Pathian Bia In Cawng
Biaceih Ni Ah Zeidah A Cang Lai?
Mah capar ah na hal balmi biahalnak hna a um i a phi a umnak Baibal caang hna a langhter. Jehovah Tehte Hna nih a phi kha nangmah he i ruahṭi an duh.
1. Biaceih Ni timi cu zeidah a si?
Mi tampi nih mah ni kha hitin an mitthlam ah an cuanter: Mi nuai thong tampi cu Pathian bawi ṭhutdan hmaiah kalpi an si lai. Cun pakhat cio cu hlanah an rak tuahmi cungah i hngat in biaceih an si lai. Cheukhat cu van ah an kai lai i cheukhat cu hell ah hrem an si lai. Asinain Biaceih Ni i aa tinhnak cu mi pawl kha dinlonak in khamh awkah a si tiah Baibal nih a ti. (Salm 96:13) Pathian nih Jesuh kha biaceihtu in rian a pek. Jesuh nih mi pawl kha dinnak an hmuh ṭhan nakhnga a tuahpiak hnanak caan cu biaceih ni a si.—Isaiah 11:1-5; Lamkaltu 17:31 rel.
2. Biaceih Ni nih dinnak zeitindah a umter lai?
A hmasa bik mipa, Adam nih Pathian nawl kha hramhram in a buar caah a tefa dihlak nih sualnak, sifah harnak le thihnak hna an tong. (Rom 5:12) Mah dinlonak kha dinnak in thlen awkah Jesuh nih a thiciami mi nuai tampi kha a thawhter ṭhan hna lai. Mah cu Jesuh Khrih kum thongkhat uknak tangah a si lai tiah Biathlam Baibal nih a langhter.—Biathlam 20:4, 11, 12 rel.
A tho ṭhanmi hna cu an thih hlan i an rak tuahmi thil cungah i hngat in biaceih an si lai lo. Biathlam dal 20 ah langhtermi “cauk” chungah aa telmi ningin an nung maw, nung lo timi cung ah aa hngat lai. (Rom 6:7) A tho ṭhan i Pathian kong cawn dingin caanṭha a hmumi hna ah “miṭha he miṭhalo he” an i tel lai tiah lamkaltu Paul nih a ti.—Lamkaltu 24:15 rel.
3. Biaceih Ni nih zeidah a liim lai?
Jehovah Pathian kong an theih bal lo caah a duhnak tuah manh loin a thimi hna nih an nuning kha i thlen in thil ṭha tuahnak caanṭha an hmu lai. Cutin an i thlen ahcun an thawhṭhannak cu ‘nunnak’ thawhṭhannak a si lai. Asinain a tho ṭhanmi hna lakah cheukhat nih cun Jehovah phunglam kha cawn an duh lai lo. Cucaah an thawhṭhannak cu ‘sualphawtnak’ caah a si lai.—Johan 5:28, 29; Isaiah 26:10; 65:20 rel.
Kum thongkhat a raumi Biaceih Ni a donghnak ah nawl a ngaimi hna caah a tlingmi thil sining si dingin Jehovah nih a tuahpiak hna lai. (1 Korin 15:24-28) Mah cu nawl a ngaimi dihlak caah a ṭha tukmi ruahchannak a si. Pathian nih hmanung bik hneksaknak caah kum thongkhat chung a hrenmi Satan kha dong hngal lo khor chung in a chuah lai. Mah tikah Satan nih Jehovah le mi pawl an i hlat nakhnga aa zuam ṭhan lai. Asinain Satan a ralchanhmi hna cu vawleicung ah zungzal in nunnak caanṭha an hmu lai.—Isaiah 25:8; Biathlam 20:7-9 rel.
4. Mi pawl kha zei bantuk a dang biaceih ni nih dah ṭhathnemhnak a hmuhter hna lai?
Atu chan a donghter hnga dingmi thil sining kong a langhter tikah “biaceih a si ni” timi biafang kha Baibal nih a hman. Miṭhalo dihlak a hrawk dihtu Noah chan i Buanchukcho a tlun lio caan bantukin mah biaceih ni cu ruahlopi in a tlung ve lai. Lunglawmh awk ngai a simi cu “Pathian zei i a rel lomi hna” cungah a tlung dingmi rawhnak nih “dinnak a umnak hmun” minung phu thar kha a chuahter lai.—2 Peter 3:6, 7, 13 rel.