Eden Dum Na Caah A Biapitnak A Ruang

GENESIS i Eden dum kong he aa tlaiin Baibal lei mifim pawl nih ralchanh in an chimmi lakah khuaruahhar bik a simi pakhat cu mah kong kha Baibal cauk i a dang ṭhen hna nih a cohlang lo tiah an timi kha a si. Tahchunhnak ah, Biaknaklei Professor Paul Morris nih “Eden dum kong he aa tlaiin Baibal ah a chim chapmi a um ti lo” tiah a ti. Mah kha Baibal lei mifim pawl nih an cohlan ko lai nain a hmaanmi a kong he cun aa ralkahmi a si.

Baibal ah Eden dum, Adam, Evi le rul kong kha atu le atu a cherhchan lengmang. * Asinain biaknaklei hruaitu le Baibal a soiselmi pawl an palhnak cu Baibal lei mifim pawl an palhmi nakin a tam deuh. Annih nih Genesis cauk ah langhtermi Eden dum kong an zumh lonak thawngin ralchanh awkah an i zuam. Mah kong he aa tlaimi an ruahnak nih mi tampi kha a iap hna. Zeitin in dah?

Eden dum ah a cangmi kong kan hngalhthiam lawngah Baibal chung i a dang cauk ah a ummi a kong pawl kha kan hngalhthiam khawh lai. Tahchunhnak ah, Baibal cu mi nih hngalh an duhmi, a biapimi biahalnak a phi pawl hngalhter ding timi tinhnak he ṭialmi a si. Eden dum ah a cangmi kong he aa pehtlaimi biahalnak a phi pawl kha Baibal ah atu le atu langhter a si. Tahchunhnak cheukhat kha zohhmanh hna u sih.

● Zeicah kan tar i kan thih? Adam le Evi nih Jehovah nawl an ngaih ahcun zungzal in an nung kho lai. Pathian an ralchanh lawngah an thi lai. Pathian an ralchanh ni thawkin an rak thi. (Genesis 2:​16, 17; 3:​19) Cucaah mitling an sinak kha an sung i an tefa pawl kha sualnak le tlinlonak an roh hna. Cucaah Baibal nih hitin a ti: “Sualnak cu mipa pakhat thawngin vawleicung ah hin a tlung i cu sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.”​—Rom 5:​12.

● Zeicah Pathian nih ṭhatlonak kha umnak nawl a awnh? Mi nih ṭhatnak an hmuh lo nakhnga Pathian nih  thilṭha kha a thuh i lihbia a chim tiah Satan nih Eden dum ah sual a rak puh. (Genesis 3:​3-5) Cuticun mi nih Pathian i a dingmi uknak cungah lunghrinnak an ngeih nakhnga Satan nih a rak tuah. Adam le Evi nih Satan hnu kha an zulh i Pathian i lianngan bik uktu a sinak kha an rak hlawt. Cucaah a ṭha le a ṭhalo kong ah kanmah tein biakhiahnak kan tuah khawh tiah an ti i cutin an rak tuah. Mah buaibainak ṭha tein tawnghtham khawhnak lam cu pakhat lawng a si ti kha a tlingmi dinnak le fimnak a ngeitu Pathian nih a hngalh. Mah cu minung nih an i thimmi ningin anmah tein i uk awkah a caan pek kha a si. Asinain Satan ruangah a chuakmi ṭhatlonak nih a biapimi biatak kha duhsah duhsah in a hun langhter. Mah cu Pathian i bochan loin kanmah tein kan i uk kho lo timi biatak kha a si.​—Jeremiah 10:23.

● Vawlei caah Pathian aa tinhnak cu zeidah a si? Jehovah nih Eden dum ah vawlei aa dawh nakhnga caah phunglam a rak ser. Hi vawleicung pumpi kha Eden dum bantuk siter awk, an tefa in khahter awk le “uk” awkah Pathian nih Adam le Evi kha rian a rak pek hna. (Genesis 1:​28) Cucaah Pathian aa tinhnak cu Adam le Evi i a tling i a lung aa rualmi an tefa hna in vawlei kha paradis ah canter kha a si. Pathian tinhnak a tlinter khomi a kong tampi cu Baibal ah a um.

