Baibal Nih An Nunning A Thlen

A NGAKCHIAT lio i a rak umnak biaknak a kaltakmi pa pakhat kha zeinihdah a hlan a biaknak ah a kirter ṭhan? A nunchung vialte pale dawtnak a hlammi, pa a ngei lomi pakhat nih zei bantuk pa dah a hmuh? An kong kha relhmanh hna u sih.

“Jehovah Sinah Ka Kir Ṭhan A Hau.”​—ELIE KHALIL

CHUAH KUM: 1976

CHUAHKEHNAK RAM: CYPRUS

TUANBIA: FAPA TLAU

HLANLIO: Cyprus tikulh ah ka chuak i Australia ah ka ṭhang. Ka nu le ka pa cu Jehovah Tehte an si i Jehovah le Baibal ka sunsak nakhnga an si khawh chungin an ka cawnpiak. Asinain kumhra fai ka si tikah ka hun hrawkhrol, zan ah a thli tein leng ah ka chuak i ka hawile sinah ka kal tawn. Mawṭaw hna kan fir lengah a dang ṭhatlonak tampi zong kan tuah.

A hmasa ahcun ka nu le ka pa an ngaihchia sual lai ti ka phan caah a thli tein ka rak tuah. Asinain a hnu ahcun ka nu le ka pa hmai zong ka zoh ti lo. Jehovah a daw lomi, kum upa pawl he kaa komh caah a ṭhalomi an ziaza cu ka cungah huham a ngei tuk. A donghnak ah ka nu le ka pa kha nan biaknak ah um ka duh ti lo tiah ka ti hna. Lungsau tein an ka bawmh ko nain ka cohlang duh lo. Cucaah ka nu le ka pa cu an ngaih a chia tuk.

Inn in ka chuah hnuah ritnak sii ka hmang, kangza hmanh ka cin i ka zuar. Ka ziaza a rawk i night club ah ka kal lengmang. Ka thinhun zong a fawi tuk. Pakhatkhat nih ka duh lomi bia an chim asiloah an tuah ahcun ka thin a hung i ka raak hna i ka velh hna. Khrihfa pakhat nih tuah lo dingmi thil vialte kha ka tuah dih.

BAIBAL NIH KA NUNNAK A THLEN NING: A ngakchiat lio tein pa a ngei lomi pa pakhat he ritnak sii kan hmangṭi i kan hun i kom. Zan tlaipi tiang bia kan i ruah tawn i a caan ahcun ka pa ka ngai tuk tiah a ka ti tawn. Jesuh nih mithi pawl a thawhter hnanak kong le hmailei zongah cutin a tuah lainak kong kha ka ngakchiat lio tein ka hngalhmi a si caah mah kong kha ka chimh. (Johan 5:​28, 29) “Na pa he kan i tong ṭhan tiah na mitthlam ah cuanter hmanh. Kan dihlak in aa dawh tukmi hi vawlei ah zungzal in kan nung kho hna” tiah ka ti. Mah ka bia nih a lung a suk tuk.

Voidang zongah ka hawipa nih ni hmanung bik caan kong asiloah Thumkomh pathian kong hna a ka hal tawn. Mah tikah Baibal kha ka lak i Jehovah Pathian, Jesuh le ni hmanung bik caan kong aa telmi Baibal caang hna kha ka relpiak. (Johan 14:28; 2 Timote 3:​1-5) Ka hawipa sinah Jehovah kong tam deuh in ka chim tikah Jehovah kong kha tam deuh in ka hun ruah ve.

Ka lungchung ah aa thupmi, ka nu le ka pa nih an rak ka cawnpiakmi Baibal biatak cu duhsah tein a hung chuak ṭhan. Tahchunhnak ah, party ah ka hawile he ritnak sii kan hman lioah Jehovah Pathian kong cu ruahlopi in ka lung ah a hung chuak tawn. Ka hawile tam deuh nih Pathian kan dawt an ti nain an tuahsernak cu a ṭha lo. Chimmi phundang, tuahmi phundang si kha ka duh lo caah Jehovah sinah kir ṭhan a hau ti kha ka hun hngalh.

Kaa in chim cu a fawi ko nain tuahsernak in langhter cu a har tuk. Thil cheukhat cu tuah awkah a fawi ko. Tahchunhnak ah, ritnak sii hman ti lo le ka hawile i komh ti lo cu ka caah a har lo. Mah hnuah Khrihfa upa pakhat he Baibal ka hun cawng.

