JESUH nih thlacamnak kong he aa tlaiin a cawnpiak tawn hna. A chan lio i Judah mi hruaitu pawl nih “zatlang lam tonnak” ah thla an rak cam. Zeicah? “Mi nih kan hmu hna seh” ti an duh caah a si. Judah mi biaknak cungah an i zuamnak kha mi nih kan thangṭhat hna seh ti an duh caah a si. Mi tam deuh nih cun an thlacamnak kha ngaihpiak an si nakhnga “bia tampi” chim a hau tiah an ruah caah caan saupi chung an thlacammi kha atule atu an nolh. (Matthai 6:​5-8) Jesuh nih cu bantuk phungphai cu zeihmanh san a tlai lo ti a langhternak thawngin lungthin ṭha a ngeimi hna nih thla an cam tikah zei hna dah an hrial a hau ti kha hngalh awkah a bawmh hna. Asinain Jesuh nih zeitindah thlacam lo ding a si ti lawng kha a cawnpiak hna lo.

Jesuh nih Pathian min thianter a si nakhnga, a Pennak dirh a si nakhnga le Pathian duhnak tuah a si nakhnga kong hna kha cam dingin a kan cawnpiak. Cun Jesuh nih kanmah pumpak caah thlacam cu aa tlakmi a si ti zongin a kan cawnpiak. (Matthai 6:​9-​13; Luka 11:​2-4) Cun kan thlacamnak ngaihpiak kan si nakhnga fakpi in i zuam, zumhnak ngeih le toidornak ngeih a hau ti kha tahchunhnak hna hmang zong in a kan cawnpiak. (Luka 11:​5-​13; 18:​1-​14) Cun a nunning zongin a cawnpiaknak kha hmual a ngeihter.​—Matthai 14:23; Marka 1:​35.

Cu bantuk lamhruainak nih a zultu pawl kha an thlacamnak ṭhanchoter awkah a bawmh hna ti cu a fiang ko. Asinain Jesuh nih vawlei a nunnak hmanung bik zan lawngah thlacam a biapit tuknak kong kha a rak cawnpiak hna.

Jesuh nih vawlei a nunnak hmanung bik zan ah a caan tam deuh kha zumhfekmi a zultu pawl thapeknak caah a rak hman. Mah zan cu thil thar kong hna cawnpiak awkah aa tlakmi caan a si. Jesuh nih hitin a ti: “Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo.” Cun thazaang a pemi mah bia hi a kamh hna: “Pa sunparnak cu Fapa thawngin a langh khawh nakhnga, ka min in nan halmi paoh cu kaan tuahpiak hna lai. Zeipaoh kan min in nan ka hal ahcun ka tuah lai.” Cun a donghnak ah hitin a ti: “Atu tiangah cun ka min in zeihmanh nan hal rih lo, hal u law nan hmuh lai, cu ti nan tuah ahcun nan i lawmhnak cu a tling lai.”​—Johan 14:​6, 13, 14; 16:24.

Mah bia hna cu a biapi tukmi an si. Cauk pakhat nih mah kha “thlacamnak kong he aa tlaiin a biapimi thlennak” in a langhter. Jesuh nih Pathian sinah si loin amah sinah thla nan cam awk a si a ti duhnak a si lo. Mah canah Jehovah Pathian naih khawhnak lam thar tu kha a chim duhmi a si.

Pathian nih zumhfekmi a salle thlacamnak kha a ngaihpiak peng hna. (1 Samuel 1:​9-​19; Salm 65:2) Asinain Israel mi pawl nih Pathian biakammi miphun an si thawkin an thlacamnak kha Pathian nih kan ngaihpiak seh ti an duh ahcun Pathian thimmi miphun an si ti kha an hngalh a hau. A hnuah Solomon uknak thawkin pumhnak inn hna cu Pathian thimmi raithawinak hmun in cohlan a rak si. (Deuteronomi 9:​29; 2 Chanrelnak 6:​32, 33) Asinain cu bantuk biaknak timhtuahnak cu chikkhat ca lawng a si. Lamkaltu Paul nih a ṭial bantukin Israel mi pawl pek an simi Nawlbia le biakinn ah an pekchanhmi raithawinak hna cu “a ra dingmi thil ṭha muithlam ceo a rak si.” (Hebru 10:​1, 2) Muithlam canah a taktak in thlen a hau. (Kolose 2:​17) AD 33 thawkin mi pakhat le Jehovah an i pehtlaihnak cu Moses Nawlbia cungah hram aa bunh ti lo. Mah canah Nawlbia nih a langhtermi Jesuh Khrih nawlngaihnak cung tu ah hram aa bunh.​—Johan 15:14-​16; Galati 3:​24, 25.

Jesuh nih Jehovah kan naih khawh nakhnga a ṭha tukmi hram pakhat a kan sialpiak. Cun Jesuh nih amahle amah kha kan thlacamnak kha Pathian nih a ngaih i a kan leh nakhnga lam a kan hunpiaktu le ṭhawnnak a ngeimi hawikom pakhat zongin aa langhter. Kan caah cutin tuah dingin Jesuh kha zeinihdah a forh?

