Baibal Nih An Nunning A Thlen

A NGAKCHIAT lioah ngaihchiatnak tampi a tongmi mino nu pakhat nih sullam a ngeimi nunnak kha zeitindah a rak hmuh? Ramkhel lei ralchanh a hmangmi pakhat kha dai tein a ummi Pathian rianṭuantu si awkah zeinihdah a forh? A phi hngalh na duh ahcun a tanglei ah langhtermi hmuhtonnak hna hi rel.

“Dawtnak Hmuh Ka Rak Duh Tuk.”​—INNA LEZHNINA

CHUAH KUM: 1981

CHUAHKEHNAK RAM: RUSSIA

TUANBIA: A NGAKCHIAT LIOAH NGAIHCHIATNAK TAMPI A TONG

HLANLIO: Ka nu le ka pa cu a hna a chet i a holh kho lomi an si, kei zong ka si ve. Kum ruk ka si tiang cu kaa nuam tuk. Mah hnuah ka nu le ka pa cu an rak i ṭhen. Ka ngakchia rih ko nain nu le va i ṭhen timi a sullam kha ka hngalh caah ka ngaih a chia tuk. Ka nu le ka pa an i ṭhen hnuah ka nu nih Chelyabinsk khua ah a ka ṭhialpi. Ka pa le ka upa tu cu Troitsk khua ah an um. A hnuah ka nu cu va a ngei ṭhan. Ka pa ei cu zu a ding tukmi a si i ka nu he atu le atu a kan velh tawn.

1993 ah ka dawt tukmi ka upa cu ti ah a pam. Kan tonmi mah thil ruangah kan chungkhar cu kan ngaih a chia tuk. Ka nu cu a lungre a theih tuk caah zu a ding i ka pa ei he an ka hrem. A nuammi nunnak hmuh ka rak duh i dawtnak hmuh zong ka duh tuk. Hnemhnak hmuh ka duh caah church pakhat hnu pakhat ah kaa pum, asinain ka hmu lo.

BAIBAL NIH KA NUNNAK A THLEN NING: Kum 13 ka si ah Jehovah Tehte pakhat a simi, sianginn kan kaiṭimi nu pakhat he kan i kom. Baibal ah an kong ṭialmi Noah le Job kong kha a ka chimh. Mah kong kha ka duh tuk. Annih nih harnak tampi lakah Pathian kha an rak biak. Mah hnu tlawmpal ah Jehovah Tehte Hna he Baibal ka cawng i an i pumhnak ah kaa pum ve.

Baibal ka hlathlai tikah biatak kong tampi ka hun hngalh. Pathian nih min a ngei ti ka hngalh tikah ka khuaruah a har tuk. (Jeremiah 33:2) “Ni hmanung bik” a simi tuchan ah a cang dingmi thil sining hna Baibal ah a dikthliar in a chimchung timi kong ka hngalhmi zong nih ka lung a ka suk tuk. (2 Timote 3:​1-5) Cun mithi an tho ṭhan lai timi kong ka hngalhmi zong nih ka lung a ka suk tuk. Cutin a si ahcun ka dawtmi ka upa he kan i tong ṭhan lai!​—Johan 5:​28, 29.

Asinain kaa nuamhnak kha ahohmanh nih an ka hrawmpi lo. Jehovah Tehte Hna kha ka nu le ka pa ei nih ral bantukin an hmuh hna. Baibal cawn ti lo ding zongin an ka hnek. Asinain ka cawnmi kong kha ka duh tuk caah Baibal kha ka rak cawn peng.

Chungkhar ralchanhnak in cu a fawi lo. Mah lengah ṭih a nungmi thil sining pakhat ka tong ṭhan. Jehovah Tehte Hna sin kaa pumh tikah a ka zul tawnmi ka naupa zong ti ah a pam ve. Cu bantuk thil ka tong ko nain Jehovah Tehte Hna nih an ka bawmh peng. Anmah he ka umṭi caan ah ka rak duh tukmi dawtnak kha ka hmuh. An biaknak cu a hmaan ti kha ka hun hngalh. Cucaah 1996 ah Jehovah Tehte pakhat in tipil ka ing.

ṬHATNAK KA HMUH NING: Miṭha pakhat a simi Dmitry he kan i umnak cu kum ruk a si cang. St. Petersburg khua i Jehovah Tehte Hna zung ṭengnge ah rian kan ṭuanṭi. A caan a rauh tikah ka zumhnak kong he aa tlaiin ka nu le ka pa hmuh ning zong a hun ṭha deuh.

Jehovah hngalhnak caanṭha ka hmuh caah kaa lawm tuk! Pathian ka biakmi nih ka nunnak kha sullam a ngeihter.

“Biahalnak Tampi Ka Ngei”​—RAUDEL RODRÍGUEZ RODRÍGUEZ

CHUAH KUM: 1959

CHUAHKEHNAK RAM: CUBA

TUANBIA: RAMKHEL LEI RALCHANHTU

HLANLIO: Cuba ram, Havana khua ah ka chuak i lamcung ah an i velh tawnnak, sifak sang pakhat ah ka ṭhang. Ka hun upat deuh tikah judo le a dang zaanglente celhnak phun pawl kha celh ka duh.

