A hmasa capar ah a langhter bantukin Jesuh nih “Pathian Pennak kong Thawngṭha” chim kha biapi bik ah a chiah. (Luka 8:1) Mi sinah Pathian Pennak kong chim awkah fakpi in aa zuam. Israel ram chung dihlak ah a ke in meng tampi chung a kal i thawngṭha a chim. Jesuh phungchim rianṭuannak kong aa ṭialnak Thawngṭha cauk pali ah Pennak kong kha voi 100 hrawng cherhchan a si i a tam deuh cu Jesuh chimmi bia ah hmuh khawh an si. Mah cu Jesuh nih Pahtian Pennak kong a chimmi chungin a tawinak lawng a si rih.​—Johan 21:25.

Vawleicung a um lioah Pathian Pennak cu Jesuh caah zeicah a biapit tuk? A ruang pakhat cu Pennak Siangpahrang in thim ka si ti kha a hngalh caah a si. (Isaiah 9:6; Luka 22:28-​30) Asinain Jesuh nih nawlngeihnak le sunparnak kha biapi ah a chia lo. (Matthai 11:29; Marka 10:17, 18) Amah ṭhatnak caah Pathian Pennak kong a chimmi zong a si lo. A dawtmi vancung a Pa le zumhfek tein a ummi a zultu pawl caah Pathian Pennak * nih a tuahpiak hna hnga dingmi kong kha hngalh a duhmi a si.

Jesuh nih vancung a Pa kha a dawt tuk. (Phungthlukbia 8:​30; Johan 14:31) Dawtnak, zaangfahnak le dinnak ti bantuk a Pa sining ṭha hna zong a sunsak. (Deuteronomi 32:4; Isaiah 49:15; 1 Johan 4:8) Cucaah Jesuh nih Pathian cu mi cungah zawnruahnak a ngei lo, mi kha sifah harnak inter a duh hna ti bantuk a Pa kong he aa tlaiin lihbia kha theih a duh lai lo ti cu a fiang ko. Cucaah “Pathian Pennak kong thawngṭha” kha lungtho tein a rak chimmi a si. A caan a phanh tikah Pennak nih Pathian thang a ṭhatter lai ti kha a hngalh. (Matthai 4:​23; 6:​9, 10) Zeiti lam in dah?

Jehovah nih Pennak thawngin mi nih ṭhatnak an hmuh nakhnga thlennak nganpi a tuah cang lai. Zumhfek tein a ummi hna kha ‘an mitthli vialte a hnawhpiak dih’ hna lai. Chim duhnak cu kan mitthli a kan tlaktermi a ruang dihlak kha Jehovah nih a kan hlohpiak cang lai. Mah tikah cun “thihnak a um ti lai lo, ngaihchiatnak le ṭahnak le fahnak zong a um ti lai lo.” (Biathlam 21:​3, 4) Pathian nih Pennak thawngin mi nih sifah harnak an tonmi vialte kha a hrawh dih cang lai. *

Pathian Pennak kong chimnak ah Jesuh lungthawhnak a ngeihmi cu khuaruahhar awk a si lo. Jesuh nih mah Pennak nih a Pa cu zeitlukin dah a ṭhawn i zaangfahnak a ngeih ti a langhter lai ti kha a hngalh. (Jeim 5:​11) Cun zumhfek tein a ummi hna cu mah Pennak thawngin ṭhatnak an hmu lai ti zong kha a hngalh.

Jesuh cu vawleicung a ṭum hlanah a Pa he vancung ah caan saupi chung an umṭi cang. A Pa nih a Fapa he arfi in a khatmi van, aa dawh tukmi vawlei le thilnung pawl kha an ser hna. (Kolose 1:​15, 16) Sermi thil vialte lakah Jesuh nih minung kha “a dawt tuk hna.”​—Phungthlukbia 8:​31, NW.

Jesuh mi minung cungah zeitlukin dah dawtnak a ngeih ti cu vawleicung i phungchim rian a ṭuan lioah hmuh khawh a si. A hmasa tein sifah harnak a tongmi hna sin i “thawngṭha chim” awkah vawleicung ah ka ratmi a si tiah fiang tein a chim. (Luka 4:​18) Jesuh nih mi pawl kha a kaa lawngin si loin a taktak zongin a bawmh hna. Mi pawl a dawt hna kha a tuahsernak ah hmuh khawh a si. Tahchunhnak ah, mibupi cu Jesuh bia ngaih awk i an rat tikah “an zaang an fak ngaingai” hna i “a zawmi hna kha a damter hna.” (Matthai 14:14) Thinghmui zawtnak a ngeimi pa nih na duh ahcun damter khawhnak ṭhawnnak na ngei ti kha ka zumh tiah a ti tikah dawtnak he Jesuh nih “damter kaan duh, thiang ko” tiah a ti i a rak damter. (Luka 5:​12, 13) A ṭa Lazaruh a thih caah a ngaih a chia tukmi Mary a hmuh tik zongah Jesuh cu “a hnarno a ṭam i a lung a hno,” cucaah “a ṭap.” (Johan 11:32-​36) Cun a thihnak nili a si cangmi Lazaruh zong kha a thawhter ṭhan. Mah cu khuaruahhar thil taktak a si.​—Johan 11:38-​44.