● Zeicah Jesuh Khrih cu vawleicung ah a rak rat? Eden dum ah a cangmi ralchanhnak ruangah Adam le Evi tefa vialte cungah thihnak a rak tlung. Asinain Pathian nih dawtnak he ruahchannak a rak pek hna. Pathian nih a fapa kha vawleicung ah a thlah i tlanhnak man caah a nunnak kha a rak pekter. (Matthai 20:28) Jesuh cu “Adam hmanung bik” a si. Adam nih a tuah khawh lomi thil kha Jesuh nih a rak tuah. Jesuh nih Jehovah nawl a ngaihnak thawngin a tlingmi pakhat in a rak um kho peng. Mah hnuah a nunnak kha raithawinak caah lungtho tein a pek. Cuticun zumhfekmi hna i an sualnak cu ngaihthiam a si lai i Adam le Evi nih sualnak an rak tuah hlanah an hmuhmi nunnak phun kha duhsah in an hmuh ṭhan lai. (1 Korin 15:22, 45; Johan 3:​16) Cucaah hi vawlei kha a nuammi Eden dum bantuk si awkah thlen ding timi Pathian tinhnak cu a tling hrimhrim lai tiah Jesuh nih a ti. *

Pathian tinhnak cu a fiang set lomi biaknaklei zumhnak pakhat men a si lo. Mah cu a cang taktak hnga dingmi kha a si. Saram le minung pawl an rak umṭinak, Eden dum cu a um taktakmi a rak si. Cucaah hmailei kong he aa tlaimi Pathian biakam pawl zong a rauhhlan ah a tling cang lai. Nangtah mah ah um na duh maw? Mah cu nangmah cungah aa hngatmi a si. Pathian nih palhnak a tuahmi hna i telin mi tam khawh chung tam nih mah bantuk ruahchannak kha ngei hna seh ti a duh. Palhnak a tuahmi hna hmanh kha ngeihter a duh hna.​—1 Timote 2:​3, 4.

Tung cung i thlai a simi Jesuh cu a thih lai ah a pawngah a ummi, misual pa pakhat he an rak i chawn. Mah pa cu sualnak a tuahmi a si. Thih dan pek awk tlak ka si ti aa hngalh ko nain hnemhnak le ruahchannak hmuh awkah Jesuh kha a rak hal. Jesuh nih zeitindah a rak lehrulh? Hitin a ti: “Paradis ah keimah sinah na um lai.” (Luka 23:43) Jesuh nih mah misual pa kha tho ṭhan sehlaw Eden dum bantuk a simi Paradis ah zungzal in umter aan duh ahcun nang zong cutin umter aan duh ve lai ti cu a fiang ko. Jehovah le Jesuh nih cutin tuah an duh. Mah bantuk hmailei ruahchannak ngeih na duh ahcun Eden dum a sertu Pathian kong kha na si khawh chungin cawng.

[A Tanglei Fianternak]

 [Cahmai 10nak i rinli kulh]

BAIBAL HE AA PEHTLAIMI CHIMCHUNGBIA HNA

“Nangmah le nu cu nan i hua lai, a tefa le na tefa cu ral an si lai. Mi nih na lu kha rial an in zuam lai i nang nih an kedil kha cuk naa zuam ve lai.”​—Genesis 3:​15.

Mah cu Pathian nih Eden dum ah hmasa bik a chimmi chimchungbia a si. Mah ah aa telmi pali cu minu, minu tefa, rul le rul tefa an si. Zeiti lam in dah an i ‘huat’?

RUL

Satan Khuachia.​—Biathlam 12:9.

MINU

Vancungmi in dirh a simi Jehovah i vancunglei a bupi. (Galati 4:​26, 27) Isaiah ah mah “nu” kong le mah nu nih hmailei ah Pathian thimmi miphun thar a hrin lai timi kong kha a chimchung.​—Isaiah 54:1; 66:8.

RUL TEFA

Satan duhnak ningin thil a tuahmi an si.​—Johan 8:​44.

MINU TEFA

Minu tefa i a biapi bikmi cu Jesuh Khrih a si. Jesuh cu Jehovah i vancung a bupi in a rami a si. Mah “tefa” ah Khrih unau pawl an i tel i annih cu Jesuh he vancung ah uknak rian ṭuan dingin rian pek an si. “Pathian mi [Israel]” cu Jesuh Khrih a naule in dirhmi a si.​—Galati 3:​16, 29; 6:⁠16; Genesis 22:18.

KEDIL HMA

Messiah kha zungzal fahnak si loin chikkhat fahnak a pemi hma a si. Satan nih Jesuh kha vawlei ah a thihternak thawngin a tei. Asinain Jesuh cu a rak tho ṭhan.

LU HMA

Satan a thihtermi hma a si. Jesuh nih Satan kha zungzal ca in a hrawh cang lai. Mah hlanah Jesuh nih Eden dum ah Satan nih a chuahtermi ṭhatlonak vialte kha a hrawh lai.​—1 Johan 3:8; Biathlam 20:10.

Fiang tein le tling tein langhtermi Baibal i a biapi bikmi a kong hngalh awkah Jehovah Tehte Hna chuahmi Baibal​—A Chungah Zei Thawngpang dah A Um? timi brochure ah zoh.

[Hmanthlak]

Sualnak ruangah a chuakmi thil ṭhalo kha Adam le Evi nih an ton