Pa Thawng: Na dam ko lo ma? Kan i tong kho ṭhan i kaa lawm. Atu bantukin zarh fatinte Baibal kan cawn khawh lengmang caah kaa lawm. *

Pa Cung: Ka dam ko, kaa lawm.

Pa Thawng: Jehovah Tehte Hna nih 1914 ah Pathian Pennak nih uk hram a thawk cang tiah an zumhnak kong kha kan hnu zarh ah kan rak i ruah. * Daniel Baibal dal 4nak ah a ummi chimchungbia lakin a biapi bikmi a kong pakhat kan rak i ruah. Zei kong dah a si ti kha naa cinken ti ma?

Pa Cung: Nebukhadnezzar mang i thingkung nganpi kong kha a si ko lo ma?

Pa Thawng: A si ko. Siangpahrang nih a mang ah van tiang a tawngmi thingkung nganpi pakhat kong kha a rak manh. Mah thingkung kha hau ding le a hmui kaltak dingin vancungmi nih nawl a pekmi kha a theih. Mah thingkung cu hau a si in “kum sarih” a rauh tikah a corh ṭhan te lai. * Mah chimchungbia ah a tlinnak pahnih a um timi kong zong kan rak i ruah. A hmasa a tlinnak kong kha naa cinken ti ma?

Pa Cung: Mah chimchungbia cu Nebukhadnezzar cungah a tling, a si ko lo ma? Kum sarih chung a lung a tlaunak kong kan rak i ruah.

Pa Thawng: A si. Nebukhadnezzar cu chikkhat a lung a tlau caah a uknak zong chikkhat a rak cat. Chimchungbia a ngan deuh in a tlinnak a simi Pathian uknak zong vawleicung ah kum sarih chung a rak cat. Kan i ruah cang bantukin kum sarih cu Jerusalem khua hrawh a si caan BC 607 in aa thawk. Mah caan thawkin vawleicung ah Jehovah aiawh in Pathian miphun a ukmi minung siangpahrang an um ti lo. Asinain Pathian nih kum sarih a dongh tikah vancung ah a ummi pakhat kha siangpahrang in rian a pek ṭhan lai. Phundang in cun kum sarih a dongh tikah Pathian i vancung Pennak nih uk hram a thawk lai. Kum sarih cu zeitikah dah aa thawk ti kha kan hngalh cang. Cucaah kum sarih cu zei can dah a rauh ti kha kan hngalh ahcun Pathian Pennak nih zeitikah dah uk hram a thawk ti kha kan hngalh lai. Kan i ruahmi kong kha na hngalh ṭhan cang, a si ko lo ma?

Pa Cung: Aw, ka hngalh ṭhan cang.

Pa Thawng: A ṭha tuk. Cutin a si ah kum sarih zei can dah a rauh timi kong kha i ruah u sih. Kei zong mah kong he aa tlaiin a biapimi kong kha kaa cinken khawh nakhnga ka hlathlai ṭhan. Mah kong kha ka si khawh chungin chimh kaan duh.

Pa Cung: A ṭha tuk.

Pa Thawng: Chimchungbia a hmasa a tlinnak cu Nebukhadnezzar he aa pehtlaimi a si i kum sarih timi nih caan sarih kha a chim duhmi a si. Asinain chimchungbia a ngan deuh in a tlinnak cu Pathin Pennak he aa pehtlaimi a si i kum sarih cu caan sarih nakin a rau deuh.

Pa Cung: Zeicah cutin na chim khawh?

Pa Thawng: Zeicahtiah kum sarih cu Jerusalem khua hrawh a si caan BC 607 ah aa thawk. Mah kum in kan rel ah cun kum sarih cu BC 600 a si lai. Asinain mah kum ah Pathian Pennak kong he aa tlaiin aa thleidangmi zei thil hmanh a rak cang lo. Cun kan hnu zarh ah kan rak i ruah cang bantukin kum tampi a rauh hnu Jesuh vawleicung a rat lio hmanhah mah kum sarih cu a dih rih lo kan rak ti.

Pa Cung: A si, kaa cinken ko.

Pa Thawng: Cucaah kum sarih timi cu kum sarih taktak kha si loin saupi a raumi caan pakhat kha a chims duhnak a si.

Pa Cung: Zei can dah a rauh lai?

