Baibal Nih An Nunning A Thlen

INN bauh in thil a firmi le tangka in lente aa celh tawnmi pakhat cu mah a ziaza hna hlawt awk le a nunning i thlen awkah zeinihdah a forh? A chimmi kha zohhmanh hna u sih.

“Rang Tlik Zuamnak Puai Kha Ka Duh Tuk.”​—RICHARD STEWART

CHUAH KUM: 1965

CHUAHKEHNAK RAM: JAMAICA

TUANBIA: TANGKA IN LENTE AA CELHMI LE MISUAL

HLANLIO: Jamaica ram, Kingston khua i mi tampi umnak sifak sang ah a ṭhangmi ka si. Cuka ah rian a ngei lomi an tampi i zaangennak zong a tampi. Misual phu hna ruangah mi pawl cu thinphang thlalau in an um. Nifatin ti awk in meithal kah thawng ka theih. 

Ka nu cu rian fakpi in a ṭuan i ka naupa le ka naunu le keimah kha kan herhmi vialte a kan tuahpiak dih. Ca a thiammi si hna seh ti a kan duh. Asinain kei cu sianginn kai ka huam lo, rang tlik zuamnak puai kha ka duh tuk. Cucaah sianginn ka tli i rang tlik zuamnak puai kha ka zoh tawn. Rang hmanh kaa cit tawn.

Rang tlik zuamnak ah tangka tampi thap in lente ka hun i celh. Ka ziaza a hun rawk thluahmah i nu tampi he nupa sualnak ka tuah. Ritnak sii ka hmang i ka nunnak caah thil ka fir. Meithal tampi zong ka ngei. Asinain thil ka rak fir lioah mi ka thah hna lo caah kaa lawm tuk.

A donghnak ah, palek nih an ka tlaih i thong an ka thlak. Thong ka chuah hnu zongah a hlan ka nunning bantukin ka nung ṭhan. A hlannak hmanhin ka sual deuh. Misual mui ka keng lo nain ka lung a khong, ka thin a tawi i ka puarhrang. Keimah zawn lawng kaa ruat i midang kha zei ka rel hna lo.

BAIBAL NIH KA NUNNAK A THLEN NING: Ka nunning a ṭhat lo tuk lioah ka nu cu Baibal a hlathlai i Jehovah Tehte pakhat a hung si. Ka nu a ziaza aa thlenmi ka hmuh caah zeinihdah cutin a thlenter ti kha hngalh ka duh tuk. Cucaah a ruang hngalh dingin kaa zuam. Cuticun Jehovah Tehte Hna he Baibal ka hun cawng.

Jehovah Tehte Hna cawnpiaknak cu a dang biaknak cawnpiaknak he aa lo lo ti kha ka hun hmuh. An cawnpiaknak cu Baibal ah hram aa bunh ti kha ka hun hngalh. Hlanlio Khrihfa hna bantukin innkhat hnu innkhat phung a chimmi cu anmah lawng an si ti zong ka hngalh. (Matthai 28:19; Lamkaltu 20:20) An karlak ah dawtnak taktak an langhtermi ka hmuh caah a hmaanmi biaknak ka hmuh cang ti kha ka hun zumh.​—Johan 13:35.

Baibal ka hlathlai tikah ka nunnak ah thlennak nganpi cheukhat tuah a hau ti kha ka hun hngalh. Jehovah Pathian nih nupa sualnak tuah a huat ti le Pathian cohlanmi si ka duh ahcun pum a thurhnawmhtermi ziaza pawl kaltak a hau ti kha ka hun hngalh. (2 Korin 7:1; Hebru 13:4) Jehovah cu intuarnak a ngei i kan tuahsernak nih a lung a fahter khawh asiloah a lung a lawmhter khawh ti ka hun hngalh tikah ka lung a cawlcang tuk. (Phungthlukbia 27:11) Cucaah ritnak sii hman ti lo awk, meithal hlonh awk le ka ziaza ṭhatter awkah biakhiahnak ka tuah. I thlen awkah kaa harh bikmi cu a ṭha lomi ka ziaza hlawt le tangka in lente i celh ti lo kha a si.

A hmasa ahcun Jehovah Tehte Hna he Baibal ka cawnmi kha ka hawile hngalhter ka duh hna lo. Asinain Matthai 10:​33 i Jesuh chimmi mah bia ka rel hnuah ka lung aa thleng. “Zapi hmaiah amah mi ka si lo, tiah aa phehmi cu vancung khua i a ummi ka Pa hmaiah cuticun ka ti ve hna lai.”  Mah Baibal caang ruangah ka hawile kha Jehovah Tehte Hna he Baibal ka cawng tiah ka chimh hna i an khuaruah a har tuk. Keimah bantuk minung nih Jehovah Tehte Khrihfa pakhat si ka duhmi kha an zum kho lo. Ka nunning hlun vialte ka kaltak cang tiah ka ti hna.

ṬHATNAK KA HMUH NING: Baibal phunglam ningin ka nun caah ka nu cu aa lawm tuk. Atu ahcun thilṭhalo ka tuah lai kha a thin a phang ti lo. Kan pahnih in kan ngeihmi Jehovah dawtnak kong kha kan i ruah. Pathian bawmhnak thawngin thlennak ka rak tuah khawhmi kong ka ruah ṭhan tikah ka khuaruah a har tuk. A ziaza a rawkral i thilri chawva a duh tukmi hlanlio nunning kha ka duh ti lo.

Baibal phunglam ningin rak nung hlah ning law atu tiang ka nung ti hnga lo asiloah thong ka tla men lai. Asinain atu ahcun a nuammi chungkhar ka ngei cang. Bawmtu taktak a simi ka nupi le chimh a ngai tukmi ka fanu he Pathian rian ka ṭuan khawh caah kaa nuam tuk. Dawtnak a ngeimi Khrihfa chungkhar ah kaa tel khawh ca zongah Jehovah cungah kaa lawm tuk. Baibal biatak a ka cawnpiaktu cung zongah kaa lawm tuk. Mah lengah midang nih Baibal kong an hngalh nakhnga cawnpiak khawhnak tinvo sung ka hmuh ca zongah kaa lawm. Dawtnak he a ka hnuktu Jehovah cungah a hleiin kaa lawm.

[Cahmai 11nak i a tawinak in langhternak]

“Pathian cu intuarnak a ngei i kan tuahsernak nih a lung a fahter khawh asiloah a lung a lawmhter khawh ti ka hun hngalh”

[Hmanthlak]

Ka nupi le ka fanu he

[Hmanthlak]

Ka nu a ziaza aa thlenmi kha ka hmuh