn in a voikhatnak ka chuak. Ka pa nih atule atu palik zungah a ka auh. Mi he kaa si peng i mi kip cungah ka thin a hung. Kum 14 ka si ah inn in ka chuak beh. Ritnak sii ka hmang i lam cungah khua ka sa. Ihnak hmun ka ngeih lo ahcun mi mawṭaw kha ka khuai i khua a dei hlan ka it tawn. Cun ti umnak hmun kha ka kawl i ka kutke kaa ṭawl i ka hmai kaa phiah tawn.

Thil fir dan kha ka thiam tuk. An bag hna kha ka chuh hna i zan ah mi inn chungah thil ka fir. Cuticun a ṭhatlonaklei in ka min a thang chinchin i a hnuah a min a thangmi zaangennak phu pakhat nih anmah he ṭanṭi dingin an ka sawm. Anmah he kaa kom i bank hna ah damiah kan ṭaih hna. Ka puarhran tuk caah mah phu ah upatnak ka hmu. Meithal i ken loin khoika hmanhah ka kal bal lo. Ka ih hmanhah meithal kha ka chantling tangah kaa chiah. Puarhrannak, ritnak sii hmannak, a thurhnawmmi biachim le ziaza rawhralnak cu keimah zia a si cang. Palik nih an ka ngiat peng i atule atu tlaih le thongthlak ka rak si.

Voikhat cu thonginn in ka chuah hnuah ka ni sinah ka va leng. Ka ni le ka unau pawl cu Jehovah Tehte an si kha ka hngal lo. Pumh an ka sawm i zeidah a lawh ti hngalh awkah ka zulh ve hna. An Biakinn ka phanh tikah kutka pawngah ka ṭhu i hodah leng ah a chuak lai ti kha ka zoh hna. A hlan bantukin meithal cu kaa ken peng ko.

Mah pumhnak nih ka nunning kha a ka thlenter. Pumhnak i ka ṭhut lioah a dang vawlei ah a phanmi bantukin kaa rak i ruahmi kha kaa cinken rih. Jehovah Tehte Hna nih hmaipanh tein an ka chawnhbiak. An mithmai kha tu tiang ka mitthlam ah a cuang peng rih. Mah hmun cu ka rak tlawnlennak hmun he cun aa dang tuk.

Cucaah Jehovah Tehte Hna he Baibal ka hun hlathlai. Baibal kong ka hngalh deuh tikah ka nunning cu thlen a hau ti kha ka hun hngalh. Phungthlukbia 13:20 ah a chimmi mah bia hi kaa cinken: “Mifim mi hna sinah i chawk ve lengmang law na fim lai, mihrut hna he i kom law a ping ah an in hruai lai.” Mah tikah zaangennak phu he pehtlaihnak tuah a ngah lo ti kha ka hun hngalh. A fawi cu a fawi lo nain Jehovah bawmhnak thawngin cutin ka rak tuah khawh.

Pumsalei zongah thiang tein ka hung um. Kuak le ritnak sii hna kha ngol khawh awkah fakpi in kaa zuam. Ka sam kaa meh i ka tumbul kha kaa phoih. A thurhnawmmi bia zong ka chim ti lo. Mah cu ka nunnak ah a hmasa bik keimahle keimah kaa uk khawhmi a si.

Carel le Baibal hlathlai kha ka huam lo. Baibal hlathlainak tuah cu ka caah zuamcawhnak taktak a si. Kaa zuam deuh tikah Jehovah kha kan hun dawt deuh ve. Mah lengah ka chiaṭha thleidannak zong nih hna a ka hnawh ti lo. Asinain ka sual tuk caah Jehovah nih a ka ngaithiam kho hnga maw tiah ka ruah caan a um. Cu bantuk caan ah sualnak ngan a tuahmi Siangpahrang David kong kha ka rel i lungdaihnak ka hmu ṭhan.​—2 Samuel 11:​1–12:​13.

A dang zuamcawhnak pakhat cu innkhat hnu innkhat kal in ka zumhnak kong chim kha a si. (Matthai 28:19, 20) A ding loin ka rak pehtlaihmi hna le harnak ka rak pekmi hna he kan i tong sual lai tiah ka thin a phang. Asinain ṭihnak ka ngeihmi cu duhsah tein ka hun tei khawh. Midang sinah vancung kan Pa nih lungtak tein a kan ngaihthiamnak kong chim kha ka duh tuk.

Jehovah kong ka hngalhmi nih ka nunnak kha a ka khamh. Atu ah hlanlio i ka hawile cu an um ti hna lo. A cheu cu thong an tla. Kei tu cu lungsi hnangamnak in a khatmi ruahchannak ka ngei cang. Toidornak ngeih awk, nawlngaih awk le thinhunnak i sum khawh awkah ka cawn. Atu cu mi he ṭha tein bia kaa ruah kho cang. Ka dawt tukmi ka nupi Carmen he kan i um. Kan pahnih in midang sinah Baibal kong kha lungtho tein kan chimh hna.

Cun chim awk pakhat kaan ngeih rih hna. Atu cu dingfel tein rian ka ṭuan cang. A caan ah bank he zong pehtlaihnak ka ngei. Damiah ṭaih awkah cun a si lo. Thianhhlimhnak tuah awkah a si!