Pa Thawng: Atu bantukin Baibal kan i ruah khawh peng caah kaa lawm. * Kan hnulei ah Pathian Pennak kong he aa tlaiin bia na ka hal. Jehovah Tehte Hna nih 1914 ah Pathian Pennak nih uk hram a thawk cang tiah zeicah an zumh timi kong a si ko lo ma?

Pa Cung: A si. Nan cauk pakhat ah Pathian Pennak nih 1914 in uk hram a thawk cang tiah a langhtermi kha ka rel. Nan zumhnak cu Baibal cungah hram aa bunh tiah na ti, a si ko lo ma?

Pa Thawng: A si.

Pa Cung: Baibal kha a uk ningin ka rel dih cang. Asinain 1914 kong a langhtermi pakhat hmanh ka hmu lo. Cun internet ah taarmi Baibal zongah 1914 tiah ka kawl i ka hmu lo.

Pa Thawng: Na fel bak si. Baibal a uk ningin na relmi nih zeitluk in dah Pathian Bia na sunsak ti kha a langhter.

Pa Cung: A si ko. Baibal rel cu ka duh ngai.

Pa Thawng: Mah lengah hngalh na duhmi kong Baibal ah na kawlmi cu a ṭha tuk. Baibal zong nih hngalhthiam awkah kawl peng u tiah tha a kan pek. * Mah ningin na tuahmi a si.

Pa Cung: Kaa lawm. Asinain Baibal kong tam deuh in hngalh ka duh. 1914 kong he aa tlaiin atu kan hlathlai liomi cauk zongah ka kawl. Mah ah siangpahrang pakhat i a mang kong aa tel. Thingkung nganpi pakhat cu hau a si i a corh ṭhannak kong a si rua ka ti.

Pa Thawng: A si, a hmaan. Mah cu Daniel dal 4 ah langhtermi chimchungbia a si. Mah ah Babilon Siangpahrang Nebukhadnezzar i a mang kong a langhter.

Pa Cung: A si. Mah kong kha atu le atu ka rel ṭhan. Hmaan tein chim ahcun mah kong le Pathian Pennak asiloah 1914 cu zeitindah aa pehtlaih ti kha ka hngalthiam lo.

Pa Thawng: Na hngalthiam lomi cu na mawh lo. Profet Daniel hmanh nih Pathian lamhruainak in mah chimchungbia kha a ṭial ko nain a sullam kha ṭha tein a rak hngalthiam lo.

Pa Cung: A si ma?

Pa Thawng: A si. Daniel 12:8 ah “A chimmi cu ka theih, sihmanhsehlaw a sullam cu ka hngal lo” tiah a ti.

Pa Cung: Mah cu hngalh duh awk ngai a si.

Pa Thawng: Daniel nih a rak hngalhthiam lomi cu Daniel Baibal i chimchungbia hna kha mi nih an hngalhthiam nakhnga Pathian nih a phuanmi caan a phanh rih lo caah a si. Asinain atu ah cun hngalhthiam a si cang.

Pa Cung: Zeicah cutin chim khawh a si?

Pa Thawng: Mah kong hngalh awkah a changtu Baibal caang kha rel u sih. Daniel 12:9 ah hitin a ti: “Hi bia hna cu donghnak caan a phak hlantiang biathli le biathup ah chiah awk an si.” Cucaah mah chimchungbia hna cu “donghnak caan,” phundang in cun ni hmanung bik caan a phak tik lawngah hngalhthiam a si lai. Atu kan caan hi donghnak caan a si. Mah kong a langhtermi kha a hnuah kan i ruah te lai. *

Pa Cung: A si ahcun Daniel chimchungbia kong cu na ka chim kho lai ma?

Pa Thawng: Aw, ka si khawh chungin kaan chimh lai.

Pa Thawng: A hmasa bik ah Siangpahrang Nebukhadnezzar a mang kong kha a tawinak in chimh kaan duh. Mah hnuah a sullam kan i ruah lai.

Pa Cung: Aw, a ṭha ko.

