A HMAANMI Khrihfa nuai tampi nih Christmas puai kha an tuah lo. Mah puai an tuah lo caah zeitindah an um? Pakhatkhat a bau tiah an ruat maw? An fale nih tah pakhatkhat kan sung timi ruahnak an ngei maw? Mah kong he aa tlaiin vawleicung pumpi ah a ummi Jehovah Tehte Hna nih an chimmi kha zohhmanh hna u sih.

Jesuh Khrih Philhlonak: “Jehovah Tehte pakhat ka si hlanah church ah ka kal setsai lo. Ka kal hmanhah Christmas asiloah Easter puai lawngah a si. Cu bantuk caan zongah Jesuh Khrih kong kha ka ruat bal lo. Atu cu Christmas puai ka tuah ti lo, mah canah Jehovah Tehte Hna pumhnak ah zarhkhat ah voihnih kaa pum i midang zong Jesuh kong he aa tlaiin Baibal chimmi kha ka cawnpiak hna!”​—EVE, AUSTRALIA.

Peknak in hmuhmi lawmhnak: “Kaa ruahchan lomi laksawng ka hmuh tikah kaa nuam tuk. Mah kha a duh zong ka duh tuk. Midang caah card tete tuah le zuk suai kha ka duh tuk. Cutin ka tuahpiak hna tikah an i lawm i mah nih keimah zong a ka lawmhter.”​—REUBEN, CHAKLEI IRELAND.

A herhmi hna bawmhnak: “A dam lomi caah rawl chuanpiak kha ka duh. A caan ah an i nuamh nakhnga pangpar, changreu asiloah laksawng hmetete ka put hna. Zeitik caan paohah len khawh an si caah cutin tuahpiak kha ka duh tuk.”​—EMILY, AUSTRALIA.

Chungkhar i tonnak: “Kan chungkhar ningin kan i ton tikah kan fale nih nulepa, nileṭang, pilepu le dankhat an unau pawl kha ṭha tein an hngalh hna. Cutin tuah awkah rikhiahmi ni a um lo caah lungretheih a hau lo. A tak ti ahcun kan chungkhar nih kan dawt hna caah kan va lenmi hna a si.”​—WENDY, CAYMAN TIKULH.

Daihnak: “Christmas caan ah tuah dingmi thil a tam tuk caah daihnak kong he aa tlaiin a ruatmi an um lo ti awk tluk a si. Minung ca i Baibal biakam kha ka hngalh cang caah lungdaihnak ka hmu. Ka fale i an hmailei cu nuamhnak in a khat lai ti kha ka hngalh.”​—SANDRA, SPAIN.