Jesuh Tuahmi Khuaruahhar Thil Hna​—Zeidah Na Cawn Khawh?

JESUH vawleicung a nunnak kong he aa tlaiin Baibal tuanbia hna ah a hrampi Greek holh in “khuaruahhar” timi biafang voikhat hmanh a hmang bal lo ti kha na hngalh ahcun na khuaruah a har ko lai. A caan ah “khuaruahhar” tiah lehmi Greek biafang (dyʹna·mis) cu a cafang ningin “ṭhawnnak” timi sullam a ngei. (Luka 8:46) Mah biafang kha “thil ti khawhnak sining” asiloah “ṭhawnnak aa telmi tuahsernak” ti zongin leh khawh a si. (Matthai 11:20; 25:15) Baibal lei mifim pakhat chimmi ningin mah Greek biafang nih “liim a si cangmi a nganmi tuahsernak le cutin a liimtertu ṭhawnnak tiin a hleiin a langhter. A cangmi thil hna kha Pathian ṭhawnnak a langhtertu thil in langhter an si.”

A dang Greek biafang (teʹras) cu “thil lianngan” asiloah “khuaruahharmi thil” tiah leh a si tawn. (Johan 4:48; Lamkaltu 2:19) Mah biafang cu a hmutu hna cungah huham a ngei ti kha a hleiin langhter a si. Atu le atu mibupi le Jesuh zultu pawl cu Jesuh i ṭhawnnak aa telmi tuahsernak ruangah an khuaruah a har.​—Marka 2:​12; 4:​41; 6:​51; Luka 9:​43.

Jesuh tuahmi khuaruahhar thil a langhtertu a pathumnak Greek biafang (se·meiʹon) cu “hmelchunhnak” timi sullam a ngei. Baibal lei mifim Robert Deffinbaugh nih mah nih “khuaruahhar thil hna i a thukmi a sullam cungah lungthin a kan pekter” tiah a ti. Cun hitin a ti chap: “Hmelchunhnak timi cu khuaruahhar thil an si i mah nih kan Bawipa Jesuh kong he aa tlaiin hngalh awk a simi biatak kong kha a kan hngalhter.”

Hlennak Maw Asiloah Pathian Pekmi Ṭhawnnak Dah?

Jesuh tuahmi khuaruahhar thil hna cu mi pawl nuamhter awkah tuahmi hlennak men a si tiah Baibal nih a chim lo. Mah cu Jesuh nih mino pakhat sinin khuachia a ṭhawlmi bantukin “Pathian ṭhawnnak” a langhtermi an si. (Luka 9:37-43) Mah ṭhawnnak aa telmi tuahsernak cu ‘a ṭhawnnak a lianngan hringhranmi’ Pathian, Lianngan Bik Pathian caah tuah khawh lomi thil a si lai maw? (Isaiah 40:26) A si hrimhrim lo.

Thawngṭha Baibal cauk ah Jesuh tuahmi khuaruahhar thil 35 langhter a si. Asinain Jesuh nih voi zeizat dah khuaruahhar thil a tuah timi kong cu a langhter lo. Tahchunhnak ah, Matthai 14:14 ah hitin a ti: “Jesuh nih mi zapi kha a hmuh hna tikah a zaang an fak ngaingai. Cucaah cun an mizaw hna kha a damter hna.” Mah lioah minung pa zeizah dah a damter hna ti kha kan hngal lo.

Mah ṭhawnnak aa telmi tuahsernak hna cu Jesuh cu Pathian fapa a si ti le biakamhmi Messiah a si ti langhternak ah a biapi tukmi an si. Jesuh nih Pathian pekmi ṭhawnnak ruangah khuaruahhar thil a tuah khawhmi a si tiah Baibal nih a ti. Lamkaltu Peter nih Jesuh kong he aa tlaiin hitin a ti: “Pathian nih rian a fialmi a si ti kha Pathian nih amah thawngin a tuahmi khuaruahharnak te hna, hmelchunhnak te hna le thil liangngan hna nih khan an langhter ko; hi ka chimmi hi nanmah hrimhrim nih nan hngalhmi an si, zeicahtiah nanmah lak hrimhrim ah a rak tuahmi thil an si.” (Lamkaltu 2:22) Peter nih hitin a ti chap: “Pathian nih Nazareth khuami Jesuh kha Thiang Thlarau le ṭhawnnak a toih i Pathian nih a umpi caah zeitindah khuazakip ah aa chawh i khuachia ṭhawnnak tangah a ummi vilate a damter hna kha a si.”​—Lamkaltu 10:37, 38.

