Ṭhen 7
Ngakchia Cawnpiak Khawh Ning
“Nihin ah kan pekmi bia hi na lung chungah an riak lai i na fale kha fel tein na cawnpiak hna lai.”—Deuteronomi 6:6, 7
Chungkhar hram a thawktu Jehovah Pathian nih fale zohkhenh hna awkah nulepa kha rian a pek hna. (Kolose 3:20) Ngakchia hna nih Jehovah Pathian an dawt nakhnga le ṭuanvo a la khomi upa an si khawh nakhnga nulepa nih nan cawnpiak hna awk a si. (2 Timote 1:5; 3:15) Mah lengah fale hna i an lungthin ah zeidah a um ti zong hngalh khawh nan i zuam lai. Nan biachim le nan tuahsernak hna cu ngakchia caah a biapi tuk. Jehovah Pathian Bia kha a hmasa bikah na lung chungah na chiah ahcun ngakchia hna kha ṭha tein na cawnpiak khawh hna lai.—Salm 40:8.
1 NGAKCHIA HNA NIH NANGMAH HE BIARUAH AN DUH NAKHNGA BAWM HNA
BAIBAL CHIMMI: ‘Bia theih duhnaklei ah a khul a rangmi si u law biachimnaklei ah a khul a nuarmi si u.’ (Jeim 1:19) Ngakchia hna kha nulepa sinah zalawng tein lung chungah a ummi bia chim khawh a si ti kha hngalhter na duh ko hna lai. Lung chungah a ummi bia chim an duh tikah nangmahlei in ngaihpiak hna awkah timhcia na si kha an hngalh a herh. Nangmahlei in chimh ngam dingin na um lawngah anmahlei in zalawng tein chim awkah a fawiter lai. (Jeim 3:18) Aw hrangpi in biachim a hmangmi asiloah sualnak kawl a hmangmi a si tiah an in ruah ahcun an lung chung i a ummi bia kha an in chim ngam ti lai lo. Cucaah na fale cungah na lungsau law zeitlukin dah na dawt hna ti kha atu le atu chim hna.—Matthai 3:17; 1 Korin 8:1.
NA TUAH KHAWHMI:
-
Ngakchia hna nih biachim an duh tikah ngaihpiak hna
-
Buaibainak a chuah tik lawngah ngakchia hna he bia i ruah tibantuk si loin hmaan tein bia ruah peng hna
2 AN CHIM DUHMI KHA HNGALHTHIAM I ZUAM
BAIBAL CHIMMI: “Thil pakhat kha a hngalthiammi nih cun hlawhtlinnak a hmuh lai.” (Phungthlukbia 16:20, NW) A caancaan ah ngakchia hna i an intuarnak taktak kha hngalh khawh awkah an chim duhmi kha hngalhthiam i zuam a herh. Zeicahtiah mino hna cu biaperh asiloah ruatsetsai loin biachim an hman caah a si. “Bia na leh hlanah ngai hmasa, cu ti na tuah lo ahcun na hruh a si.” (Phungthlukbia 18:13) Cucaah ngakchia hna cungah na thinhung colh hlah.—Phungthlukbia 19:11.
NA TUAH KHAWHMI:
-
Ngakchia hna nih zei an chim paohah lungcawlcangh in lehrulh colh asiloah an bia tan tibantuk tuah lo awkah biakhiak
-
Nangmah zong anmah ṭhi na si lioah zeibantuk ruahnak dah na rak ngeih ti le zei hna dah na caah a biapi tiah na rak ruah ti kha philhhlah
3 NGAKCHIA HNA HMAIAH LUNGRUALNAK LANGHTER U
BAIBAL CHIMMI: “Ka fapa, na pa cawnpiaknak cu ngai law na nu ṭhithruainak cu hlaw hlah.” (Phungthlukbia 1:8) Jehovah Pathian nih ngakchia zohkhenh hna awkah nulepa kha rian a pek hna. Cucaah ngakchia hna nih upatnak le nawlngaihnak an ngeih nakhnga nulepa hna nih cawnpiak hna u. (Efesa 6:1-3) Nulepa hna “lungnge tein” le “lungthin khat” tein nan um lo ahcun mah kha ngakchia hna nih an hngalh khawh. (1 Korin 1:10) Nan lung aa khah lo hmanhah ngakchia hna kha theihter hna hlah u. Mah lawngah ngakchia hna nih an in upat khawh hna lai.
NA TUAH KHAWHMI:
-
Ngakchia hna kha zeitindah kan cawnpiak hna lai ti kha i ruahṭi u law mah ningin tuah u
-
Ngakchia hna cawnpiaknak kong he aa tlaiin nan hmuhnak aa khah lo ahcun innchung hawi i a hmuhnak kha hngalhthiam i zuam
4 TIMHTUAHNAK NGEI
BAIBAL CHIMMI: “A zulh awk a simi lam kha ngakchia cu cawnpiak.” (Phungthlukbia 22:6) Ngakchia hna cu anmah tein fimnak an hung ngei lai lo. Timhtuahnak ngeih in na cawnpiak hna an hau. Mah ah chimhhrinhnak zong aa tel. (Salm 127:4; Phungthlukbia 29:17) Chimhhrinh timi cu dantat men lawng kha a chim duhmi a si lo. Mah ah an caah dingrep na chiahpiak hnanak a ruang kha an theihthiam nakhnga chimh hna zong aa tel. (Phungthlukbia 28:7) Mah lengah Jehovah Pathian i a Bia kha an duh nakhnga le a lamhruainak hna kha an theihthiam nakhnga cawnpiak hna. (Salm 1:2) Mah lawngah an chiaṭha thleidannak lungthin a ṭhangcho lai.—Hebru 5:14.
NA TUAH KHAWHMI:
-
Pathian cu bochan khawhmi a si ti kha ngakchia hna nih an hmuhthiam nakhnga cawnpiak hna
-
Internet in hawikom i ser tibantuk ziaza a rawhter khomi thil ṭihnung hna kha hngalthiam in an hrial khawh nakhnga ngakchia hna kha cawnpiak hna. Nupa sinaklei in a miak a kawlmi hna kha zeitindah hrial khawh an si ti kha an hngalh nakhnga cawnpiak hna
“A zulh awk a simi lam kha ngakchia cu cawnpiak”