Sui Sui: Sung Sung. Na ka hngal ti ma?

Sung Sung: Aw, kaan hngalh ko. Kan hnu zarh i Baibal kong a ka chimmi Sui Sui kha na si ko lo ma?

Sui Sui: Aw, ka si. Kan hnu zarh ah khan kan tonmi sifah harnak he aa tlaiin Pathian cu zeitindah a um timi kong kan rak i ruah. * Mah kong kha hngalh na rak duhnak a sau cang, a si ko lo ma? A hleiin na nu mawṭaw accident a ton hnuah hngalh ka hun duh chin tiah na ti lo mei? Kan bia lakah na nu a dam ko lo ma?

Sung Sung: A dam deuh chel, a zual deuh chel a si ko. Tuni cu a dam ko.

Sui Sui: A ṭha tuk. Atu bantuk thil sining nan tonmi cu na caah a har tuk ko lai.

Sung Sung: A har tuk ko. A caan ahcun ka nu nih zei can dah fahnak hi a in lai tiah ka ruat tawn.

Sui Sui: Na mawh bak lo. Kan hnu zarh ah khan ka ṭin laite ah Pathian cu ṭhawnnak a ngei ko nain zeicah sifah harnak hi umnak nawl a awnh tiah kaan halmi kha naa cinken ti ma?

Sung Sung: Kaa cinken ko.

Sui Sui: Mah kong kan i ruah hlanah nai kan i ruahmi kong kha a tawinak in i ruah ṭhan ta u sih.

Sung Sung: Awaw.

Sui Sui: Pathian nih sifah harnak hi zeicah umnak nawl a awnh timi kong kha Baibal chan i zumhfekmi pakhat zong nih hngalh a rak duh. Cutin biahalnak a tuah caah Pathian nih a mawhchiat lo i na zumhnak na fehter deuh a hau ti zongin a rak ti lo.

Sung Sung: Mah kong kha nangmah nih na chim lawngin ka theih.

Sui Sui: Sifah harnak kan tonmi hi Pathian nih hmuh a duh lo ti zong kan hngalh. Tahchunhnak ah, a miphun nih harnak an ton tikah “Pathian cu a lung a fak” * tiah Baibal nih a ti. Harnak kan ton tikah Pathian a lung a fak ti kan hngalhmi nih hnemhnak a kan pek, a si ko lo ma?

Sung Sung: Aw, a si.

Sui Sui: Ṭhawnnak a ngeimi Pathian nih sifah harnak hna hi chikkhat te ah a hrawh khawh ti kha kan i ruah cang ti.

Sung Sung: Mah kong kha kaa fian lomi cu a si. Pathian nih ṭhatlonak hna hi a hrawh khawh ko buin zeicah umnak nawl a awnh?

Sui Sui: Na biahalnak i a phi kha Baibal i hmasa bik a simi, Genesis ah kawl hmanh u sih. Adam le Evi kong kha na thei bal ko lo ma?

Sung Sung: Aw, ka theih bal ko. Pathian nih thingkung pakhat i a thei kha ei lo dingin a thlauh ko hna nain an rak ei, a si ko lo ma?

Sui Sui: A si. Atu Adam le Evi nih sualnak an tuahnak kong kha i ruah ta u sih. Mah kong cu atu sifah harnak kan tonnak a ruang he direct in aa pehtlaimi a si. Sung Sung, Genesis dal 3, caang 1 in 5 tiang kha na rel kho lai ma?

Sung Sung: Awaw. “BAWIPA Pathian nih a sermi saram hna lakah rul hi a zer bikmi a si. Rul nih cun minu kha a thawh i ‘Dum chung i a ummi thingthei hi a zeihmanh nan ei lai lo tiah Pathian nih aan ti taktak hna maw?’ tiah a hal. Nu nih cun, ‘Dum laifang i a ummi thingthei khi dah ti lo cu, dum chung i a ummi thingthei vialte hi a zeipaoh kan ei khawh ko hna’ tiah a leh. ‘Pathian nih khi thing khi cu a tlai nan ei lai lo, a tawngh zong nan tawng lai lo, nan tawngh ahcun nan thi lai, a kan ti’ tiah a ti. Mah tikah rul nih nu kha ‘Cucu a hmaan lo; nan thi lai lo. Pathian nih cu bantukin a ti cu kha thingthei nan ei ahcun nan ei cangka in amah bantukin hngalhnak nan ngei ve lai i a ṭha le a ṭhalo kha nan hngal ve lai ti a hngalh caah a si’ tiah a ti.”

Sui Sui: Kaa lawm. Mah Baibal caang hi chikkhat zoh ta hmanh u sih. Rul nih minu kha a chawnh tiah mah Baibal caang nih a ti. Rul hmangin Evi a chawntu cu Satan Khuachia a si ti kha a dang Baibal caang in kan hngalh. * Satan nih Evi kha thingkung pakhat kong he aa tlaiin Pathian chimmi bia kha a hal. Adam le Evi nih mah thingthei kha an ei ahcun zeidah an ton lai?

Sung Sung: An thi lai.

Sui Sui: A hmaan. Asinain Satan nih cun “nan thi lai lo” tiah a ti. Cutin a chimnak thawngin Pathian cu lihbia a chimmi a si tiah sual a phawt.

Sung Sung: Aw, a si tak. Mah kong cu ka thei bal lo.

Sui Sui: Satan nih Pathian kha lih a chimmi in sual a phawt caah mah kong a hmaan le hmaanlo hngalh awkah a caan pek a hau. Zei ruangah a hauh ti kha na hngal ma?

Sung Sung: Ka hngal lo.

