Jehovah a Pathian cu ṭhitumnak hram a thawktu a si. A hmasa bik minu kha a ser i ‘mipa sinah a ratpi’ tiah Baibal nih a ti. Mah tikah Adam cu aa nuam tuk i hitin a ti: “Atu hi pei keimah phun taktak a simi cu a si hi, ka ruh i lakmi ruh, ka sa in lakmi sa.” (Genesis 2:22, 23) Jehovah Pathian nih atu tiang aa ṭhiummi hna kha i nuam hna seh ti a duh peng hna.

Nupi, va na ngeih tikah zei zong vialte tlam a tling dih cang tiah na ruah khawh men. A taktak ah cun pakhat le pakhat dawtnak taktak he i duh in aa ṭhiummi hna hmanh nih buaibainak cheukhat an ton. (1 Korin 7:28) Mah brochure ah chungkhar a nuamhter hngami Baibal lamhruainak hna kha na hmuh lai. Mah lamhruainak hna kha na zulh ahcun nan i ṭhitumnak le chungkhar ah nuamhnak a um lai.—Salm 19:8-11.

BAIBAL CHIMMI: Chungkhar lu cu vale an si.—Efesa 5:23.

Vale nan si ahcun nan nupile kha dawt zaangfah hna awk le zohkhenh hna awkah Jehovah Pathian nih aa ruahchan. (1 Piter 3:7) Nanmah bawmtu ding caah nupile kha Jehovah Pathian nih an pek hna. Cucaah Pathian nih nan nupile kha hmaizahnak le dawtnak he pehtlai hna seh ti a duh. (Genesis 2:18) Nanmah duhnak nakin nupile duhnak kha hmasa ah chiahnak thawngin nan nupile nan dawt tuk hna kha nan langhter awk a si.—Efesa 5:25-29.

Nupile nan si ahcun nan vale kha lungtak tein upat hna awk le an rian an ṭuan khawh nakhnga bawmh hna awkah Jehovah Pathian nih an hal hna. (1 Korin 11:3; Efesa 5:33) Nan vale biakhiahnak kha cohlang u law nan lungthin dihlak in anmah he ṭuanṭi u. (Kolose 3:18) Cutin nan tuah ahcun nan vale hmaiah le Jehovah Pathian hmaiah a man a sungmi nu nan si lai.—1 Piter 3:1-6.

NA TUAH KHAWHMI:

• Zeitindah nupi ṭha asiloah va ṭha na si khawh ti kha na innchung hawi hal. A chimmi kha ṭha tein ngai law mah ningin tuah awkah i zuam

• Na lungsau. Nan pahnih ningin caan pe u law ka innchung hawi aa nuamh khawh nakhnga zeitindah ka tuah lai ti kha hngalh awkah i zuam u

BAIBAL CHIMMI: Na innchung hawi a duhnak kha theihthiam naa zuam a hau. (Filipi 2:3, 4) Na innchung hawi kha sunsak. Jehovah Pathian nih “mi vialte cungah zaangfahnak” ngeih dingin a salle a hal hna kha philhhlah. (2 Timote 2:24) “Ruah set loin chimmi bia nih cun nam chunh bangin mi a chunh, sihmanhsehlaw mifim mi bia nih cun hma kha a damter” tiah Baibal nih a ti. Cucaah ṭha tein na ruah hnuah bia chim. (Phungthlukbia 12:18) Zaangfahnak le dawtnak he bia chim khawh awkah Jehovah thiang thlarau nih aan bawmh lai.—Galati 5:22, 23; Kolose 4:6.

NA TUAH KHAWHMI:

• Na innchung hawi he a biapimi kong nan i ruah hlanah lungdaih khawh awk le a ṭhatnaklei in hmuhnak ngeih khawh awkah thlacam

• Zeidah ka chim lai timi le zeitindah ka chim lai timi kha ṭha tein ruat

BAIBAL CHIMMI: Nupi, va na ngeih tikah na innchung hawi he “pum khat” nan si cang. (Matthai 19:5) Asinain pum dang veve nan si caah nan hmuhnak cu aa lo lai lo. Cucaah nan ruahnak le nan intuarnak cu aa khah khawh nakhnga nan cawn a herh. (Filipi 2:2) Nan lung aa rual lawngah biakhiahnak kha aa khat tein nan tuah khawh lai. Baibal nih hitin a ti: “Lungthin i cheuhnak in khuakhanmi kha a hmun.” (Phungthlukbia 20:18) Baibal lamhruainak kha cohlang in a biapimi biakhiahnak kha tuahṭi u.—Phungthlukbia 8:32, 33.

NA TUAH KHAWHMI:

• Na innchung hawi kha buaibainak hna le na hmuhning lawng kha chim hlah. Na intuarnak zong kha chim

• Biakhiahnak na tuah hlanah na innchung hawi he i ruahṭi hmasa u