Pa Thawng: Mah kum sarih a rauh caan ṭha tein hngalh khawh awkah Daniel Baibal he aa pehtlaimi Biathlam Baibal nih a kan bawmh. Mah Baibal ah kumthum le cheu cu ni 1,260 he aa khat tiah a ti. * Cucaah kumthum le cheu a let hnih a simi kum sarih cu ni 2,520 he aa khat. Atu tiang ka chimmi cu na theihthiam ko lai tiah ka ruah.

Pa Cung: Aw, ka theihthiam ko. Asinain 1914 ah Pathian Pennak nih uk hram a thawk timi kong he zeitindah aa pehtlaih?

Pa Thawng: Aa pehtlaihnak kong kha zohhmanh u sih. A caancaan ah Baibal chimchungbia hna ah nikhat kha kumkhat in a langhter tawn. * Nikhat kha kumkhat in kan rel ahcun kum sarih cu kum 2,520 he aa khat lai. BC 607 in kan rel ahcun kum 2,520 cu 1914 ah a dong. * Cucaah kum sarih a donghnak, Pathian Pennak ah Siangpahrang in Jesuh nih uk hram a thawk caan cu 1914 ah a si. Ni hmanung bik ni kong he aa tlaiin Baibal chimchungbia hna zong 1914 thawkin a rak tling.

Pa Cung: Zei bantuk Baibal chimchungbia hna dah a tling?

Pa Thawng: Matthai 24:7 ah Jesuh nih a chimmi kha zohhmanh u sih. Jesuh nih vancung in uk hram a thawk tikah a tling dingmi kong he aa tlaiin hitin a chimchung: “Ramkhat le ramkhat an i do lai, pengkhat le pengkhat an i tu lai. A kenkip ah mangṭam le lihnin a tlung lai.” Jesuh nih uk hram a thawk tikah mangṭam le lihnin a tlung lai tiah a ti. A luancia kumzabu hna ah mah bantuk thil pawl vawleicung pumpi ah a cang, a si ko lo ma?

Pa Cung: Aw, a si ko.

Pa Thawng: Cun Pathian Pennak i Siangpahrang in Jesuh a rat tikah raldohnak a um lai tiah mah Baibal caang nih a langhter. Ni hmanung bik ah a cang dingmi raldohnak cu ram chung lawngah si loin vawleicung pumpi ah a si lai tiah Biathlam Baibal ah a chimchung. * Vawlei ralpi pakhatnak zeitikah dah aa thawk ti kha naa cinken ma?

Pa Cung: 1914 ah a si ko lo ma? Jesuh nih uk hram a thawk kum a si na timi he aa khat. A hlanah mah kong cu ka thei bal lo. 

Pa Thawng: Kum sarih kong le ni hmanung bik kong chimchungbia kan pehtonh ahcun 1914 kong he aa tlaiin kan hngalhthiam khawh lai. 1914 ah Jesuh nih Pathian Pennak ah Siangpahrang in uk hram a thawk lengah mah kum thawkin ni hmanung bik ni aa thawk tiah Jehovah Tehte Hna nih an zumh. *

Pa Cung: Mah a kong dihlak hngalhthiam awkah a caan lak rih a hau lai.

Pa Thawng: Na chimmi kha ka theihthiam. Kei zong a caan ka rak lak ve. Baibal ah 1914 kong a chimmi cu a um lo nain 1914 kong he aa tlaiin Jehovah Tehte Hna zumhnak cu Baibal cungah hram aa bunhmi a si ti kha atu kan i ruahmi kong in na hngalhthiam ko lai tiah ka ruah.

Pa Cung: Aw, ka hngalhthiam ko. Zei kong na chim paohah na ruahnak in chim loin Baibal in na ka chim caah kaan upat. Asinain mah kong cu zeicah mah tluk in hngalhthiam awkah a har hnga? 1914 ah Jesuh nih vancung in uk hram a thawk tiah Baibal ah langhter sehlaw a dih komi.

Pa Thawng: Mah cu a ṭha tukmi biahalnak a si. A tak ti ahcun Baibal ah fiang tein a langhter lomi kong tampi a um rih. A konglam pawl hngalhthiam awkah i zuam a haumi phun in zeicah Baibal cu ṭial a si? Mah kong kha a hnuah kan i ruah te lai.

Pa Cung: Aw, a ṭha tuk.