A PHAW CAPAR | PATHIAN DAWT AWKAH A HARTER KHOMI LIHBIA HNA
Lihbia 1—Pathian Cu Min A Ngei Lo
MI TAMPI ZUMHNAK
“Pathian cu min a ngei maw, ngei lo ti kha ṭha tein kan hngal lo. A ngeih hmanhah Pathian min cu ahodah a si timi kong he aa tlaiin an ruah ning cu aa khat cio lo.”—Professor David Cunningham, Theological Hlathlainak.
BAIBAL BIATAK
Pathian amah theng nih “kei cu Jehovah ka si. Mah cu ka min a si” tiah a ti. (Isaiah 42:8, NW) Hebru holh in Jehovah timi cu “A Hung Siter” timi sullam a ngei.—Genesis 2:4.
Pathian nih Jehovah timi a min kha hmang hna seh ti a kan duh. Baibal nih hitin a ti: “BAWIPA cu thangṭhat [au, NW] ko u. Amah kha bawmhnak hal u. Miphun vialte kha a tuahmi chim hna u, zeitlukin dah a lianhngan ti kha chim hna u.”—Isaiah 12:4.
Jesuh nih Pathian min kha a rak hman. Jehovah sin i thla a cam tikah hitin a ti: “Nangmah [na min, NW] kong cu annih [Jesuh zultu pawl] kha ka hngalhter i ka hngalhter ṭhan lengmang ko hna lai.” Jesuh nih a zultu pawl kha zeicah Pathian min kha a chimh hna? Jesuh nih “ka [Pathian] dawtnak an chungah a um i kei zong an chungah ka um nakhnga” caah a si tiah a ti chap.—Johan 17:26.
A BIAPITNAK A RUANG
Biaknaklei mifim, Walter Lowrie nih hitin a ti: “Mi pakhat nih Pathian min kha a hngalh lo ahcun a um taktakmi pakhat in a naih kho lai lo. Cun Pathian cu hmuh khawh lomi ṭhawnnak a si ti lawng a hngalmi nih cun Pathian kha a daw kho lai lo.”
Victor timi pa pakhat cu zarh fatin church ah aa pum ko nain Pathian he kan i naih tiah a ruat lo. Hitin a ti: “Pathian min cu Jehovah a si ti ka hun hngalh tikah Pathian nih amah tein ka sinah theihhngalhnak aa tuahmi bantukin ka ruah. A hlanah Pathian kong tampi ka rak hngalh ko nain atu lawngah Pathian cu a um taktakmi pakhat in ka hun hmuh i duhsah tein i kan hun i naih deuh.”
Pathian min hman canah a dang upatnak min hna hman cu Baibal in Pathian min hloh bantuk a si
Jehovah zong nih a min a hmangmi hna he hawikom si a duh. Pathian nih “an lungchung in a min aa cinkenmi hna” kong he aa tlaiin hitin bia aa kam: “Mipa nih a rian a ṭuantu a fapa kha a zuah bantukin annih cu ka zuah hna lai.” (Malakhi 3:16, 17) Cun Pathian cu a min a autu vialte hna laksawng petu zong a si. Baibal nih “Bawipa [Jehovah, NW] min a aumi paoh cu khamh an si lai” tiah a ti.—Rom 10:13.
Mah Kong Hna Zong Hi Na Duh Khawh Men
ESSENTIAL BIBLE TEACHINGS
Pathian Cu Min A Ngei Maw?
Pathian nih Lianngan Bik, Sertu le Bawipa ti bantuk upatnak min a phunphun a ngei. Asinain Baibal chungah Pathian min 7,000 hrawng hman a si.