Nikhat cu Jesuh nih Jerusalem i a um lioah a Pa, Jehovah kong a chimpah in a chan lio biaknaklei hruaitu pawl palhnak kong zong kha a rak phuan. (Johan 8:​12-​30) Pathian kong he aa tlaiin tuchan cawnpiaknak hna cu an hmaan maw, hmaan lo ti hngalh awkah mah lio caan i Jesuh chimmi bia in kan dothlat khawh. Jesuh nih hitin a ti: “Ka cawnpiaknak kha nan zulh ahcun a ka zultu taktak cu nan si. Biatak cu nan hngalh lai i biatak nih cun aan luatter hna lai.”​—Johan 8:​31, 32.

‘Ka cawnpiaknak kha zul uh.’ Jesuh chimmi mah bia hi biaknaklei cawnpiaknak hna cu “biatak” an si maw, si lo ti a kan thleidanter khotu phunglam pakhat a si. Cucaah Pathian kong pakhatkhat na hngalh tikah ‘mah cu Jesuh chimmi le a dang Baibal caang hna he aa tlakmi maw’ tiah i hal. Berea khuami hna nih lamkaltu Paul cawnpiaknak an theih tikah “a chimmi kha a si taktak maw, si taktak lo ti hngalhnak caah nifa tein Cathiang chung kha an kawl.” Cucaah anmah kha kan i zohchunh khawh hna.​—Lamkaltu 17:⁠11.

A hmasa capar ah langhtermi Marco, Rosa le Raymonde nih Jehovah Tehte Hna he Baibal an hlathlaiṭi i an zumhnak kong kha ṭha tein an dothlat. Zei ṭhatnak dah an hmuh?

Marco:  “Baibal a kan cawnpiaktu nih kan nuva in kan halmi hna biahalnak kip kha Baibal in an kan leh. Kan hngalhmi kong nih Jehovah kha a kan dawtter chin lengah kan chungkhar zong a fehter chin.”

Rosa: “A hmasa ah Baibal cu Pathian kong he aa tlaiin minung nih an ruahnak an ṭialmi cauk a si tiah ka rak ruah. Asinain hngalh ka duhmi biahalnak hna kha Baibal nih a ka leh khawh ti kha duhsah tein ka hun hngalh. Atu cu ka caah Jehovah cu a um taktakmi a si i bochan khawhmi mi pakhat a si cang.”

Raymonde: “Na kong hngalh awkah ka bawm tiah Pathian sinah thla ka cam. A rauhhlan ah kan nuva in Baibal kan hun hlathlai. Atu cu Jehovah kong he aa tlaimi biatak le Pathian cu zeibantuk Pathian dah a si ti kha kan hngalh caah kan i lawm tuk.”

Baibal nih Pathian kong he aa tlaiin lihbia hna kha a phuan lawng si loin Pathian nih a ngeihmi sining ṭha pawl kong zong kha a phuan. Baibal cu Pathian thawchuah hnawhmi cauk a si. Baibal kan rel tikah “Pathian nih a kan pekmi” biatak kha ka hun hngalh. (1 Korin 2:​12) Cucaah a biapimi kong a simi Pathian kong, aa tinhnak kong le hmailei ruahchannak kong he aa tlaimi biatak hna kha Baibal ah zeitindah phuan a si ti kha nangmah theng nih hlathlai. Mah biahalnak cheukhat i a phi kha www.pr418.com/cnh i “Baibal Cawnpiakmi > Baibal Biahalnak A Phi” timi tangah zoh. Baibal hlathlai na duh ahcun Internet in hal khawh a si asiloah Jehovah Thete pakhatkhat sin zongah hal khawh a si. Cutin Baibal na hlathlai ahcun Pathian kha na ruahnak lengin na hun dawt deuh lai tiah kan zumh.