Pa Thawng: Nebukhadnezzar nih a mang ah van tiang a tawngmi thingkung nganpi pakhat a hmuh. Cun vancungmi pakhat nih mah thingkung kha hau u law a hmui kha kaltak u tiah a timi kha a theih. “Kum sarih” a rauh hnuah mah thingkung cu a corh ṭhan lai. * Mah chimchungbia cu a hmasa ahcun Siangpahrang Nebukhadnezzar he lawng aa pehtlaimi a si. Mah siangpahrang cu van tiang a tawngmi thingkung bantukin a min a thangmi siangpahrang a si ko nain “kum sarih” chung hau a si lai. Mah hnuah zeidah a cang ti kha naa cinken ma?

Pa Cung: Kaa cinken lo.

Pa Thawng: Nebukhadnezzar cu kum sarih, phundang in cun caan sarih chung a lung a tlau tiah Baibal nih a ti. Mah caan lioah siangpahrang in a uk kho lo. Asinain kum sarih hnuah Nebukhadnezzar cu a lung a hmaan ṭhan i a rak uk khawh ṭhan. *

Pa Cung: Na chimmi cu ka theihthiam. Asinain mah kong cu Pathian Pennak le 1914 he zeitindah aa pehtlaih?

Pa Thawng: A tawinak in chim ahcun mah chimchungbia ah a tlinnak pahnih a um. Siangpahrang Nebukhadnezzar uknak chikkhat a cahmi cu a voikhatnak a tlinnak a si. A voihnihnak a tlinnak cu Pathian Pennak chikkhat a cahnak he aa pehtlai. Cucaah mah chimchungbia a voihnihnak a tlinnak cu Pathian Pennak he aa pehtlai.

Pa Cung: Mah chimchungbia ah a voihnihnak a tlinnak cu Pathian Pennak he aa pehtlai tiah zeicah na chim khawh?

Pa Thawng: Pakhatnak ah, mah chimchungbia cu Pathian Pennak he aa pehtlaimi a si ti kha a thluangthlam in a langhter. Daniel 4:​17 ah ‘Cungnung Bik Pathian nih cun minung pennak cungah nawl a ngei ti kha hngal hna seh. A duhmi paoh kha siangpahrang ah a ser khawh ko hna ti kha hngal hna seh’ ti awkah mah chimchungbia kha a chimhnak a si. Minung pennak kha aho nih dah a uk tiah a ti?

Pa Cung: “Cungnung Bik Pathian” nih tiah a ti.

Pa Thawng: A hmaan. “Cungnung Bik Pathian” cu ahodah a si lai tiah na ruah?

Pa Cung: Mah cu Pathian kong a chimmi a si lai tiah ka ruah.

Pa Thawng: A hmaan. Cucaah mah chimchungbia cu Siangpahrang Nebukhadnezzar kong lawng kha a chimmi a si lo. Minung pennak a ukmi Pathian uknak he zong aa pehtlai. Daniel Baibal i a dang chimchungbia hna kan zoh tik zongah mah cu a hmaan ti kha kan hngalh khawh.

Pa Cung: Zei bantuk chimchungbia hna dah?

Pa Thawng: Daniel Baibal ah a bik in a langhtermi a kong pakhat kha atu le atu a chim. Mah cu Jesuh ukmi Pathian Pennak dirh a si lai timi kong a si. Tahchunhnak ah, Daniel dal 2nak ah a ummi chimchungbia kha zohhmanh u sih. Daniel 2:​44 kha na ka relpiak kho lai ma?

Pa Cung: A ngah ko. “Cu siangpahrang hna chan ah cun vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.”

Pa Thawng: Kaa lawm. Mah Baibal caang nih zei Pennak kong dah a chimmi a si?

Pa Cung: Umm. Ka thei lo.

Pa Thawng: Cu pennak cu “zeitikhmanh ah a rawk lai lo” tiah a ti caah minung ukmi pennak a si kho hnga ma?

Pa Cung: A si kho lai lo.