Jesuh tuahmi khuaruahhar thil hna cu a chimmi kong he aa pehtlaimi an si. Mi nih Jesuh cawnpiaknak le khuaruahhar thil a tuahmi pakhat an lehrulh ning kong kha Marka 1:21-27 ah a langhter. Marka 1:22 ah mi pawl cu Jesuh nih “hmualngei ngaiin a cawnpiak hna caah an khuaruah a har” tiah a ti. Cun khuachia a ṭhawl tikah mi pawl cu “an khuaruah a har tuk hringhran” tiah caang 27nak ah a langhter. Cucaah ṭhawnnak aa telmi Jesuh tuahsernak le a chimmi thawngṭha nih Jesuh cu biakamhmi Messiah a si ti kha a kan hngalhter.

Jesuh nih Messiah ka si ti lawngin a rak ti lo. A chimmi bia, a tuahsernak le khuaruahhar thil a tuahnak ah a langmi Pathian ṭhawnnak nih Jeush cu Messiah a si ti kha a langhter. A rian le a nawlngeihnak kong he aa tlaiin an hal tikah Jesuh nih ralṭha tein hitin a rak leh hna: “Kaa bochanmi cu [Tipil Petu] Johan nih tehte a khaanmi nakkhan a ngan deuhmi a si; cucu ka ṭuanmi rian, ka pa nih ṭuan awkah a ka pekmi rian hna hi an si.”​—Johan 5:36.

Zumh Khawh A Simi Langhtertu Thil Hna

Jesuh tuahmi khuaruahhar thil hna cu hlennak men an si lo i a cang taktakmi an si ti kha zeicah kan zumh khawh? Zumh khawh a simi langhtertu thil cheukhat kong kha zohhmanh hna u sih.

Jesuh nih ṭhawnnak aa telmi khuaruahhar thil hna a tuah tikah amah cungah lungthin pekter awkah aa zuam bal lo. Zei bantuk khuaruahhar thil a tuah hmanhah mi nih Pathian kha thangṭhat hna seh ti a duh. Tahchunhnah ah, mitcaw pakhat a damter hlanah Jesuh nih “Pathian ṭhawnnak cu amah damnak thawng hin a langh nakhnga caah” a tuahmi a si kha a hleiin a langhter.​—Johan 9:1-3; 11:1-4.

Jesuh cu mitleh thiam, camhthiam le zumhnak in mi a damtermi hna he aa lo lo. Mi molhternak, hlennak, a hlunghlaimi puai hna asiloah lungthin a cawlcanghtertu biaknaklei puai hna kha a tuah bal lo. Jesuh nih phunphai i tlaih tuknak hmangin mi kha a hleng hna lo. Mitcaw pahnih a sawhsawh tein a damter hna ning kong kha ruathmanh. Jesuh nih “a zaangfah hna i an mit cu a tawnghpiak hna i hmaktte ah khua an hmu kho.” (Matthai 20:29-34) Biaknaklei phunglam le puai hna asiloah i titer in thilti khawhnak langhter ti bantuk zong a hmang lo. Jesuh nih khuaruahhar thil kha mi nih an hmuhnak zapi hmaiah a tuah tawn. Ṭha tein timhtuahmi mei, pulpit le mah caah a herhmi thilri hna zong a hmang lo. Tuchan ah tuahmi khuaruahhar thil hna cu mah he i lo loin a tam deuh cu langhtertu thil hna a um lo.​—Marka 5:24-29; Luka 7:11-15.

Khuaruahhar thil in ṭhathnemhnak a hmumi hna i an zumhnak kong kha a caan ah Jesuh nih a cohlan. Asinain mi pakhat nih zumhnak a ngeih lo caah Jesuh nih khuaruahhar thil kha tuah loin a um lo. Galilee peng, Kapernuam khua ah “khuavang ngeimi tampi kha Jesuh sinah cun an ratpi hna. Bia kaakhat in thlarau ṭhalo kha a ṭhawl hna i a zawmi vialte kha a damter hna.”​—Matthai 8:16.

Jesuh nih hngalh a duh sawhsawhmi hna nih an i lungsi nakhnga tiin si loin pumsalei in bawmh a herhmi hna bawmh awkah khuaruahhar thil a tuahmi a si. (Marka 10:46-52; Luka 23:8) Mah lengah Jesuh nih lamkhatkhat in ṭhatnak a hmuh nakhnga caah khuaruahhar thil a tuah bal lo.​—Matthai 4:2-4; 10:8.

Thawngṭha Baibal Cauk Hna Tah Zeitin?

