Nupi, va ngeih timi cu chungkhar thar dirh a si. Nulepa cu a zungzal in dawt hna awk le upat hna awk a si ko nain atu ah cun na innchung hawi cu na caah a biapi bikmi a si cang. Mah cu na rualchan hna caah cohlan awkah a har kho men. Chungkhar thar dirh buin rualchan hna he zong rem tein um khawh awkah Baibal lamhruainak nih aan bawmh khawh.

BAIBAL CHIMMI: “Nanu le napa upat hna.” (Efesa 6:2) Kum zeizat na si hmanhah nulepa kha a zungzal in na upat hna awk le na hmaizah hna awk a si. Na innchung hawi zong fa pakhat in a nulepa kha a upat ve hna awk a si ti kha philhhlah. “Dawtnak cu a nah a chuak lo” tiah Baibal nih a ti. Cucaah na innchung hawi nih a nulepa he naih tein a ummi kha zeitikhmanh ah lungsiarem loin um hlah.—1 Korin 13:4; Galati 5:26.

NA TUAH KHAWHMI:

• “Na chungkhar nih a zungzal in a kan namneh” asiloah “Nanu nih ka tuahmi paoh zeitikhmanh ah a ṭhatnaklei in a ka hmuhpiak bal lo” tibantuk biaperh in chim kha hmang hlah

• Na innchung hawi zaka in hmuhthiam i zuam

BAIBAL CHIMMI: “Cucaah cun pei pa nih a nu le a pa a kaltak hna i a nupi he an i fonh i pumkhat i an can hi a si cu.” (Genesis 2:24) Nulepa nih nupi, va na ngeih hnu hmanhah na caah rian kan ngei rih tiah an ruah khawh men. Nan chungkhar ah an i tel awk leng tiangin i thlak an duhmi zong a si kho men.

Nulepa hna kha zeitluk tiangin dah i telnak nawl kan pek hna lai ti kha nan pahnih in biakhiak u law mah kha upatnak he theihter hna u. Hmaizahnak le a hmaanning tein nan chimh khawh hna. (Phungthlukbia 15:1) Toidornak, nemnak le lungsaunak nan ngeih ahcun nan rualchan hna he nan i pehtlaihnak a ṭhat lai lengah pakhat le pakhat nan i ngaithiam kho lai i “dawtnak” zong nan ngei peng kho lai.—Efesa 4:2.

NA TUAH KHAWHMI:

• Chungkhar ah rualchan pawl an i thlak ning kong he pehtlaiin lungsiarem loin na um ahcun caan aa rem tikah na innchung hawi he mah kong kha i ruahṭi u

• Mah kong kha zeitindah kan tonghtham lai ti kha nan pahnih hnatla in biakhiak u