Pa Thawng: A si, mah cu Pathian Pennak kha a chim duhmi a si. Daniel Baibal ah Pathian Pennak kong a langhtermi chimchungbia pakhat a um rih. Mah kha Daniel 7:​13, 14 ah kan hmuh khawh. Hitin a ti: “Bawinak le sunparnak le siangpahrang ṭhawnnak [pennak, NW] kha amah cu pek an si i cucaah miphun zakip le holh phun zakip nih a rian kha an ṭuan. Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang ṭhawnnak [pennak, NW] a ngeihmi cu zeitikhmanh i hrawh khawh lomi ṭhawnnak a si.” Atu nai i kan relmi Baibal caang he aa lawhnak kha na hmu ma?

Pa Cung: Mah Baibal caang zong nih pennak kong a chim.

Pa Thawng: A si. Aa thleidannak cu mah Pennak nih “miphun zakip le holh phun zakip” kha a uk hna lai. Phundang in cun mah Pennak nih vawleicung pumpi kha a uk lai.

Pa Cung: A hlanah mah Baibal caang hi ka rak hngal lo. Na chimmi cu a hmaan.

Pa Thawng: “Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang ṭhawnnak [pennak, NW] a ngeihmi cu zeitikhmanh i hrawh khawh lomi ṭhawnnak a si” ti zong in a chimchung. Mah kong hi a hmasa ah kan relmi Daniel 2:​44 i chimchungbia he aa lo, a si ko lo ma? Cucaah mah chimchungbia zong nih Pathian Pennak kong a chimmi a si.

Pa Cung: A si.

Pa Thawng: Kan i ruahmi kong kha a tawinak in i ruah ṭhan u sih. Daniel dal 4nak i chimchungbia langhter a sinak cu “Cungnung Bik Pathian nih cun minung pennak cungah nawl a ngei” ti kha mi nih an hngalh nakhnga caah a si. Mah bia theng nih mah chimchungbia cu Nebukhadnezzar cung lawngah si loin a ngan deuh in a tling dingmi a um rih ti kha a langhter. Mah lengah Daniel Baibal dihlak ah Pathian Fapa Jesuh nih a uk dingmi Pathian Pennak dirh a si lainak kong chimchungbia zong hmuh khawh a si. Mah a kong pawl kan zohnak thawngin Daniel dal 4nak i chimchungbia nih Pathian Pennak kong lawng a langhtermi a si lai, a si ko lo ma?

Pa Cung: Aw, a si ko. Asinain 1914 he zeitindah aa pehtlaih?

Pa Thawng: Siangpahrang Nebukhadnezzar kong kha zoh ṭhan hmanh u sih. Chimchungbia i thingkung nganpi nih a voikhatnak ah Nebukhadnezzar kha a aiawh. Thingkung hau a sinak kum sarih nih siangpahrang a lung a tlau ruangah a uknak a cah caan kha a langhtermi a si. Siangpahrang Nebukhadnezzar lung cu a hung hmaan i a uk ṭhan tikah mah kum sarih cu a dong. Chimchungbia i thingkung nganpi nih a voihnihnak ah Pathian uknak kha a aiawh. Thingkung hau a simi nih Pathian uknak cu caan caankhat chung a cah dingmi kha a langhter. Pathian lei in a chambaunak a um caah cutin a cahmi a si lo.

Pa Cung: Zeidah a chim duhmi a si?

Pa Thawng: Baibal chan lioah Jerusalem khua ah uktu a ṭuanmi Israel siangpahrang pawl cu “BAWIPA siangpahrang ṭhutdan” ah an ṭhu tiah a ti. Annih nih Pathian aiawh in Israel mi kha an uk hna. Cucaah mah siangpahrang pawl uknak nih Pathian uknak kha a aiawh. Asinain a hnuah siangpahrang tam deuh nih Pathian kha an ralchanh i ram chungmi tam deuh zong nih a ṭhalomi an nunning kha an zulh. Pathian nih Israel mi pawl nawl an ngaih lo ruangah BC 607 ah Babilon mi nih Jerusalem khua an lakmi kha nawl a rak awnh. Mah caan thawkin Jerusalem khua ah Pathian aiawh in a uktu siangpahrang an um ti lo. Phundang in cun Pathian uknak cu chikkhat a rak cat. Ka chim duhmi na hngalhthiam lai tiah ka ruah.