Asinain thil cheukhat cu thlen awkah kaa harh tuk. A hleiin ka thin i sum kha kaa harh tuk. Chikkhat lawng kaa sum kho, keimah ningkel ah ka phan ṭhan lengmang. Ka thin a hun fatin sualnak ka ngei i man ka ngei lo timi ruahnak ka ngei. Ka lung a dongh tuk caah Baibal a ka cawnpiaktu Khrihfa upa sinah ka kal i bawmhnak ka hal. A zungzal in a lung a sau i dawtnak a ngeimi mah unaupa nih tha a ka pek tawn. Voikhat ah lungdongh loin um a biapitnak kong aa telmi Vennak Innsang capar pakhat kha a ka relter. * Ka thin a hun tikah tuah dingmi a kong pawl kha kan i ruah. Mah capar ah aa telmi a konglam hna kha i cinken in Jehovah sinah thla ka cam lengmang caah duhsah duhsah in ka thin ka hun i sum kho. 2000, April ah Jehovah Tehte pakhat in tipil ka ing. Ka nu le ka pa cu zeitluk in dah an i nuamh ti kha a chimzia hmanh ka thiam lo.

ṬHATNAK KA HMUH NING: Ritnak sii asiloah ziaza rawhralnak nih ka pum a thurter ti lo timi hngalhnak nih lungdaihnak le a thiangmi chiaṭha thleidannak lungthin a ka ngeihter. Rian ka ṭuan tik, kaa pumh tik, hrimhnak ka tuah tik asiloah zei thil ka tuah tik paohah a hlan nakin ka hun i nuam deuh. Nunnak he aa tlai zongin a ṭhatnaklei in hmuhnak ka hun ngei.

Lungdong lo tein a ka bawm pengmi ka nu le ka pa ruangah Jehovah cungah kaa lawm tuk. “A ka thlahtu ka Pa nih ka sinah a hnuh hna dah ti lo ahcun ahohmanh ka sinah an ra kho lo” timi Jesuh chimmi bia ka ruah tikah Pathian nih a ka hnuh caah a sinah ka kir ṭhan khawhmi a si ti kha ka hun hngalh. ​—Johan 6:​44

“Pa Pakhat Ngeih Ka Duh Tuk.”​—MARCO ANTONIO ALVAREZ SOTO

CHUAH KUM: 1977

CHUAHKEHNAK RAM: CHILE

TUANBIA: A ROCK TUKMI MUSIC TUMTU

HLANLIO: Thlanglei America i thlanglei bik ah a ummi rili pahnih aa tonnak Magellan i aa dawh tukmi Punta Arenas ah ka nu he kan um. Ka nu le ka pa cu kum nga ka si lioah an i ṭhen caah hlawtmi ka si tiah ka ruah. Pa ngei loin ka ṭhan caah pa ngeih kha ka duh tuk.

Ka nu cu Jehovah Tehte Hna he Baibal a cawng i an Biakinn ah a ka pumhpi. Asinain pumh ka huam lo caah ka buai tawn. Kum 13 ka si in kaa pum ti lo.

Mah lio caan ah music kha ka hun duh tuk. Music lei ah thiamnak ka ngei tiah ka ruah. Kum 15 ah ka si ah puai, zu zuarnak bar le pumpak i tonnak hna ah a rock tukmi music kha band he ka tum cang. Music lei ah a thiam tukmi hna he kan i komh caah classical music kha ka hun duh. Cucaah music cawnnak sianginn pakhat ah ka kai. Kum 20 ka si ah Santiago khua ah kaa ṭhial i cuka zongah music kong kha ka cawng ṭhan. Cun a rock tukmi music band pawl he ka rak tum peng.

Asinain pakhatkhat a chambaumi kaa lawhter peng. Cucaah zu kha ri lak in ka ding i ritnak sii zong ka hmang. Mah kha ka chungkhar bantukin ka ruahmi, music ka tumṭihawi pathum he kan hmang. Ralchanh duhnak lungput ka ngeih kha ka thil hrukaih ning nih a langhter. A nakmi thil kha kaa hruk, khahmul saupi in kaa chiah i ka sam zong ka tai tiang kaa zuah.

Ka lungput ruangah atu le atu kaa vel i palik sinah ka phan lengmang. Voikhat cu zu ka ri tuk i ka hawile he a kan ngiar tawnmi, ritnak sii a zuarmi phu pakhat he kaa vel. Ka kharuh kiak lakin an ka velh.

Asinain mah nakin ka lung a fak deuhmi cu ka hawile ruangah a si. Nikhat cu ka nungak nu le ka dawt bikmi ka hawipa cu kum tampi chung an rak i duh i mah kong kha ka hawile vialte nih an ka chim lo ti kha ka hun hngalh. Cucaah ka ngaih a chia tuk.

Punta Arenas khua ah ka kir i music tinṭan ka pe i violin ringawn tumnak in ka paw kaa cawm. Mah lengah a rock tukmi music band he music kan tum i aw kan khumh. Sussan tiah timi aa dawhmi nungak pakhat he kan i tong i ṭhitumnak tuah loin kan umṭi. A rauhhlan ah a nu nih Thumkomh pathian a zumh bantukin ka zumh lomi kha Sussan nih a hun hngalh. Mah tikah “zeidah a hmaan?” tiah a ka hal i Thumkomh pathian zumhnak cu a palh ti ka hngalh nain Baibal in fianter ka thiam lo tiah ka leh. Asinain ahote nih dah an fianter khawh ti kha ka hngalh. Cucaah zeidah a hmaan ti kha Jehovah Tehte Hna nih Baibal in an in chimh khawh tiah Sussan kha ka ti. Mah hnuah kum tampi chung ka tuah lomi thil pakhat kha ka tuah. Mah cu Pathian sinah thlacamnak in bawmhnak hal kha a si.