Sui Sui: Mah kong hngalhthiam awkah tahchunhnak pakhat in kaan chimh lai. Nangmah nakin ka ṭhawng deuh tiah ka chim hei ti u sih. Ka chimmi a hmaan le hmaanlo hngalh awkah zeidah na tuah lai?

Sung Sung: Thil pakhatkhat in kaan hneksak lai.

Sui Sui: A si. A ritmi thil pakhat kha aho nih dah a cawi khawh tiin kan hneksak lai, a si ko lo ma? Cutin kan tuah tikah ahodah a ṭhawng deuh ti kha a lang lai.

Sung Sung: Na chim duhmi kaa fiang.

Sui Sui: Asinain nangmah nakin ka ṭhawng deuh tiah ti loin ka dingfel deuh tiah ka ti ah tah? Mah kong tu cu a phi hngalh awkah a har deuh lai, a si ko lo ma?

Sung Sung: A si, a har deuh lai.

Sui Sui: Ahodah a dingfel deuh ti kha fawi tein hngalh khawh colh a si lai lo. Tawnghtham khawh ning lamkhat cu kan pahnih ah ahodah a dingfel deuh ti kha mi nih an hngalh nakhnga a caan pek a hau lai.

Sung Sung: A hmaan tuk.

Sui Sui: Atu Genesis kha zoh ṭhan hmanh u sih. Satan nih Pathian nakin ka ṭhawng deuh tiah a ti ma?

Sung Sung: A ti lo.

Sui Sui: A si, cutin rak chim sehlaw Satan a palh ti langhter cu Pathian caah a fawi tukmi a si. Asinain Satan nih Pathian nakin ka dingfel deuh tiah a rak ti. Satan nih Evi kha ‘Pathian nih aan hlen, asinain kei nih cun a hmaanmi kaan chimh’ tiah a timi bantuk a si.

Sung Sung: Hngalh duh awk ngai a si.

Sui Sui: Cucaah mah buaibainak tawnghtham awkah a ṭha bikmi lam cu a caan pek a si ti kha fimnak in a khatmi Pathian nih a hngalh. A donghnak ah ahodah dah a hmaan i ahodah lihbia a chim ti cu a lang lai.

Sung Sung: Evi a thih tikah Pathian chimmi a hmaan ti cu a lang ko lo ma?

Sui Sui: A lang ko, asinain Satan nih Pathian sual a puhmi cu mah lawng a si lo. Caang 5nak kha zoh ṭhan u sih. Satan nih Evi kha zeitindah a ti rih na hngal ma?

Sung Sung: Evi kha mah thingthei na ei ahcun na mit a fim lai tiah a ti.

Sui Sui: A si. Mah lawng hmanh si loin Pathian “bantukinhngalhnak nan ngei ve lai i a ṭha le a ṭhalo kha nan hngal ve lai” ti zongin a ti. Cutin a chimmi cu Pathian nih minung kha thilṭha pakhatkhat a thuhkanh hna tiah sual a puhmi a si.

Sung Sung: Aw, a si tak ko.

Sui Sui: Mah cu a fak tukmi sualpuhnak a si.

Sung Sung: Zeidah na chim duhmi a si?

Sui Sui: Satan chimmi ningin cun Evi lawng si loin mi vialte cu Pathian uknak loin ṭha tein nun khawh a si ko tiah a chimmi a si. Mah kong zongah Satan a caan pek cu a ṭha bikmi tawnghtham ning a si ti kha Jehovah nih a hngalh. Cutin caan a peknak thawngin Satan sualpuhnak cu a hmaan maw, hmaanlo ti a lang lai. Cucaah Pathian nih caan caankhat tiang Satan kha uknak nawl a awnhmi a si. Hi tlukin sifah harnak a tamnak a ruang cu Pathian nih vawlei a uk caah si loin Satan nih a uk caah a si ti cu a fiang ko, a si ko lo ma? * Asinain thawngṭha pakhat a um.

Sung Sung: Zei thawngṭha dah?

Sui Sui: Baibal nih Pathian kong he aa tlaiin biatak pahnih a langhter. Pakhatnak, sifah harnak kan ton tikah Pathian cu kan sinah a um. Tahchunhnak ah, Salm 31:7 i Siangpahrang David chimmi bia kha i ruah hmanh u sih. David cu a nunnak ah sifah harnak tampi a rak tong. Asinain Pathian sinah thla a cam i zei kong dah a chim ti kha zohhmanh u sih. Zaangfahnak in na ka relpiak kho lai ma?

Sung Sung: Aw, a ngah ko. Hitin a ti: “A fekmi na dawtnak ruangah ka lung aa lawm lai i ka tha a nuam lai. Ka temhinnak kha na hmuh i ka harnak kha na hngalh.”

Sui Sui: David cu sifah harnak a tong ko nain a tonmi thil kha Jehovah nih a hmuh ti a hngalh caah a hna a rak ngam. Cu bantukin kan intuarnak kha midang nih ṭha tein an hngalhthiam lo hmanhah Jehovah nih a hmuh i a hngalh timi nih Sung Sung, na hna aan ngamter tuk, a si ko lo ma?

Sung Sung: A si.

Sui Sui: Pahnihnak cu Pathian nih kan tonmi sifah harnak hna hi zungzal in umnak nawl a awnh lai lo timi biatak kha a si. Satan ukmi hi vawlei cu a rauhhlan ah Pathian nih a hrawh cang lai tiah Baibal nih a ti. Atu ah a ummi ṭhatlonak vialte cu an lo dih cang lai. Mah tikah nangmah he, na nu he nan tonmi sifah harnak vialte zong a lo dih cang lai. Hmaizarh ah Pathian nih sifah harnak vialte a donghter cang lai tiah zeicah kan zumh khawh? timi kong kan i ruah te lai. *

Sung Sung: A ṭha tuk. Siseh.