AHO sin i kan cam hmanhah kan thlacammi cu hmun pakhat ah a phan dih maw? Mi tam deuh nih cun a phan tiah an ruah. Zumhnak cawhkalh a duhmi hna le aa dannak a um ko nain biaknak vialte cu cohlan awktlak a si dih ko tiah a ruatmi hna caah cun a cungah langhtermi kong hi duh awk ngai a si ko. Asinain mah ruahnak cu a hmaan lomi a si kho maw?

Mi tampi nih atule atu a hmaanmi Pathian sinah thla an cam lo tiah Baibal nih a langhter. Baibal chan lioah mi tam deuh nih cun mi nih serchommi siasal pawl sinah thla an rak cam. Asinain Pathian nih mah kong he aa tlaiin atule atu ralrin a pek hna. Tahchunhnak ah, siasal hna nih “hna an ngei, asinain khua an thei lo” tiah Baibal nih a ti. (Salm 115:​4-6) Mah cu a fiang tukmi a si. Zeihmanh a thei lomi pathian sinah zeicah thla cu na cam lai?

Mah kong he aa tlaiin Baibal nih a fiangmi a kong pakhat a langhter. A hmaanmi profet Elijah nih a biakmi Pathian sin i thla a cam dih hnuah Baal profet hna kha an biakmi an pathian sinah thlacam dingin a rak fial hna. Elijah nih a hmaanmi Pathian nih cun kan thlacamnak kha a kan leh lai i a hmaan lomi pathian nih cun a kan let lai lo tiah a ti hna. Baal profet hna nih mah zuamcawhnak kha an cohlan i an pathian sinah caan saupi fakpi in an au i thla an rak cam. Asinain zeihmanh san a tlai lo. Baibal ah hitin a ti: “Zeihmanh nih a let hna lo, ahohmanh nih zei ah a rel hna lo.” (1 Siangpahrang 18:29) Asinain Elijah nih thla a cam tikah zeidah a rak cang?

Elijah nih thla a cam dih hnuah a biakmi a Pathian nih a rak leh colh. Vancung in mei a rung thla i an thawimi saram a kangh dihnak thawngin Elijah thlacamnak kha a rak leh. Aa lawh lonak cu zeidah a si? 1 Siangpahrang 18:36, 37 ah langhtermi Elijah thlacamnak ah a biapimi a kong pakhat a um. Mah thlacamnak cu tawite lawng a si. A hrampi Hebru Baibal caang ahcun biafang 30 hrawng lawng a si. Asinain mah a tawimi thlacamnak chungah Elijah nih Pathian min Jehovah kha voithum tiang a rak hman.

Kanaan mi pawl nih an biakmi Baal timi biafang cu “a ngeitu” asiloah “bawipa” timi sullam a ngei i anmah le hmunhma ningin a phunphun in an auh cio. Asinain Jehovah timi min cu tluktu a ngei lo i van le vawlei ah amah Pathian he lawng aa pehtlaimi a si. Pathian nih a miphun pawl kha hitin a ti hna: ‘Keimah lawnglawng hi BAWIPA nan Pathian cu ka si. Ka sunparnak hi pathian dang ahohmanh hrawm ka duh hna lo.’​—Isaiah 42:8.

Elijah le Baal profet hna i an thlacamnak cu hmun pakhat ah a phanṭi maw? A phanṭi lo. Baal a biami hna cu an phunglam ningin hlawhhlang rian a ṭuanmi hna le minung hmanh raithawinak ah a pemi hna an si. Asinain Jehovah Pathian biaknak nih Israel mi kha an thang a ṭhatter hna lengah a ṭhalomi phungphai zongin a luatter hna. Mah hi ruathmanh: Na upat tukmi na hawikom pakhat sinah cakuat na duh ahcun na hawikom i a min aa lawh lo lengah na hawi nih a biapi in a ruahmi thil kha zei ah a rel lomi mi pakhat sinah na ca kha na kua lai maw? Na kua hrimhrim lai lo.

Jehovah sinah thla na cammi cu Sertu le mi vialte kan Pa sinah thla na cammi a si. * Profet Isaiah nih “BAWIPA, nangmah cu kan Pa na si” tiah thla a cam. (Isaiah 63:16) Jesuh Khrih zong nih a zultu pawl kha hitin a ti hna: “Ka Pa le nan Pa, ka Pathian le nan Pathian a simi sinah khan ka kal lai.” (Johan 20:17) Jehovah cu Jesuh i a Pa a si. Cucaah Jesuh nih a sinah thla a cam i a zultu pawl zong kha mah Pathian sinah thlacam dingin a cawnpiak hna.​—Matthai 6:9.

Jesuh, Mary, mithiang mi hna asiloah vancungmi hna sinah thlacam dingin Baibal nih a kan fial maw? A kan fial lo. Jehovah Pathian sin lawngah cam dingin a kan fial. A ruang pahnih kha zohhmanh hna u sih. Pakhatnak, thlacamnak cu biaknak phunkhat a si ve i Baibal ah Jehovah lawng kha lungthin dihlak in nan biak lai tiah a kan ti. (Exodus 20:5) Pahnihnak, Pathian cu “thlacamnak a kan lettu” timi upatnak min a ngei tiah Baibal nih a ti. (Salm 65:1) Pathian nih midang kha rian cu a pek ko hna nain thlacamnak ngaih ding timi rian cu ahohmanh a pe hna lo. Nan thlacamnak kaan ngaihpiak hna lai tiah bia a kan kamhtu Pathian cu Jehovah lawng a si.

Cucaah na thlacamnak kha Pathian nih ngai seh ti na duh ahcun “Bawipa min a aumi paoh cu khamhnak an hmu lai” timi Baibal caang kha i cinken peng. (Lamkaltu 2:​21) Asinain Jehovah nih thlacamnak vialte kha a ngai dih maw? Jehovah nih kan thlacamnak kha ngai seh ti kan duh ahcun a dang zeidah kan tuah rih a hau?