Kan dihlak in sualnak in hrinmi kan si caah kan tuahmi thil asiloah kan pekmi raithawinak thawngin kan sualnak cu hloh khawh a si lo asiloah a thiangmi Pathian, Jehovah he a ṭhami pehtlaihnak ngeih awkah aa tlakmi kan si lo. (Rom 3:​20, 24; Hebru 1:​3, 4) Asinain Jesuh nih a tlingmi a nunnak kha a peknak thawngin tlanh awkah aa tlakmi mi pawl i an sualnak kha a khuhpiak hna. (Rom 5:​12, 18, 19) Atu ah an sualnak khuhpiak a simi poah cu Jehovah hmaiah a thiangmi dirhmun an ngei i Pathian sinah “ṭih lo tein” biachimnak caanṭha zong an hmu. Asinain mah cu Jesuh raithawinak man kha an zumh i a min in thla an cam lawngah a si kho.​—Efesa 3:​11, 12.

Jesuh min in thla kan cam tikah Pathian tinhnak a tlin khawh nakhnga Jesuh rian a simi a tlawm bik ah mah lam pathum kan zumh hi kan langhtermi a si: (1) Jesuh cu kan sualnak ngaihthiam awkah a hrampi a simi pekchanhmi “Pathian Tuufa” a si. (2) Jesuh cu Jehovah nih a thawhter ṭhan i atu ah tlanhnak man in hmuhmi ṭhathnemhnak kong tlangtlak awkah “Tlangbawi Ngan” in rian a ṭuan cang. (3) Cun amah lawng hi Jehovah kan naih khawhnak “lam” a si.​—Johan 1:​29; 14:6; Hebru 4:​14, 15.

Jesuh min hmangin thla kan cammi cu amah kan thangṭhatmi a si. Cu bantuk thangṭhatnak cu aa tlakmi a si. Zeicahtiah Jehovah duhnak cu ‘Jesuh upatnat min caah cun an khuk an i bil lai i Pathian kan Pa sunparnak caah cun mi vialte nih Jesuh cu Bawipa a si tiah an ti lai’ ti hi a si. (Filipi 2:​10, 11) Mah nakin a biapi deuhmi cu Jesuh min hmangin thla kan cammi nih kanmah caah a Fapa a kan petu Jehovah thang kha a ṭhatter.​—Johan 3:​16.

Jesuh i a biapimi a dirhmun kong hngalh awkah Baibal nih Jesuh kha min a phunphun in a auh. Mah nih kan caah Jesuh nih a kan tuahpiak cangmi, a kan tuahpiak liomi le a kan tuahpiak laimi thluachuah hna kha hngalhthiam awkah a kan bawmh. ( “Jesuh I A Biapimi A Rian” timi rinli kulh ah zoh.) Jesuh cu “min vialte lak i min cungnung bik” kha pek a si. Cun van le vawlei i nawlngeihnak vialte zong kha pek a si.​—Filipi 2:9; Matthai 28:18.

Jehovah nih kan thlacamnak kha ngai seh ti kan duh ahcun Jesuh min in thla kan cam a hau. (Johan 14:13, 14) Asinain “Jesuh min in” thlacam timi biafang kha kan chim tawn sawhsawhmi bantukin atule atu kan nolh awk a si lo. Zeicah?

Tahchunhnak pakhat in zohhmanh u sih. Chawlettu pakhat sinin cakuat na hmuh tikah cakuat donghnak ah “upatnak he” timi biafang in a donghhtermi cu a phung a si. Mah biafang cu chawlettu pa i a intuarnak taktak a si tiah na ruat maw? Asiloah cakuat donghnak ah ṭial tawnmi in dah na ruah? Cucaah Jesuh min hmangin thla kan cam tikah chawlehnak rian kong he aa tlaimi cakuat donghnak ah ṭial tawnmi ca nakin sullam a ngei deuhmi a si a hau. “A zungzal in thlacam” a hau ko nain kan chim pengmi bia lawng kha si loin “lungthin dihlak in” kan cam.​—1 Thessalon 5:​17; Salm 119:145.

“Jesuh min in” timi biafang kha kan chim pengmi biafang a si nakhnga lo zeitindah kan hrial khawh? A ṭha tukmi Jesuh sining kong hna kha ruat. Cun na caah Jesuh nih aan tuahpiakmi kong le zei hna dah tuahpiak an duh rih timi kong hna zong kha ruat. Jehovah nih a Fapa a hmannak a ṭha tukmi lam hna caah Jehovah kha thangṭhat law a sinah thlacamnak in lawmhnak bia chim. Cutin na tuah ahcun mah Jesuh biakam hi na zumh chinchin lai: “Ka Pa nih ka min in nan halmi paoh cu aan pek hna.”​—Johan 16:23.