Ka ngakhciat lio tein kokek thil an i dawhnak kha ka duh tuk hna. Finland Laifang, ka chuahkehnak khua Jyväskylä pawngah a ummi aa dawh tukmi tupi le tikulh hna ah kan chungkhar ningin hrimhnak hmuh awkah kan kal tawn. Kei cu saram a daw tukmi ka si caah ka ngakchiat lio ahcun ka hmuhmi uico le chizawh paoh kha pawm ka duh hna. Ka hun upat tikah mi nih saram pawl an hremmi hna ka hmuh tikah ka lung a ṭha lo. A hnuah keimah he kan lungput aa khatmi saram zalonnak phu pakhat ah ka hun i tel.

Saram zalonnak kilven awkah lungtho tein rian kan ṭuan. A konglam hna kha kan chimh hna i sahmul zuarnak dawr le saram khuaihlainak dawr hna kha kan ralchanh i duh lonak kan langhter. Saram kilvennak phu thar pakhat zong kan dirh. Thlennak kong he aa tlaiin kan rian ṭuan ning cheukhat ruangah nawlngeitu pawl he atule atu buaibainak kan rak ngei. Atule atu tlaih ka si i biaceihnak zungah ka phan lengmang.

Saram pawl caah ka thing a phan lengah vawleicung pumpi ah a cangmi buaibainak ruang zongah ka lungre a thei. A donghnak ahcun Ramkip Luatnak Hmuhnak Phu le Kokek thil zohkhenhnak phu lengah a dang minung phu tampi zongah kaa tel. Mah cawlcanghnak dihlak ah ka si khawh chungin ka bawmh hna. Mi sifak pawl, a ṭamhalmi pawl le bawmtu a ngei lomi hna lei ah ṭangin bia ka chimpiak hna.

Asinain duhsah tein ka hun theihthiammi cu vawlei ka thleng kho lo timi kha a si. Phu cheukhat nih buaibainak fatete pawl cu an tawnghtham khawh ko nain buaibainak ngan deuh pawl cu an zualter chinmi a lo. Miṭhalo pawl nih vawlei an hrawhmi kha mi nih zei ah an rel lo. Mah tikah zeihmanh ka tuah kho lo timi ruahnak ka hun ngei.

Bawmtu ka ngei lo timi ruahnak ka hun ngeih tikah Baibal le Pathian kong kha ka hun ruah. Hlanah Jehovah Tehte Hna he Baibal ka rak cawng bal. An ka dawtnak le an ka zohkhenhnak kha ka sunsak ko nain ka nunning thlen dingin cun timhcia ka rak si rih lo. Asinain atu tan ahcun thil sining cu aa thleng cang.

Baibal kha ka lak i ka hun rel. Mah nih hnemhnak tampi a ka pek. Saram pawl kha zaangfahnak he pehtlaih ding timi Baibal caang kha tampi ka hmuh. Tahchunhnak ah, Phungthlukbia 12:10 ah hitin a ti: “Miṭha mi nih cun an saṭil kha an zawn an ruah hna.” Vawleicung ah a ummi buaibainak hna cu Pathian ruangah a si lo ti zong kha ka hun hngalh. A tak ti ahcun mi pawl nih Pathian lamhruainak kha an zulh lo caah thil sining hna hi a chiat chinmi a si. Jehovah dawtnak le lungsaunak kong ka hun hngalh tikah mah nih ka lung a ka suk tuk.​—Salm 103:​8-​14.

Mah caan chungah Baibal Cawnpiakmi Taktak Cu Zeidah A Si? timi cauk cah khawhnak coupon kha ka hmuh. Mah tikah coupon kha ka phih i ka kuat. Mah hnu tlawmpal ah Jehovah Tehte nuva tuahkhat cu ka sinah an ra. Baibal cawnpiak dingin an ka hal i ka cohlan. Mah caan thawkin ka hun i pum. Baibal in ka cawnmi kong hna kha ka sunsak tuk.

Baibal ruangah thlennak tampi ka rak tuah khawh. Kuak zuk kha ka ngol i zu zong tampi ka ding ti lo. Zohdawh tein thil kaa hruk i bia ṭhalo zong ka chim ti lo. Cun nawlngeitu pawl cung i ka lungput zong kha ka thlen. (Rom 13:1) Mah lengah a ṭha lomi ka nunning zong kha ka hun hlawt.

Minung le saram zalonnak phu cung i ka hmuh ning thlen cu ka caah a har bikmi a si. Ka hmuhning kha ka rak thleng kho colh lo. A hmasa ahcun mah phu in ka chuah ahcun an cungah zumhawktlak loin ka um a si lai tiah kaa ruah. Asinain Pathian Pennak lawng nih vawlei caah a hmaanmi ruahchannak a pek khawh ti kha ka hun hngalhthiam. Cucaah Pathian Pennak kha bawmh dingin le mah kong kha midang sinah chim awkah ka si khawh chungin kaa zuam lai tiah biakhiahnak ka tuah.​—Matthai 6:​33.

Thlennak tuah dingin aa zuammi pakhat ka si caah mi pawl kha miṭha le miṭhalo tiin phuhnih in ka hmuh tawn hna. Miṭhalo in ka hmuhmi hna kha ralchanh awkah timhcia ka si. Asinain Baibal ruangah midang cungah huatnak lungput ka ngei ti lo, an dihlak cungah Khrihfa dawtnak tu langhter awkah kaa zuam. (Matthai 5:​44) Midang sinah Pathian Pennak kong thawngṭha ka chimnak thawngin mah dawtnak kha ka langhter. Mah rian nih daihnak, lunglawmhnak le midang pawl kha a hmaanmi ruahchannak a pekmi hna ka hmuh tikah kaa lawm tuk.

Thil sining kong he aa tlaiin Pathian sinah ka ap dih caah lungdaihnak ka hmu. Sertu pakhat in Pathian nih minung le saram pawl ningcang loin pehtlaih an simi le mi nih aa dawh tukmi hi vawlei an hrawhmi kha a zungzal in nawl a awnh hna lai lo ti kha ka zumh. A rauhhlan ah Pathian Pennak nih a rawkmi thil vialte kha a remh dih cang lai. (Isaiah 11:​1-9) Mah biatak kong kha ka hngalh lawng si loin midang pawl nih mah kong an zumh nakhnga ka chimh khawh hna ca zongah kaa lawm tuk. Vawlei ka thlen lai timi ruahnak ka ngei ti lo.