Khrihfa biaknak ngan “pathum a si Roman Catholic, Ni Chuahlei Orthodox le Protestant pawl nih Pathum fonh ah Pathian pakhat a si tiah an zumh. Mah hna cu Pa Pathian, Fapa Pathian le Thiang Thlarau Pathian an si. Khrihfa zumhnak (theology) timi cauk nih mah pathum cu pathian pathum si loin pathum fonh ah pathian pakhat a si tiah a ti.”​—The New Encyclopædia Britannica.

Pathian Fapa Jesuh nih ka Pa he pumkhat kan si asiloah kan i khat tiah zeitikhmanh ah a chim bal lo. Mah canah hitin a ti: ‘Ka Pa sin i ka kal lai, zeicahtiah amah cu keimah nakin a ngan deuh.” (Johan 14:28) Cun a zultu pakhat sin zongah hitin a ti: “Ka Pa le nan Pa, ka Pathian le nan Pathian a simi sinah khan ka kal lai.”​—Johan 20:17.

Thiang thlarau cu mi pakhat a si lo. A hmasa Khrihfa hna cu “thiang thlarau in an khat.” Jehovah zong nih “mi vialte kha ka thlarau ka toih hna lai” tiah a ti. (Lamkaltu 2:​1-4, 17) Thiang thlarau cu Thumkomh pathian cheubang a si lo. Thiang thlarau cu Pathian rianṭuan ṭhawnnak a si. 

Thumkomh Pathian kong he aa tlaiin Catholic biaknaklei mifim Karl Rahner le Herbert Vorgrimler nih hitin an ti: “Pathian nih a kan fianter lo ahcun kan hngalthiam kho lai lo. A fianter hmanhah tling tein cun kan hngalhthiam kho lai lo.” Nangtah na theih bal lomi le a konglam na hngalh lomi pakhat kha na daw kho lai maw? A taktak ti ahcun Thumkomh pathian zumhnak cu mi nih Pathian kong an theih nakhnga lo le an dawt nakhnga lo a kham khomi dawnkhantu thil bantuk a si.

A hmasa capar ah langhtermi Marco zong nih Thumkomh pathian kong he aa tlaiin hitin a ti: “Pathian nih aho a si ti kha hngalhter a kan duh lo tiah ka ruah. Cucaah Pathian cu mi cungah zawnruahnak a ngei lomi, minung nih hngalh khawh lomi le naih khawh lomi mi pakhat in ka hun hmuh.” Asinain Baibal nih “Pathian cu a hnokmi Pathian a si lo” tiah a ti. (1 Korin 14:​33, American Standard Version) Pathian nih aho a si kha ka hngal hna seh ti a kan duh. Jesuh nih “kan biakmi cu kan hngalh” tiah a ti.​—Johan 4:⁠22.

Marco nih hitin a ti chap: “Pathian cu Thumkomh pathian a si lo ti kha ka hngalh tikah Pathian he ka hun i naih deuh.” Jehovah cu mi nih hngalh khawh lomi Pathian si loin ṭha tein hngalh khawhmi pakhat in na hmuh ahcun amah kha na hun dawt lai. Baibal nih hitin a ti: “Pakhat le pakhat aa daw lomi nih cun Pathian kha an hngal lo, zeicahtiah Pathian cu dawtak a si.”​—1 Johan 4:⁠8.