Mi tampi nih Pathian kha dawt awkah an i harh. Zeicah? Pathian cu minung nih hngalh khawh lomi, minung cungah zawnruahnak a ngei lomi le a puarhrang tukmi Pathian a si tiah an ruah caah a si. Mi cheukhat chimmi kong hi ruathmanh: 

• “Bawmhnak hmuh awkah thla ka cam ko nain Pathian cu ka cungah zawnruahnak a ngei lo tiah ka ruah. Ka caah cun Pathian cu nunnak a ngei lomi bantuk a si.”—Marco, Italy.

• “Pathian cu biak ka duh tuk ko nain anih cu ka cungah zawnruahnak a ngei lomi a lo. Dantat awkah a kan zoh pengmi a puarhrang tukmi Pathian in ka hmuh. Pathian cu zaangfahnak a ngeimi a si ti kha zumh awkah kaa harh.”—Rosa, Guatemala.

• “Ka ngakchiat lioah Pathian nih kan sualnak kha a kawl i dantat awkah a kan zoh peng tiah ka rak ruah. A hnuah Pathian cu kan cungah zawnruahnak a ngei lo tiah ka hun ruah. Pathian cu a kuttangmi pawl lam a hruaitu a si ko nain an cungah zawnruahnak taktak a ngei lomi bawi pakhat bantuk a si.”—Raymonde, Canada.

Nangtah zeitindah na ruah? Pathian dawt timi cu a si kho maw? Biaknaklei aa zuammi pawl i telin mi tampi nih mah biahalnak an tuahnak cu kumzabu tampi chung a si cang. AD 500 in 1500 karah Khrihfa ka si aa timi mi tam deuh nih Lianngan Bik Pathian sinah thla an cam lo. Zeicah? Pathian kha an ṭih caah a si. Tuanbia lei mifim Will Durant nih hitin a ti: “A nautami le sualnak a ngeimi pakhat nih ṭih a nung i minung cungah zawnruahnak a ngei lomi Pathian sinah zeitindah thla cu a cam ngam lai?”

Mi nih Pathian cu “ṭih a nung i minung cungah zawnruahnak a ngei lomi” Pathian in zeicah an hmuh? Pathian kong he aa tlaiin Baibal nih zeitindah a chim? Pathian kong biatak na hngalhmi nih amah dawt awkah aan bawm kho maw?