Ni tlawmpal hnuah ka hmuh balmi a lomi pa pakhat kha Jehovah Tehte na si maw tiah ka va hal. Ka muisam ruangah a ka ṭih ko nain pumhnak khoika ah dah a si tiah ka hal tikah ṭha tein a ka leh. Mah pa he kan i tonmi cu Pathian nih ka thlacamnak a ka lehmi a si ti kha ka zumh. Biakinn ah ka kal i ahohmanh nih hngalh lo dingin a hnulei bik ah ka ṭhu. Asinain ka ngakchiat lioah ka rak i pumh tawn caah tam deuh nih cun an ka hngalh. Lunglawm tein an ka conglawmh i an ka kuh caah kaa nuam tuk. Ka inn ah a kir ṭhanmi bantukin kaa ruah. Ka ngakchiat lioah Baibal a rak ka cawnpiaktu kha ka hmuh i Baibal ka cawnpiak ṭhan tiah ka ti.

BAIBAL NIH KA NUNNAK A THLEN NING: Nikhat cu Phungthlukbia 27:11 i “Ka fapa, fim law ka lung ka lawmhter tuah” timi Baibal caang kha ka rel. A nautami minung pakhat nih van le vawlei Sertu Pathian a lung lawmhter khawh a si timi kong kha thukpi in ka ruat. Jehovah cu ka nunchung dihlak ka rak kawlmi pa bantuk a si ti kha ka hun hngalh.

Jehovah mithmai ṭha hmuh le a duhnak ningin tuah kha ka duh, asinain kei cu kum tampi chung zu le ritnak sii a hmangmi ka si. “Ahohmanh bawi pahnih sal nan si kho lai lo” timi Jesuh chimmi bia kha duhsah in ka hun hngalhthiam. (Matthai 6:​24) Ka nunning i thlen dingin kaa zuam lioah “hawi ṭhalo nih ziaza ṭha a hrawh” timi Baibal caang nih ka lung a ka suk tuk. (1 Korin 15:33) Ka kaltawnnak hmun ah ka kal peng rih i ka hawikom pawl he kaa komh peng rih ahcun ka ziaza ṭhalo pawl ka hlaw kho lai lo ti kha ka hngalh. Cucaah Baibal ruahnak cheuhnak ningin ka caah dawnkhantu a simi thil hna kha ka kaltak.​—Matthai 5:​30.

Biakhiahnak ka tuahmi vialte lakah a har bikmi cu ka duh tukmi a rock tukmi music hlawt kha a si. Asinain unau pawl bawmhnak thawngin mah biakhiahnak kha ka rak tuah khawh. Zu kha ri lakin ka ding ti lo i ritnak sii zong ka hmang ti lo. Mah lengah ka sam le ka khahmul kha kaa meh i thil nak lawng i hrut zong ka hmang ti lo. Ka sam meh ka duh tiah Sussan kha ka ti tikah biakinn ah zeidah a ton hnga tiah hngalh a duh. Cucaah “Biakinn ah zulh kaan duh ve” tiah a ka ti. Biakinn ah a hmuhmi thil sining kha a duh tuk i tlawmpal ah Baibal a cawng ve. A donghnak ah, kan i um. 2008 ah kan pahnih in Jehovah Tehte in tipil kan ing. Ka nu he Jehovah kan biakṭi khawh caah kan i lawm tuk.

ṬHATNAK KA HMUH NING: Nuamhnak taktak a um lomi nunnak le zumhawktlak a si lomi ka hawile sinin ka luat cang. Music cu ka duh peng rih nain ṭha tein ka thim i ka ngaih. Ka chungkharmi le midang, a hleiin mino pawl nih ṭhatnak an hmuh nakhnga ka hmuhtonnak kha ka chimh hna. Hi vawlei nih pekmi thil hna cu a ṭha tukmi le a nuam tukmi a lo ko nain a donghnak ah “hmunthur” bantuk a si ti kha hngalhter ka duh hna.​—Filipi 3:8.

Dawtnak le daihnak in a khatmi Khrihfabu ah hawikom ṭha ka ngei cang. Mah vialte nakin Jehovah Pathian he pehtlaihnak ṭha ka ngei i ka hlam tukmi ka Pa cu ka hmuh cang.

[A Tanglei Fianternak]

[Cahmai 13nak i a tawinak in langhternak]

“Pathian nih a ka hnuh caah a sinah ka kir ṭhan khawhmi a si”