Ṭhen 2
Pakhat le Pakhat Cungah Zumhawktlak tein um U
“Pathian nih a fonhmi hna cu minung nih ṭhen awk a si lo.” —Marka 10:9
Jehovah Pathian nih ‘zumhawktlak’ tein um awkah a kan hal. (Salm 31:23) Mah cu a hleiin na chungkhar caah a biapi. Zeicahtiah zumhawktlak kan si lo ahcun zumhnak a um kho lo. Zumhnak a um lo ahcun dawtnak zong a um kho ti lai lo.
Tuchan ah, nuva hna cu innchung hawi cungah zumhawktlak loin a umter khomi thil tampi an tong. Cucaah na chungkhar na kilven khawh nakhnga a kong pahnih tuah dingin biakhiahnak na tuah awk a si.
1 NA INNCHUNG HAWI KHA BIAPI AH CHIA
BAIBAL CHIMMI: “A biapi deuhmi thil kha fiang tein hngal.” (Filipi 1:10, NW) Na nunnak ah a biapi bikmi thil hna lakah pakhat cu na chungkhar a si. Cucaah na innchung hawi kha biapi ah na chiah awk a si.
Na innchung hawi zohkhenh ding le amah he ‘nun chung i nuamhṭi’ ding kha Jehovah Pathian nih a duh. (Phungchimtu 9:9) Innchung hawi kha zeitikhmanh ah daihthlanh lo awk le pakhat le pakhat lawmhnak a hmuhter hnga dingmi lam kha kawl awkah Pathian nih fiang tein a chim. (1 Korin 10:24) Na herh le na sunsak kha na innchung hawi nih hngal seh.
NA TUAH KHAWHMI:
-
Na innchung hawi he a caan pe u law bia i ruah u, hmunkhat ah ṭuanṭi u law na lungthin dihlak in zohkhenh
-
“Keimah” tiah ruah canah “kanmah” tiin ruat
2 NA LUNG KHA ṬHA TEIN VENG
BAIBAL CHIMMI: “Ahohmanh nih nu kha sual duhnak lungthin he a zoh ahcun, cu pa cu a lung chungin a sual cang.” (Matthai 5:28) Pakhatkhat nih ziaza a rawhtermi thil kong hna kha a ruah ahcun a innchung hawi cungah zumhawktlak loin a um bantuk a si.
Jehovah Pathian nih “na lung kha ṭha tein veng” tiah a ti. (Phungthlukbia 4:23; Jeremiah 17:9) Cutin tuah khawh awkah na zohmi thil kha naa ralrin a hau. (Matthai 5:29, 30) Nu dang kha sual duhnak lungthin he a zoh sual nakhnga lo a mit he biakamnak a tuahmi Job kha i zohchunh. (Job 31:1) Nang zong zeitikhmanh ah a thurhnawmmi hmanthlak kha zoh lo awkah biakhiahnak tuah. Na innchung hawi he dah ti lo cu aho he hmanh i duh lo awkah biakhiahnak tuah.
NA TUAH KHAWHMI:
-
Na innchung hawi cungah zumhawktlak na si kha midang hngalhter hna
-
Na innchung hawi i a intuarnak kha ruahpiak. Nupa sinak aa dangmi he nan i komhmi nih na innchung hawi kha lungnuam loin a umter ahcun amah he nan i komhnak kha ngol colh
