Mah brochure na hlathlai dih hnuah Baibal lamhruainak hna cu nangmah le na chungkhar nuamhnak caah bawmtu a si lai. Jehovah Pathian nih i nuam seh ti an duh. Na nunnak ah Jehovah Pathian kha hmasa bik ah na chiah ahcun, ‘thil dang vialte hna zong hi kaan pek ṭhiamṭhiam ko hna lai’ tiah bia a kan kamh. (Matthai 6:33) Pathian nih nangmah he hawikom si a duh caah nangmahlei zongin hawikom nan si khawh nakhnga na si khawh chungin i zuam. Pathian he hawikom si khawh cu tinvo sung taktak a si.—Matthai 22:37, 38.

BAIBAL CHIMMI: “‘Keimah cu nan pa ka si lai i nannih cu ka fapale le ka fanule nan si lai, tiah Bawipa Lianngan Bik nih a ti,’ tiah a ti.” (2 Korin 6:18) Pathian nih nangmah he i naih a duh. Cutin i naih khawhnak lam khat cu thlacamnak in a si. Cucaah Jehovah Pathian nih a sinah “a zungzal in thlacam” awkah aan sawm. (1 Thessalon 5:17) Pathian nih na lungchung i a ummi le na lungretheihnak hna kha ngaihpiak aan duh. (Filipi 4:6) Na chungkhar hna he thla nan camṭi tikah Jehovah Pathian cu na caah a um taktakmi a si kha na chungkhar nih an hngalh lai.

Pathian sinah lungchung i a ummi phuan cu a ṭha. Asinain Pathian nih a chimmi zong kha na ngaih ve a hau. Baibal le Baibal hrambunh in chuahmi cauk hna hlathlai cu Pathian nih a chimmi ngaih he aa lo. (Salm 1:1, 2) Na hlathlaimi kong hna kha ruat ṭhan. (Salm 77:11, 12) Pathian bia ngaih awkah Khrihfabu pumhnak hna ah hmaan tein i pumh zong a herh. —Salm 122:1-4.

Jehovah Pathian he i naih khawhnak a dang lam khat cu midang sinah amah kong chimnak in a si. Jehovah Pathian kong kha midang na chimh deuhdeuh hna tikah amah he nan i naih deuhdeuh ve lai.—Matthai 28:19, 20.

NA TUAH KHAWHMI:

• Nifatinte Baibal relnak le thlacamnak caah a caan pe

• Nuamhsaihnak le i dinhnak hna nakin biaknaklei he aa tlaimitu kha chungkhar ningin hmasa ah chia u

BAIBAL CHIMMI: “Pathian cu naih u law an naih ve hna lai.” (Jeim 4:8) Chungkhar pumhnak* hmaan tein nan tuah khawh nakhnga cazin suai law mahning tein tuah u. (Genesis 18:19) Mah lengah na nunnak ah Pathian hngalh buin nifatinte nun zong a herh. Pathian le na chungkhar pehtlaihnak a ṭhat khawh nakhnga “na innchung i na ṭhut ah siseh, lam i na kal ah siseh, na ih ah siseh, na thawh ah siseh” Pathian kong kha chim lengmang hna. (Deuteronomi 6:6, 7) “Keimah le ka innchungkhar tu nih cun BAWIPA kha kan biak ko lai” tiah Joshua nih a chim bantukin nang zong chim khawh ve awkah hmuitinh ngei.—Joshua 24:15.

* Tam deuh in hngalh na duh ahcun Tuchan ah Ahote nih Dah Jehovah Duhnak an Tuah? timi brobure ṭhen 10nak ah a ummi “Chungkhar Pumhnak cu Zeidah a Si? timi biatlang tangah zoh.

NA TUAH KHAWHMI:

• Chungkhar pumhnak kha ningcang tein le hmaan tein tuah, mah pumhnak ah chungkhar pakhat cio i an herhmi kha telhchih law ruahṭi hna