BIAKNAK tam deuh nih cun thlacamnak caah a hleiin an timhtuahmi hmun hna kha biapi ah an chiah i zeitik caan ah dah cam ding timi kong he aa tlaiin ri an khiahmi kha na hngalh ko lai. Baibal ah thlacamnak caan le hmun kong he aa tlaiin rikhiahmi a um maw?

Baibal nih thlacam awkah aa tlakmi caan a um tiah a ti. Tahchunhnak ah, Jesuh nih a zultu pawl he rawl an ei hlanah Pathian sinah thla a cam. (Luka 22:17) Cun a zultu pawl cu an i pumh tik zongah hmunkhat ah thla an camṭi hna. Cuticun Jerusalem biakinn le Judah pumhnak inn hna ah hlanliopi in an rak tuah tawnmi thlacamnak phungphai ningin an rak tuah peng. Pathian nih pumhnak inn kha “miphun vialte hna thlacamnak inn” in a tahchunh.​—Marka 11:17.

Pathian salle pawl hmunkhat ah i fonh in thla an cammi cu hmual a ngei kho. Lungkhat tein an um i an thlacamnak cu Baibal he aa tlak ahcun thla an cammi cu Pathian nih a cohlan lai. Cu bantuk thlacamnak nih Pathian kha tuah aa timh lomi thil hmanh kha tuah ṭhan awkah a forh khawh. (Hebru 13:18, 19) Jehovah Tehte Hna cu an i pumhnak ah thla an cam peng. Nangmah he aa naihnak hmun ah a ummi Biakinn ah i pumh dingin lungtho tein kan in sawm.

Asinain Baibal nih thlacamnak caan le hmun kong kha a chim lo. Baibal ah Pathian salle pawl cu zeitik caan paoh le khoika hmun paohah thla an cam tiah a ti. Jesuh nih hitin a ti: “Nannih cu thla nan cam tikah, nan inn khaan chungah va lut u law, innka vaa khar khumh u law, cuticun hmuh khawh lomi nan Pa sinah khan va cam u. Cun a thli tein nan tuahmi a hmutu nan Pa nih khan laksawng aan pek hna lai.”​—Matthai 6:6.

Mah sawmnak cu a ṭha tukmi a si ko lo maw? Van le vawlei Sertu Pathian sinah zeitik caan paoahah zalong tein na naih khawh. Cun na thlacamnak cu ngaihpiak na si lai ti zong kha na zumh khawh. Jesuh nih amah te lawngin thlacam awkah atule atu aa zuammi cu khuaruahhar awk a si lo. A caan ah a biapimi biakhiahnak tuah awkah lamhruainak hmuh dingin Pathian sinah zan khuadei hmanh thla a rak cam.​—Luka 6:​12, 13.

A biapimi biakhiahnak an tuah tik le thil ṭihnung an ton tikah thla a cammi nu le pa kong kha Baibal ah langhter a si. A caan ah awchuah in an cam i a caan ah awchuah loin an cam. A phu zongin an cam i anmah lawng zongin an cam. Pathian nih a salle kha “a zungzal in thlacam u” tiah a sawm hna. (1 Thesalon 5:​17) A duhnak a tuahmi hna an thlacamnak kha lungtho tein a ngaihpiak zungzal hna. Mah cu a ṭha tukmi sawmnak a si.

Mahzawn ruahnak lawngin a khatmi hi vawlei ah mi tampi nih thlacamnak man a ngeih ning kong kha hngalh an duh. ‘Thlacamnak nih a ka ṭhathnemh hnga maw?’ tiah nangmahle nangmah naa hal men lai.