Pa Cung: Aw, ka hngalhthiam ko.

Pa Thawng: Cucaah BC 607 cu kum sarih i a hramthawknak a si. Phundang in cun Pathian uknak chikkhat a cah caan a hramthawk a si. Kum sarih a dongh tikah Pathian aiawh in uktu thar a ṭuan dingmi kha Pathian nih rian a pek lai. Atu tan ah cun vawlei ah a ummi kha si loin vancung ah a ummi kha siangpahrang in rian a pek lai. Mah tikah Daniel Baibal chung i a dang chimchungbia hna zong an tling lai. Cutin a si ah kum sarih i a donghnak cu zeitikah dah a si lai? Mah a phi kha kan hngalh ahcun Pathian Pennak nih zeitikah dah uk hram a thawk ti kha kan hngalh lai.

Pa Cung: Cutin a si ah kum sarih i a donghnak cu 1914 ma a si?

Pa Thawng: A si, a hmaan.

Pa Cung: Asinain 1914 ah kum sarih a dong ti kha zeitindah kan hngalh khawh?

Pa Thawng: Jesuh nih vawleicung ah phung a chim lioah kum sarih cu a dong rih lo ti kha a rak langhter. * Cucaah kum sarih cu caan saupi a raumi a si lai. Mah kum sarih cu Jesuh vawlei a rat hlan kum tampi in aa thawk i vancung a kai hnu kum tampi tiang a rak dong rih lo. Cun Daniel chimchungbia pawl cu “donghnak caan a phak hlantiang” hngalhthiam an si lai lo timi zong kha philhhlah. * 1900 a tlin lai ah lungthin ṭha a ngeimi Baibal siangngakchia pawl nih mah chimchungbia le a dang chimchungbia pawl kha lungtho tein an rak hlathlai. Cucaah kum sarih cu 1914 ah a dong ti kha an hun hngalh. Vawleicung pumpi ah a cangmi thil pawl nih 1914 ah Pathian Pennak nih vancung in uk hram a thawk cang ti kha a langhter. Mah caan thawkin ni hmanung bik ni cu a hun i thawk. Mah a kong thar pawl hngalhthiam awkah a caan la in na hlathlai a hau.

Pa Cung: A si ko. Mah kong ṭha tein hngalhthiam awkah ka rel ṭhan lai.

Pa Thawng: Keimah zong mah chimchungbia pawl le a tlinnak kong hngalhthiam awkah a caan ka rak lak. Asinain atu bantukin kan i ruah caah Pathian Pennak kong he aa tlaiin Jehovah Tehte Hna zumhnak cu Baibal cungah hram aa bunh ti kha na hngalhthiam ko lai.

Pa Cung: A si. Nan zumhnak cu Baibal cungah hram aa bunh caah kaan upat tuk hna.

Pa Thawng: Nang zong na zumhnak Baibal cungah hram i bunh seh ti na duh kha ka hngalh. Asinain ka chim cang bantukin voikhat te ah a kong a dihlak in cun hngalhthiam khawh a si lo. A dang hngalh na duhmi kong zong a um ko lai. Tahchunhnak ah, kum sarih cu Pathian Pennak he aa pehtlai i BC 607 ah aa thawk ti kha kan rak i ruah. Asinain kum sarih cu 1914 ah a dong tiah zeicah kan chim khawh timi kong zong hngalh na duh ko lai. *

Pa Cung: A si, mah kong kha hngalh ka duh.

Pa Thawng: Kum sarih a rauh caan fiang tein hngalhthiam awkah Baibal lawng nih a kan bawmh khawh. Mah kong kha a hnuah kan i ruah ṭhan te lai. *

Pa Cung: Aw. A ṭha ko.