Ca ka thiam caah ka nu le ka pa nih sianghleiruun kai dingin tha an ka pek. Sianghleiruun ka kai lioah kan ram i ramkhel lei sining hi thlen a hau tiah ka ruah. Cucaah ralchanhnak tuah dingin bia ka khiah. Nikhat ah sianginn ka kaiṭi hawi pakhat he palik bawi pakhat i a meithal kha kan chuh. I velh pah in kan chuh caah palik bawi i a lu cu hma fakpi in a pu. Mah ruangah kan pahnih in thong thlak kan si i meithal in thah dingin bia an kan chahpiak. Mah lioah kum 20 lawng ka si rih nain thah ka si cang lai!

Thonginn ah keimah lawngin ka um lioah meithal in thah dingin a rami hna hmaiah zeitindah ka um lai ti kha ka tuahchunh. Ka ṭihnak langhter kha ka duh lo. Mah lioah biahalnak tampi ka lung chungah a hung chuak. ‘Hi vawlei ah dinlonnak hi zeicah mah tlukin a tam? Nunnak cu mah lawng hi maw a si?’ timi kong kha hngalh ka duh tuk.

BAIBAL NIH KA NUNNAK A THLEN NING: Thih dan an kan pekmi kha kum 30 thongtlak dingin an kan thlenpiak. Cutin an kan thlenpiak caah an zumhnak ruangah thongthlak a simi Jehovah Tehte cheukhat he kan i tong. A ral a ṭha i dai tein a ummi Jehovah Tehte Hna kha ka uar tuk hna. A ding loin thongthlak an si ko nain an thin a hung lo i an lung zong a fak lo.

Minung ca i Pathian tinhnak kong he aa tlaiin an ka chimh. Pathian nih vawlei ah ṭhatlonak le dinlonak kha a hrawh lai i a nuammi paradis dum in a thlen cang lai ti kha Baibal in an ka hmuhsak. Cun vawlei ah miṭha lawng an um lai i a tlingmi nunnak in zungzal an nung lai timi kong zong an ka chimh.​—Salm 37:29.

An ka chimhmi kong cu ka duh ko nain an ziaza le ka ziaza cu aa dang tuk. Ramkhel lei ah khoikalei hmanh ṭan lo le midang ngaihthiam ding ti cu ka caah a si kho lo tiah ka ruah. Cucaah keimah tein Baibal rel awkah bia ka khiah. Ka rel dih tikah Jehovah Tehte Hna lawng hi hlanlio Khrihfa hna bantukin a nungmi an si ti kha ka hun hngalh.

Baibal ka hlathlai tikah ka nunnak ah thlennak nganpi cheukhat tuah a hau ti kha ka hun hngalh. Tahchunhnak ah, volhpamh ka hmanmi kha kaa thlen a hau i kuak zong kaa phiat a hau. Ramkhel lei zongah khoikalei hmanhah ka ṭan lo a hau. Cutin thlennak tuah cu a har ko nain a donghnak ah Jehovah Pathian bawmhnak thawngin ka rak i thleng kho.

Thlennak ka tuahmi lakah kaa harh bikmi pakhat cu thinhun i sum kha a si. Ka thin kaa sum khawh nakhnga atu tiang thla ka cam peng rih. “Thinhunlei ah a khul a nuarmi cu thazaang a ṭhawngmi nakin a ṭha deuh. A lungthin aa uk khomi cu khuapi a latu nakin a ṭha deuh” timi Baibal caang hna nih tampi a ka bawmh.​—Phungthlukbia 16:​32

1991 ah Jehovah Tehte pakhat in thonginn i ti kuang chungah tipil ka rak ing. Kum khat a rauh hnuah thongtla cheukhat kha thonginn in an kan chuah i kan chungkhat an umnak Spain ram ah an kan kuat. Spain ram ka phanh tikah Jehovah Tehte Hna i an pumhnak ah kaa pum colh. Mah ram i unau pawl nih a ṭhami hawikom bantukin an ka conglawmh. Cun keimah tein kaa cawm khawh nakhnga zong an ka bawmh.

ṬHATNAK KA HMUH NING: Ka nupi le ka fanu pahnih he Pathian kan biak khawh caah kaa lawm tuk. Midang nih Baibal kong an hngalh nakhnga ka caan tampi kha hmangin ka bawmh hna. A thi cang dingmi mino pa pakhat kong kha a caancaan ah ka ruat tawn. Mah caan thawkin ka hmuhmi thil vialte cungah kaa lawm tuk. Ka nun lengah ruahchannak zong ka ngei cang. “Thihnak a um ti lai lo” i dinnak in a khat laimi caan kha ka hngak.​—Biathlam 21:​3, 4.

[Cahmai 19nak i a tawinak in langhternak]

“Pathian nih min a ngei ti ka hngalh tikah ka khuaruah a har tuk”

[Hmanthlak]

Ka vapa he a hna a chet i a holh kho lomi pakhat kha kut holh hmangin phung kan chimh lio