THLACAMNAK nih a kan ṭhathnem maw? Baibal nih a kan ṭhathnemh tiah a ti. Zumhfekmi Pathian salle pawl cu an thlacamnak nih a ṭhathnemh taktak hna. (Luka 22:40; Jeim 5:​13) Thlacamnak nih Pathian he a kan naihter lengah lungthinlei le pumsalei zongin a kan ṭhathnemh. Zeitin in dah?

Na fa kha mi pakhatkhat nih laklawng an pek hei ti u sih. Na fa kha lawmhnak lungput ngeih awkah na cawnpiak maw? Asiloah aa lawmhnak kong kha chim awkah na cawnpiak maw? Kan intuarnak kha bia in kan chim tikah kan intuarnak cu a thuk chin i a fek chin. Pathian sin i thla kam cam tikah cutin a si ve maw? A si ve. Tahchunhnak cheukhat in zohhmanh hna u sih.

Lawmhnak kong thlacamnak. Kan caah a kan tuahpiakmi thil ṭha ca i thla kan cam tikah kan hmuhmi thluachuah kong kha lungthin kan hun pek deuh. A phichuak cu lawmhnak lungthin kan hun ngei deuh, kan hun i nuam deuh i a ṭhami lungput zong kan ngei deuh.​—Filipi 4:6.

Tahchunhnak: Jesuh nih a thlacamnak kha Pathian nih a ngaihpiak caah aa lawmhnak kong kha a rak chim.​—Johan 11:41.

Ngaihthiamnak caah thlacamnak. Pathian ngaihthiamnak kan hmuh nakhnga thla kan cam tikah kan chiaṭha thleidannak lungthin a thiang, lungtak tein kan i ngaichih lengah sualnak cu a ṭhalo tukmi a si ti zong kha kan hun hngalh. Mah lengah sualnak ka ngei timi ruahnak zong kan ngei deuh ti lo.

Tahchunhnak: David nih a thlacamnak ah aa ngaihchihnak kong le a ngaihchiatnak kong kha a rak chim.​—Salm 51.

Lamhruainak le fimnak hmuh awkah thlacamnak. A ṭhami biakhiahnak kan tuah khawh nakhnga lamhruai awk asiloah kan herhmi fimnak pek awkah Jehovah sinah thla kan cammi nih toidornak a kan ngeihter. Cun ri kan ngei ti kha a kan hngalhter lengah Pathian cungah kan zumhnak zong a fehter chin.​—Phungthlukbia 3:​5, 6.

Tahchunhnak: Solomon nih Israel ram a uk khawh nakhnga fimnak le lamhruainak ka pe tiah Pathian sinah toidor tein thla a cam.​—1 Siangpahrang 3:​5-​12.

Lungretheih tikah thlacamnak. Kan lungre a theih ruang i thla kan cam tikah lungdaihnak kan hmu i kanmah nakin Pathian kha kan hun i bochan deuh.​—Salm 62:8.

Tahchunhnak: Siangpahrang Asa cu ṭih a nungmi thil a ton lioah thla a rak cam.​—2 Chanrelnak 14:11.

Bawmhnak a herhmi hna caah thlacamnak. Cu bantuk thlacamnak nih kanmah zawn lawng i ruat loin zaangfahnak le zawnruahnak a kan ngeihter.

Tahchunhnak: Jesuh nih a zultu pawl caah thla a campiak hna.​—Johan 17:​9-​17.

Thangṭhatnak ca thlacamnak. Jehovah i a ṭha tukmi a sining hna kan thangṭhat tikah amah kha kan upat chin i a cungah kan i lawm chinchin. Cu bantuk thlacamnak nih Pathian he a kan naihter chin.

Tahchunhnak: David nih a thil sermi ruangah Pathian kha lungtho tein a thangṭhat.​—Salm 8.

Thlacamnak he aa tlaiin a dang thluachuah pakhat cu “Pathian daihnak, minung hngalhnak a lonhtu” kha a si. (Filipi 4:7) Sifah harnak in a khatmi hi vawlei ah lungdaihnak ngeih cu thluachuah taktak a si. Mah nih kan ngan zong a damter. (Phungthlukbia 14:30) Asinain cu bantuk ṭhathnemhnak cu kanmah kan i zuamnak thawngin a si maw? Asiloah mah nakin a biapi deuhmi thil pakhatkhat ruangah dah a si?