Jesuh tuahmi khuaruahhar thil hna kha Thawngṭha cauk pali in kan hngalh cang hna. Jesuh tuahmi khuaruahhar thil kong dothlat awkah mah thawngṭha cauk cu zumh khawh a sinak a ruang a um maw? A um.

Kan hngalh cang bantukin Jesuh nih khuaruahhar thil hna kha mi zapi hmaiah a rak tuah. A hlun bikmi Thawngṭha cauk hna cu mah khuaruahhar thil a hmutu hna an nun lioah ṭialmi an si. Thawngṭha cauk a ṭialtu hna i an dinfelnak kong he aa tlaiin Khuaruahhar Thil le Thawhṭhannak timi cauk nih hitin a ti: “Biaknaklei zumhnak a karh nakhnga timi timhnak he a cangmi khuaruahhar thil tampi lakah a cang taktakmi kong hna kha an thuh tiah Baibal a ṭialtu hna sualphawt cu aa tlak lomi a si. . . . Annih nih zumhawktlakmi Baibal ṭiaktu si kha an duh.”

Khrihfa biaknak a ralchanhmi Judah mi hna nih an ṭialmi khuaruahhar thil kong he aa tlaiin an rak al hna lo. Cutin tuahkhawhnak ṭhawnnak cung tu ah an thin a rak hung. (Marka 3:22-26) Asinain a hnuah ralchanhtu pawl zong nih Jesuh tuahmi khuaruahhar thil hna kha an al kho ti lo. Mah canah Jesuh tuahmi khuaruahhar thil kong he aa tlaiin AD kumzabu pakhatnak le pahnihnak ah tuanbai kong cherhchanmi thil tampi a um. Cucaah Thawngṭha cauk chungah langhtermi khuaruahhar thil hna cu a hmaanmi an si tiah ruah awkah a ruang tampi a um.

Khuaruahhar Thil A Tuahtu

Jesuh tuahmi khuaruahhar thil kong kan hlathlai tikah a hmaan ning kong he aa tlaiin zumh khawh a simi a konglam hna dothlat lawngin a za lo. Jesuh tuahmi khuaruahhar thil kong langhter awkah Thawngṭha cauk hna ah Jesuh cu zaangfahnak a ngeimi le minung cungah siaherhnak taktak a ngeimi in a langhter.

Thinghmui zawtnak a ngeimi pa pakhat nih Jesuh kha “na duh ahcun na ka thianter khawh” tiah zaangfahnak in a nawlmi kha na mitthlam ah cuanter hmanh. Jesuh nih “a zaang a fak ngaingai” caah a kut a zau, a hei tawngh i hitin a ti: “Nangmah thianter kha ka duh, va thiang cang.” Mah tikah thinghmui zawtnak a ngeimi pa cu a dam colh. (Marka 1:40-42) Cucaah Jesuh nih khuaruahhar thil tuah awkah Pathian pekmi ṭhawnnak kha hmangin mi cungah zawnruahnak a rak langhter.

Nain khua i ruak vuinak ah a kalmi hna le Jesuh an i ton tikah zeidah a rak cang? A thimi pa cu nuhmeinu i a fapa ngeihchunhte a si. Cucaah Jesuh nih mah nuhmeinu kha “a zaang a fak ngaingai i, ṭap hlah” tiah a ti. Mah hnuah a fapa kha a rak thawhter.​—Luka 7:11-15.

Jesuh tuahmi khuaruahhar thil in kan hmuhmi hnemhnak pakhat cu Jesuh cu ‘zaangfahnak a ngeimi’ le midang bawmh a hmangmi a si ti kha a si. Asinain mah khuaruahhar thil hna cu tuanbia sawhsawh men lawng an si lo. Hebru 13:8 nih “Jesuh Khrih cu nizan le nihin le zungzal in amah ning a si ko” tiah a ti. Atu ah Jesuh cu vancung ah Siangpahrang in uktu a ṭuan cang. Vawleicung a um lio i a hmanmi a Pa nih a pekmi ṭhawnnak nakin a ngan deuhmi ṭhawnnak langhter awkah timhcia a si cang. A rauhhlan ah Jesuh nih mah ṭhawnnak hna kha hmangin nawl a ngaimi hna i an zawtnak vialte kha a damter cang hna lai. Mah a ṭha tukmi hmailei ruahchannak kong kha tam deuh in hngalh awkah Jehovah Tehte Hna nih lunglawm tein an in bawmh lai.

[Hmanthlak]

Jesuh tuahmi khuaruahhar thil cu “Pathian ṭhawnnak” a langhtertu an si

[Hmanthlak]

Jesuh cu intuarnak tling a ngeimi a si