4 Zei Kong Dah Thla Kan Cam Awk A Si?
KHRIHFA hna nih atule atu nolh in thla an cammi a um. Mah cu Bawipa thlacamnak asiloah Kan Pa tiah auhmi Jesuh thlacamnak kha a si. Asinain mah thlacamnak a sullam kha mi tam deuh nih cun an hngalthiam lo. Mi thong tampi nih mah thlacamnak kha nikhat ah viokhat asiloah nikhat chungah atule atu an cam. Asinain Jesuh nih cutin a kan camter duhmi a si lo. Zeitindah kan hngalh khawh?
Jesuh nih mah thlacamnak a cawnpiak hna hlanah hitin a ti: “Thla nan cam tikah, Pathian bia lomi nih sullam a ngei set lomi bia tampi an hman bantukin va hmang ve hlah u.” (Matthai 6:7) Jesuh nih Bawipa thlacamnak kha atule atu cam dingin a kan fialmi a si ahcun mah cu aa tlak lai maw? Aa tlak lai lo. Mah canah thla kan cam tikah zei kong dah kan cam awk a si i zei kong dah biapi deuh in kan cam awk a si ti kha Jesuh nih a kan cawnpiak. Jesuh nih a kan cawnpiakmi kong kha zohhmanh hna u sih. Mah thlacamnak cu Matthai 6:9-13 ah langhter a si.
“Vancung khua i a um kan Pa, Na min thiang cu upat si ko seh.”
Jesuh nih a zultu pawl kha a Pa Jehovah sinah thlacam dingin a cawnpiak hna. Asinain Pathian min cu zeicah a biapit tuk ti le zeicah thianter a herh ti kha na hngal maw?
Minung tuanbia aa thawknak in Pathian i a thiangmi a min cu thangchiat a rak si. Pathian ral a simi Satan nih Jehovah kha mi lihchim a si i a sermi thil pawl uk awkah aa tlak lo tiah sual a rak puh. (Genesis 3:1-6) Mi tampi cu Satan lei ah ṭang in Pathian cu a puarhrangmi le teirul cham a duhmi Pathian a si tiah an cawnpiak hna i Pathian kha Sertu in an cohlang lo. Mi cheukhat nih Pathian min zei ah an rel lo kha Baibal ah Jehovah min an hlohnak thawngin le hman an thlauh hnanak thawngin an langhter.
Pathian nih ṭhatlonak vialte kha a hrawh cang lai tiah Baibal nih a ti. (Ezekiel 39:7) Cutin a tuahnak thawngin kan herhmi thil kha a kan pek lai lengah buaibainak vialte kha a kan tawnghthampiak cang lai. Zeitin in dah? Bawipa thlacamnak ah Jesuh chimchapmi bia nih a phi a kan pek lai.
“Na Pennak cu rung tlung ko seh.”
Tuchan ah Khrihfa aa timi hna nih Pathian Pennak kong he aa tlaiin a phunphun in an cawnpiak hna. Asinain hi vawlei a thleng dihtu ding Pathian Pennak ah Pathian nih a thimmi Messiah cu uktu a si lai tiah a luancia kum tampi lioin profet pawl nih an rak chimchung cang. Pathian Pennak kong kha Jesuh bia a ngaimi hna nih cun an hngalh. (Isaiah 9:6, 7; Daniel 2:44) Pathian Pennak nih Satan mi lihchim a si kha a langhter lai i amah le a tuahsernak vialte kha a hrawh dihnak thawngin Pathian min kha thianter a si lai. Cun raldohnak, zawtnak, mangṭam le thihnak hna kha a hrawh lai. (Salm 46:9; 72:12-16; Isaiah 25:8; 33:24) Pathian Pennak ra cang seh tiah thla na cam tikah a cunglei ah langhtermi biakam hna kha tling cang seh tiah thla na cammi a si.
“Vancung khua ah na duhnak an tuah bangin Vawleicung ah hin tuah si ve ko seh.”