Jesuh nih vawleicung ah a tuahmi thil hna cu chikhat ca lawng an si ti kha a hngalh. A damtermi hna zong a hnuah an zaw ṭhan lai i a thawhtermi hna zong a hnuah an thi ṭhan lai ti kha a hngalh. Asinain Pathian Pennak nih cun mah harnak vialte kha a hrawh dih cikcek lai ti zong kha a hngalh. Cucaah Jesuh nih khuaruahhar thil lawng kha tuah loin “Pennak kong thawngṭha” zong kha lungtho tein a rak chimnak a si. (Matthai 9:​35) Jesuh tuahmi khuaruahhar thil hna cu a rauhhlan ah Pathian Pennak nih vawleicung ah a tuah dingmi hmelchunhnak an si. Pathian Pennak uknak tangah a tling dingmi Baibal biakam kong kha zohhmanh hna u sih.

• Ngandam lonak a um ti lai lo

  “Mitcaw nih khua an hmuh lai i hnachet nih khua an theih lai. Kebei cu an pet an lam lai i a holh kho lomi kha lunglawmhnak in a au in an au lai. Thetse ram chungah khan tiva a luang lai.” Mah lawng si loin, “kan ram i a ummi cu ‘ka zaw’ tiah an zai ti lai lo.”​—Isaiah 33:​24; 35:​5, 6.

• Thihnak a um ti lai lo

  “A dingmi cu ram chungah him tein an um lai i ram cu zungzal in anmah ta a si lai.”​Salm 37:29.

  “BAWIPA nih thihnak cu zungzal ca in a hrawh lai. Mi vialte cu an mitthli a hnawh hna lai.”​—Isaiah 25:8.

• A thimi cu an nung ṭhan lai

  “Thlan chung i a ummi mithi vialte nih a aw an theih lai caan kha a ra lio.”​—Johan 5:​28, 29.

  “Thihnak in kan tho ṭhan dih lai.”—Lamkaltu 24:15.

• Inn le lo asiloah rian ngeih lonak a um ti lai lo

  “Mi nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsur hang kha an din hna lai, midang nih an dinkanh hna lai lo. . . . An ṭuanmi chungin an hmuhmi theitlai kha tlamtling tein an hman hna lai.”​—Isaiah 65:21, 22.

• Raltuknak a um ti lai lo

  “Hi vawlei cung pumpi ah ral cu a daihter dih ko hna.”​—Salm 46:9.

  “Phunkhat le phunkhat an i do ti lai lo, ral doh zong an i tim ti lai lo.”​—Isaiah 2:4.

• Mangṭam a um ti lai lo

  “Vawlei nih rawl kha a chuahter cang, Pathian kan Pathian nih thluachuah a kan pek cang.”​—Salm 67:6.

  “Ram chungah rawl tampi in um ko seh; Lebanon tlang i a ummi rawl kung ṭha bantuk nih tlang vialte cu tuam dih hna seh.”​—Salm 72:16.

• Sifah harnak a um ti lai lo

  “Mipam cu hrelh an si zungzal lai lo.”​—Salm 9:​18.

  “Amah a autu sifakmi hna le retheimi hna, mi nih zei ah an rel lomi hna kha, a chanh hna. A dermi le sifakmi cungah zaangfahnak a ngei i retheimi kha an nunnak kha a khamh hna.”​—Salm 72:12, 13.

Pathian Pennak nih a kan tuahpiak dingmi kong na hlathlai dih hnuah mah Pennak cu Jesuh caah zeicah a biapit tuk ti kha na hngalh cang men lai tiah kan ruah. Pathian Pennak nih atu ah kan tonmi sifah harnak vialte hi a hrawh dih cang lai ti kha Jesuh nih a hngalh. Cucaah vawleicung a um lioah Pathian Pennak kong ngaih a duhmi hna kha lungtho tein a rak chimh hnanak a si.

Pathian Pennak nih a tlinter dingmi Baibal biakam hna nih na lung aan su maw? Aan suk ahcun mah Pennak kong kha zeitindah tam deuh in na hngalh khawh lai? Pennak nih a tuah dingmi thil in ṭhathnemhnak na hmuh khawh nakhnga zeidah na tuah lai? A hnu capar ah mah biahalnak a phi kha kan theih hna lai.