Jesuh bia nih Pathian duhnak kha vancung ah a tlin bantukin vawleicung zongah a tling lai ti kha a langhter. Vancung ah Pathian duhnak tlin lo awkah zeihmanh nih a kham kho lo ti cu a fiang ko. Zeinihdah a langhter? Pathian Fapa nih Satan le a vancungmi hna kha a doh hna i vancung in vawlei ah a thlak hna. (Biathlam 12:9-12) Mah Bawipa thlacamnak i tlangthumnak nih tlangkhatnak le tlanghnihnak bantukin kanmah duhnak si loin Pathian duhnak kha biapi ah chiah dingin a kan forh. Pathian duhnak cu sermi thil vialte caah a ṭha bikin thil tuah kha a si. A tlingmi Jesuh hmanh nih a Pa kha hitin a ti: “Keimah nawl si loin nangmah nawl si ko seh.”—Luka 22:42.
“Kan herhmi rawl cu nihin zongah hin kan pe tuah.”
Jesuh nih a dang kan herhmi ca zongah kan cam khawh rih tiah a ti. Nifatin kan herhmi caah thla kan cammi cu a palh lo. Cutin kan tuahmi nih Jehovah cu “minung kha nunnak le thaw le zeizong vialte a petu” Pathian a si ti kha a kan hngalhter. (Lamkaltu 17:25) Pathian cu a fale herhmi a pe dihtu dawtnak a ngeimi nulepa bantuk a si tiah Baibal nih a ti. Cucaah Pathian nih dawtnak a ngeimi nulepa bantukin kanmah caah man a ngei lomi thil kha a kan hal lai lo.
“Kan ṭhatlonak cu kan ngaithiam ve ko.”
Pathian sinah sualnak leiba kan ngei taktak maw? Pathian ngaihthiamnak cu kan herh maw? Tuchan ah mi tampi nih sualnak cu zeidah a si ti kha an hngalthiam lo. Mah lengah sualnak kha zei ah an rel ti lo. Asinain Baibal nih sualnak timi cu a ṭhalo tukmi buaibainak hrampi a si i minung an thihnak cu mah sualnak ruangah a si tiah a ti. Minung cu kan chuahle cangka in sualnak kan ngeih caah atule atu sualnak kan tuah. Cucaah minung ca i hmailei ruahchannak cu Pathian ngaihthiamnak cungah aa hngat. (Rom 3:23; 5:12; 6:23) Baibal ah ‘Maw Bawipa nang cu na ṭha i ngaihthiamnak le a fekmi dawtnak in na khat’ tiah a ti caah lungdaihnak kan hmu.—Salm 86:5.
“Mi ṭhalopa sin khan him tein kan umter tuah.”
Pathian kilvennak na herh kha na hngalthiam maw? “Mi ṭhalopa” asiloah Satan khuachia a um ti kha mi tampi nih an zum lo. Asinain Jesuh nih Satan cu a um taktak tiah a ti lengah “hi vawlei uktupa” ti hmanhin a auh. (Johan 12:31; 16:11) Satan nih a ukmi vawlei kha a thurhnawmhter. Mah lengah nangmah zong na ziaza a rawhral nakhnga le na Pa Jehovah he nan i pehtlaihnak a rawh nakhnga fakpi in aa zuam. (1 Peter 5:8) Asinain Jehovah cu Satan nakin let tampi in a ṭhawn deuh caah amah a dawmi hna kha kilven a duh hna.
Kan thlacamnak ah atu ah kan i ruahmi Bawipa thlacamnak chung i a biapimi a kong hna lawng kha kan cam awk a si maw? A si lo. 1 Johan 5:14 nih Pathian kong he aa tlaiin hitin a chimmi kha i cinken: “Amah duh ningin kan hal ahcun, kan halmi paoh kha a kan pek hrimhrim lai.” Cucaah Pathian sinah thlacam ding tiangin cun ka buaibainak cu a biapimi a si lo tiah ruat hlah.—1 Peter 5:7.
A si ahcun zeitik caan le khoika hmun ah dah thla kan cam awk a si?
Mah Kong Hna Zong Hi Na Duh Khawh Men
Thlacam Cu—Zeitik Caan le Khoika Hmun ah Dah Thla Kan Cam Awk A Si?
Find out if the Bible limits our prayers to certain places and times.
ESSENTIAL BIBLE TEACHINGS
Pathian Pennak Cu Zeidah A Si?
Jesuh nih vawleicung phung a chim lioah zeidang kong nakin Pathian Pennak kong kha a hleiin a rak cawnpiak hna. Kumzabu tampi chung Pennak a rat nakhnga mi tampi nih thla an rak cam.